¹ Ino are ro ho rehafentika? Tokone hanohy amity hadisoa vao tika mba hitomboa ty hasoava? ² Tsy hisy vatane anie zay. Tika ze mate ty amity hadisoa, amity fomba akore vao ro mboe hivelomantika amizay avao? ³ Tsy hainareo vao fa reo iaby natao batisa tao amy Kirisity Jesosy le natao batisa tao amity nifatezane? ⁴ Ka, voaleve, niarake tamine tamity alala ty batisa ho amity fate tika. Niseho zay mba ho hoe ty nanangana Kirisity tamity mate tamity hasy ty Rae, ro andehanantika amity fiaignam-baovao avao kea. ⁵ Fa laha mikamba Amine amity toera ty fatene tika, le hikamba amity fitsanganane avao kea. ⁶ Haintika zay, fa ty vatantika taloha le pineke niarake tamine, mba hamoteha ty vata ty hadisoa. Niseho zay mba ho andevoze ty hadisoa sase tika. Re te mate le natalily fa mare vaho afake amity hadisoa. ⁸ Fa laha mate niarake tamy Kirisity tika, le mino fa hiara-belo Amine avao kea. ⁹ Tika le mahay fa nitsanga tamity mate kirisity, naho tsy mate sase re. Tsy manjaka amine sase ty fate. ¹⁰ Fa laha ty miomba ty fate le mate naho ty amity hadisoa Re, mate indraike avao hoahy iaby Re. Kanefa, ty fiaigna ze hiaignane le ivelognane ho an'Agnahare. ¹¹ Le hoe zay, tsy mahaintsy midineke ty vatanareo ho le fa mate amity hadisoa avao kea nareo, fa velo ho an'Agnahare ao amy Kirisity Jesosy. ¹² Laha zao ko enga hanjaka ao amity vatanareo mete mate ty hadisoa mba hanagnanareo ty paian-draty. ¹³ Ko atolotre hoahy ty hadisoa ty vatanareo, ho zaka ampiasae amity tsy hamarea. Fa atoloro ho an'Agnahare ty vatanareo, hoe ty nitsanga tamity mate te velo amizao. Naho atoloro ho an'Agnahare ty vatanareo mba ho zaka ampiasae amity hamarea. ¹⁴ Ko enga hanjaka aminareo ty hadisoa. Satria tsy ambane ty lily nareo, fa ambane ty hasoava. ¹⁵ Ka ino are? Tokone hanota vao tika satria tsy ambane ty lily, fa ambane ty hasoava? Tsy hisy vatane anie zay. ¹⁶ Tsy hainareo vao fa ty raike ze anoloranareo ty vatanareo ho mpanompo le ty raike ze ho teanareo, ty iaze tsy mahaintsy ho teanareo? Mare zay ndra mpanompo ty hadisoa te mitarike agne amity fatenareo, ndra mpanompo ty fagnenkea te mitarike agne amity hamarea. ¹⁷ Fa isaora Zagnahare! Satria le fa mpanompo ty hadisoa nareo, kanefa nagnenke tao amponareo ty fomba fampianara ze namea anareo. ¹⁸ Nafaha tamity hadisoa nareo, naho natao mpanompo ty hamarea. ¹⁹ Mirehake hoe ty ndaty raho naho ty halemea ty nofonareo. Satria vatane vaho nanolotre ty vatanareo ho ndevo ty halotoa vaho ty raty nareo, le hoe zay kea zao, atoloro ho ndevo ty hamarea ho amity hamasigna ty vatanareo. ²⁰ Fa tamy nareo nindevo ty hadisoa, le afake tamity hamarea. ²¹ Amizao, ino are ro vokatre azonareo tamireo zaka ze mahamegnatre anareo amizao? Satria ty voka rey zaka rey le ty fate. ²² Fa amizao laha fa nafaha tamity hadisoa nareo naho lasa mpanompon'Agnahare, le mahazo ty hamasigna. Ty vokatre le ty havelo zisikagne. ²³ Fa ty voka ty hadisoa le fate, fa ty fagnomean'Agnahare kea le ty havelo zisikagne ao amy Kirisity Jesosy Tompontika.