¹ "Lonike Nareo tsy hanao reo sampy, na hampitsanga sarin-jaka voasokitse na tsangnam-bato mase, vaho lonike nareo tsy hametrake sary vato voasokitse ao amy ty tanenareo ze hihofanareo. ² Lonike hiambe reo Sabatako naho hagnomey hase ty fitoerako mase nareo. Raho ro Yaveh. ³ Laha magnarake reo lalàko naho miamby reo liliko vaho magneke zane nareo, ⁴ le hagnome ora anareo amy ty fotoane Raho; hagnomey ty vokane ty tane, vaho reo hazo ty baibo hamokatse reo voane. ⁵ Vaho ty famofam-bare le hitohy amy ty fotoa ty fihaza voaloboke, vaho hikisake hatramy ty fotoam-pambolea ty vokatse voaloboke. Hitava ty mofonareo mandra-pahavoke anareo vaho hiagne am-pilamina agne amy ze nataonareo fitoboha ao amy ty tane. ⁶ Hagnomey anareo ao amy ty tane Raho; handre miarake amy ty zaka tsy hampatahotse anareo nareo, Handane reo biby mandoza amy ty tane Raho, vaho tsy handolo amy ty tanenareo ty mesa bey. ⁷ Hagnenjeke reo fahavalonareo nareo ka ho lavo eo agnoloanareo amy ty alala ty mesa bey iareo. ⁸ Dimy aminareo hagnenjeke zato, vaho zato aminareo hagnenjeke ray ale; ho lavo eo agnoloanareo amy ty alala ty mesa bey reo fahavalonareo. ⁹ Vamba nareo amy ty fitea Raho vaho hampamokatse naho hampitombo isa nareo; hametrake ty faagnekeko aminareo Raho. ¹⁰ Hitava reo hane voahaja amy ty fotoa maharitse nareo. Tsy maintse hamoake reo sakafo voahaja nareo satria hilanareo ho ahy ty vokatse vaovao ty efitse. ¹¹ Hametrake ty tabernakeliko eo aminareo Raho, vaho tsy halay anareo Raho. ¹² Handeha eo aminareo Raho vaho ho Andragnaharenao, vaho nareo nareo ho ndatiko. ¹³ Raho ro Yaveh Andragnaharenareo ze nanday anareo niboake ty tane Egypta,soa tsy ondevo iareo nareo, nanapake ty hizotso ty jonganareo raho vaho nampandeha anareo mahity. ¹⁴ Te laha tsy hinjanje Ahike nareo, vaho tsy hagneke reo liliko iaby, ¹⁵ vaho laha tsy magneke reo liliko naho malay reo lalàko, vaho tsy magneke reo liliko iaby nareo, te hivalihanareo ty fagnekeko__ ¹⁶ __laha manao reo raraha reo nareo, le hanao zao aminareo Raho: Hampise horohoro aminareo Raho, arete naho tazo ze hanimba ty maso naho hanimba ty fiaignareo. Hambole reo voa ho zaka-foa nareo, satria reo fahavalonao reo ro hitava ty vokane. ¹⁷ Hampeloke ty vatako hanohitse anreo Raho, vaho hanjaka reo fahavalonareo vatane nareo. Hanapake anao reo lehilahy ze malay anao, le hilay riha, na le tsy misy na raike ka magnenjeke anao. ¹⁸ Laha tsy minjanjeke reo liliko nareo, le hagnafay amy ty siake anareo im-pito noho ty faharatea nareo Raho. ¹⁹ Handrava ty avognavognavonareo agnate ty tajagnareo Raho. Hanao ty lagitse eo am-bonenareo ho manahake ty vy Raho vaho ty tanenareo manahake ty varahina. ²⁰ Hampandinike amy ty zaka-foa ty tanjakareo, satria tsy hamokatse ty vokane ty tanenareo, vaho reo hetae ao amy ty tane le tsy hamokatse reo voane. ²¹ Laha mandeha manohitse Ahike nareo vaho tsy hinjanje Ahike, handay famofaha im-pito ambone mihoatse eo aminareo Raho, arake ty faharateanareo. ²² Handefa reo biby mandoza hanohitse anareo Raho, ze hangalatse re anakareo, handrava ty biby fiharenareo, vaho hahakele isake anareo. Ka ho avy mate ty lalanareo ²³ Na le eo ka zane raraha zane ka mbo tsy magnake ty fagnitsiako avao naeo vaho mandeha manohitse Ahike hatragne, ²⁴ le handeha hanohitse anreo avao kea Raho, le Raho vatane ro handilo anareo im-pito noho reo faharatianareo. ²⁵ Handay meso bey eo aminareo Raho ze hagnatanterake ty famalia noho ty fivadiha tamy ty fagnekeko. Havoriko miarake ao