¹ Fa manjare maloto ty volamena; henhe ty fiova ty volamena malio vatane! Vato masy reo niparitake tan-joron-dala egne iaby. ² Anake saribily i Ziona reo le sahaza ty lanja gniereo amity volamena malio, fa amizao iereo le tsy sahaza naho barika tanemanga reo, asa tagna mpanefe tanemanga reo iereo! ³ Na ty amboa ntaolo aza matahotse ty trane mba hampinono anane reo, nefa ty anak'ampela ty ndatiko le fa manjare lozabevata, manahake amity tane efetse agne ⁴ Ty lela ty kolo minono le mipiteke amity lagnilagny naho ty arandrano; mangatake hane ty aja, feie tsy misy hoaze reo. ⁵ Reo ze nihina hane lafo vily te amizao le kere an-dala egne; reo ze tineza nisiky siky volomparasy, le miroro amity fako mikoronta egne te henane. ⁶ Ty fagnafaiza ty anak'ampela ty ndatiko le bevata naho ty ani Sodoma, fa rinava tagnate ty andro bory zay vaho tsy nisy nanan-tagna mba hagnampe aze. ⁷ Mpitarike aze reo le nalio kea naho ty oram-javo, foty kea naho ty ronono; ty vata gniereo le mena madera naho ty haran-driake, ty tagna gniereo le manahake ty safira. ⁸ Ty pozy gniereo amizao le maieke naho ty lila; tsy hay an-dala egne iereo. Ty holy gniereo le nipiteke tamity taola gniereo; nizare maike ty hetae zay. ⁹ Reo ze vinono tamity mesobey le sambatse kea naho reo ze mate ty hakere, ze osa, tinomboke tamity tsy fahampea ty vokatse baka an-baibo agne. ¹⁰ Ty tagna ampela reo le maleme fagnahy le fa nahandro anane reo avao; nanjare hane gniereo zisike ty andro nandrobaha ty anak'ampela ty ndatiko iereo. ¹¹ naneho ty siane iaby ty Yaveh; nandrotsake ty siane maisake re. Nandrehetse afo ta Ziona ao mba handrobaha ty fitobohane re. ¹² Tsy nino mpanajak reo ty tane, vaho tsy nino ty ndaty ze iaby zao, fa afake nilitse tamy vavahady i Jerosalema reo fahavalo mandietse reo. ¹³ Niseho zay naho ty hadisoa mpitoky reo naho ty hadisoa mpisoro reo ze fa nampip[oke ty lio ty mare tagnivoane eo. ¹⁴ Niriorio, poake, tamy lala reo egne re. Tena vita loto vatane tamy ze lio zay iereo kea tsy nisy nagnega mba hikasike ty siky gniereo. ¹⁵ "Miala! ty Maloto!" hoe ty kora ty ndaty tamy gniereo. "Miala! Miala!" Ko mikasike!" Kea le niriorio iereo; hoe ty vahoake tamy reo firene reo tihoe: "Tsy mahazo mijano eto sasy iereo." ¹⁶ Yaveh mihintsy ty nagnaparitake iereo; tsy nagnete iereo sasy re. Tsy nagnomey hasy mpisoro reo iereo, vaho tsy naneho hato tamy roandria reo. ¹⁷ Mivembe ty masognay, miambe vasoke ze hagnampe anay; bakamireo tilikambo fiambenagnay ro nagneteanay ty firene ze tsy afake namonje anay. ¹⁸ Nagnorike liagnay reo iereo, tsy afake nandeha tamy lalagnay reo zahay. Marine ty faragnay vaho vita isake andrognay reo, fa ho avy ty fiafaragnay. ¹⁹ Ty mpagnejeke anay le malaky fandeha naho voromahery an-dagnitsegne reo. Nagnejeke anay tan-bohitsegne iereo vaho nanao otreke ho anay tangnefetse agne. ²⁰ Ty fofognay amity vavoragnay eo le-iaze voahoso gn'Yaveh- Ire iaze voatsepake tan-dava gniereo aoy; iaze vinola tihoeke: " Ambane ty alone ao ro hahavelo anay amity firene iaby." ²¹ Mifalea naho mitsinjaha, ty anak'ampela Edoma, iriha ze mitoboke amity tane Oza ao. Fa ho anao avao kea ty hagnomeza ty kapoake; ho mamo riha vaho tsy hampisiky ty vatagnao. ²² Ty anak'ampela Ziona, fa hijano ty fagnafaiza anao, tsy hagnalava ty sesentanegnao re. Kanefa ty anak'ampela i Edoma, hagnafay re; tsy haminy hadisoagnao reo re.