¹ Nitsara tamy ndre Mosesy Yaveh nanao tihoe: ² "Miresafa amy ty vahoagn'Israely ka talilio iareo tihoe: 'Laha misy ndaty manao sareke miavake amy Yaveh, le ampiasao reo vatovato ty viline mifagnarake amine. ³ Ty hasoa ty vatovatonao ho ahy ty lehilahy manomboke amy ty roapolo le hatramy ty enimpolo tao le tsy maintse sekele volafote dimapolo, arake ty sekele ty fitoera mase. ⁴ Ho ahy ty ampela amy zane tao zane le sekele telopolo ty hasoa ty vatovatonao. ⁵ Ty hasoa ty vatovatonao amy ty dimy hatramy ty roapolo tao le tsy maintse sekele roapolo, vaoha ho ahy ty ampela le sekele folo. ⁶ Ty hasoa ty vatovatonao ho ahy ty lehilahy vola raike hatramy ty dimy tao le tsy maintse sekele volafote dimy, vaho sekele volafote telo ho ahy ty ampela. ⁷ Ty hasoa ty vatovatonao ho ahy lehilahy enempolo tao ro miakatse le tsy maintse sekele folo dimy ambe,, vaho ahy ty ampela le sekele folo. ⁸ Feie laha tsy afake ty handoa ty hasoa ty vatovato iaze ndaty manao ty sareke, le tsy maintse aseho agne amy ty mpisoro iaze ndaty atolotse, vaho hamatovato zane ndaty zane amy ty viline zaka iaze manao ty sareke ty mpisoro. ⁹ Laha misy ndaty magniry hanao soro biby ho ahy Yaveh, ka laha eke Yaveh zane, le ho voatoka ho Aze zane biby zane. ¹⁰ Lonike iaze ndaty tsy hagnova na hamadike biby manahake zane, ty soa ho amy ty rate na rate ho amy ty soa. Laha mampifamadike biby raike ho amy ty biby raike hafa reke, le samy avy mase na zane na ty raike ze nampifamadiha tamine. ¹¹ Feie, laha toa ka maloto iaze nanaova iaze ndaty sareke homey ahy Yaveh, le tsy maintse handay iaze biby agne amy ty mpisoro iaze ndaty. ¹² Hamatovato zane ty mpisoro, arake ty vatovato ivarota ty biby. Na ino na ino vatovato apoke ty mpisoro amy iaze biby, le zane ro ho vatovatone. ¹³ Laha magniry ty hagnavotse zane ty tompone, le magnampe ambone dimy mihoatse vatovato ty viline ao amy ty vilim-pagnavota zane. ¹⁴ Lafa misoro ty tragnone ho fagnomeza mase ho ahy Yaveh ty lehilahy raike, le hamatovato zane ty mpisoro na ho soa na ho rate. Na ino na ino hamantovatoa ty mpisoro zane le zane ro ho ie. ¹⁵ Feie laha magniry hagnavotse zane ty tompone ze nanoka ty fitobohane, le tsy maintse magnampe raike ampahadime ty vatovato ty viline ao amy ty vilim-pagnavota zane reke, ka ho aze zane. ¹⁶ Laha misoro ty sasane amy ty tanine avao ty lehilahy raike, le ho arakarake ty lanja ty voa paia vole amy zane ro ho vatovato ty viline-vare hordea raike homera ho vatovatoa sekele volafote dimapolo. ¹⁷ Laha ohatse ka misoro ty baibone agnate ty tao ty jobile re, le hijano amy zane avao ty vatovato ty viline. ¹⁸ Feie laha misoro ty baibone afara ty taon-jobile kea reke, le lonike hokonte ty mpisoro ty vatovato ty baibo arake ty isake ty tao sisa zisike-pahaave ty taon-jobile magnarake, vaho tsy maintse hahena ty vatovato ty vily zane. ¹⁹ Laha magnire hagnavotse ty baibone iaze lehilahy ze nanoka zane, le tsy maintse magnampe raike ampahadiny ty vatovato ty viline reke, le ho aze zane. ²⁰ Laha tsy hagnavotse ty baibo kea reke, na nivarotane tamy ndaty hafa iaze baibo, le tsy azo avota sase zane. ²¹ Te kea, iaze baibo, lafa amboake amy ty taon-jobile, le ho fagnomeza mase ho ahy Yaveh zane, manahake ho ahy Yaveh. Ho ahy ty mpisoro zane. ²² Laha manoka baibo ze baka niviliane ty lehilahy raike, feie tsy agnisa ty tanen-drazane zane baibone zane, ²³ le ho dinihedihe ty mpisoro ty vatovato ty vily zane hatramy ty tao ty jobile, ka tsy maintse aloa iaze lehilahy ho fagnomeza mase ho ahy Yaveh ty vatovato zane amy zane andro zane. ²⁴ Amy ty tao ty jobile, le himpole agne amy iaze lehilahy ze niviliana zane ty tane agne amy ty tompo ty tane. ²⁵ Ty vatoavato ty vily iaby le tsy maintse atao arake ty lanja ty sekele ty fitoera mase. Tsy maintse gera roapolo ro tandrife amy ty sekele raike. ²⁶ Tsy misy mahazo manoka ty terake voalohane amy ty biby, satria ty terake voalohane le fa ahy Yaveh; na aombe na aondre, ahy Yaveh zane. ²⁷ Laha ohatse ka biby maloto zane, le mahazo mivily zane amy ty vatovato ty viline ndraike iaze tompone, vaho tsy maintse magnampe raike ampahadimy ty vatovato zane. Te laha tsy avotse kea iaze biby, le ho avile amy ty vatovatone voatondro zane. ²⁸ Te tsy misy zaka ze atoka ty lehilahy raike ho ahy Yaveh, bak'amy ze iaby agnane, na ondaty na biby, na ty tanen-drazane, le afake avile na avota. Ze iaby natoka le mase loatse ho ahy Yaveh. ²⁹ Tsy misy vilim-pagnavota azo aloa ho ahy ty ndaty ze voatoka ho amy ty faharava. Tsy maintse vonoa zane ndaty zane. ³⁰ Ty ampahafolo ty vokatse iaby ty tane, navole egne amy ty tane zane na vokatse bak'amy ty hetae, le ahy Yaveh. Mase ho ahy Yaveh zane. ³¹ Laha hagnavotse ty ampahafolo ty vokane ty lehilahy raike, le tsy maintse magnampe ambone ty dimy mihoatse amy ty votovato zane reke. ³² Laha ty amy ty ampahafolo ty aombe na ondre, na ino na ino mandalo eo ambane fifiake ty mpiarak'aondre, ty raike ampahafolo zane le tsy maintse atoka ho ahy Yaveh. ³³ Lonike tsy hipay ty biby soa na ty rate ty mpiarake, lonike re tsy hampifamalike zane. Laha ohatse ka manakalo zane re, le samy mase iaby na zane na iaze takalone. Tsy azo avota zane. ³⁴ Reo iaby ro lily nomey Yaveh ho ahy ndre Mosesy ho ahy ty vahoagn'Israely tagne am-bohitse Sinay.