an-tanànareo nareo, le handefa arete eo aminareo agne Raho, le hagnomey ho eo an-tagna reo fahavalonareo nareo. ²⁶ Lafa hotapahiko ty sakafo vatianareo, le ampela folo le hahavita hagnende ty mofonareo agnete laforo raike, le hizara ty mofonareo ara-danja iareo. Hitava nareo te tsy ho afa-po. ²⁷ Laha tsy minjanje Ahike nareo na le eo ka regne raraha regne, te mbo mandeha manohitse Ahike hatragne, ²⁸ le handeha hanohitse anareo amy siake hatragne Raho, vaho hagnafay Raho, vaho handilo anareo im-pito ambone mihoatse noho ty faharatianareo. ²⁹ Hitava ty nofo reo anandahinareo nareo; hitava ty nofo reo anak'ampelanareo. ³⁰ Handrava reo fitobohanareo ambone Raho, Hanapake reo alitara ty litin-ketae magnitse, vaho hagnare ty fatinareo eo ambone fate reo sampinareo, le Raho vatane ro halay anareo. ³¹ hamadike reo tanànareo ho faharava Raho vaho handrava reo fiitobohanareo mase. Tsy ho fale amy ty hagnitsy reo fagnatitsareo Raho. ³² Handrava ty tanenareo Raho. Reo fahavalonareo ze hitoboke agne le ho vere amy ty farava. ³³ Hampiele anareo magnera reo firenena Raho, vaho hagnatsoake ty mesako naho hagnarake anareo Raho. Henga ty tanenareo, vaho ho rava reo tanànareo ³⁴ Le hitea ty Sabatane ty tane agnate ty handreane ho lane vaho ho ao amy ty tane ty fahavalonareo nareo. Agnate zane fotoa zane, hitofa ty tane ka hitea reo sabatane. ³⁵ Laha mbo handre ho lane zane, le hana fitofa , ze ho fitofa tsy azone tamy ty Sabatanareo, lafa nitoboke tao nareo. ³⁶ Vaho ty amy ty sasane aminareo ze napoke agne amy ty tane reo fahavalonaoreo, le handefa tahotse amy ty arofonareo Raho ka na le ravin-ketae voatioke ty tioke ka le hanaitse anareo, le hilay manahake ty tihoe nilay amy ty meso nareo. Holavo iriha, nale tsy misy na ia na ia magnejeke ka. ³⁷ Ho tafintohe eo amy ty kiraikiraike manahake ty tihoe milay meso nareo, na le tsy misy na ia na ia ka magnenjeke anreo. tsy hana here hitsanga magnoloa reo fahavalonareo nareo. ³⁸ Ho mate agne amy reo firenena nareo, vaho handrapake anreo reo tane ty fahavalonareo. ³⁹ Reo ze sisa tavela aminareo le ho vere ao agnete ty faharatea iareo, ao amy ty tane reo fahavolonareo, vaho noho reo heloke ty razambey iareo le hotarere iareo. ⁴⁰ Te laha magneke reo haratianao naho ty faharatia reo razambeine iareo, naho reo famadiha ze tsy nahatokisa tamiko, vaho kea ty fandehana manohitse Ahike__ ⁴¹ ze nahaave Ahike hivalike amy iareo vaho nandesako aiereo tagne amy ty tane reo fahavalone__ laha miambane ty arofo tsy voatapake iareo, vaho laha manaike ty fandilovako ho ahy reo faharateane iareo, ⁴² le hotiarovako ty fagnekeko niarake tamy ndre Jakoba, ty fagnekeko niarake tamy ndre Isaka, vaho ty fagnekeko niarake tamy ndre Abrahama; hotiaroko avao kea ty tane. ⁴³ Henga iareo ty tane, ka ho fale miarake amy ty Sabatane zane agnate ty handreane ho lane tsy misy aiereo. Ka tsy maintse hanohitse ho ahy reo haratine iareo satria iareo vatane ro nandà reo fitsipiko naho nalay reo lalàko. ⁴⁴ Te na le eo ka zane iaby zane, lafa agne an-tanene reo fahavalone iareo. le tsy hagnare aiereo Raho, na halay aze ka handrava vatane aiereo naho fagnafoagna ty fagnekeko nairake tamy iareo, te Iraho ro Yaveh Andragnahare iareo. ⁴⁵ Te hotiaroko ho aiereo ty fagneke niarake tamyeo razambeine, amaso reo firenena, mba ho Andragnahare iareo Raho. Iraho Yaveh." ⁴⁶ Reo ro lile, fitsipike, vaho lalàgna ze natao Yaveh teo Amine naho ty vahoagn'Israely tagne am-bohitse ndre Sinay tamy ty alala ndre Mosesy.