¹ Vaho nampagnotane tamity tragno fagnajaria a Babylona ao ty Dariosy Mpanjaka. ² Tamity tana misy fiaron'Akmeta ao a Mediana ao ro nahisaha foronko taratasy raike; izao ty nisoratse ao: ³ "Tamity tao voalohane nanjaka Kyrosy Mpajaka, le nagnakatse lily mikasike ty tragno Nagnahare ta Jerosalema ao ty Kyrosy tihoe: "Ao hatsanga ndraike ty tragno hitoboha ty soro, ao hatoboke ty fototse itobohane, ao ho enem-polo metatse ty hahabone, vaho enempolo metatse ty velarane, ⁴ miarake amity vato bevata telo lala naho hetae vao lala raike, vaho ao ty viline haloa amity tragno ty mpajaka. ⁵ Vaho indeso mihere ty fiasa volamena naho volafoty ze ahy Nagnahare, ze nindese Nebokadnezara bakamity tempoly a Jerosalema agne nimba Babylona agne vaho aheregno amity tempoly a Jerosalema ao. Iriha ro hampipoke tragno Nagnahare reo.' ⁶ Vaho Tatenay, governora ty Faretse Andafe ty Rano, Setara Bozenay, vaho mpiarae miasa ze amity Faritse Andafe ty Rano, midisoa lavitse! ⁷ Engaho ty asa amity tragno toy ho ahy Nagnahare raike avao. Ty governora naho roandria Jiosy reo ro hananga ty tragno Nagnahare toy amy ze pilasy zay. ⁸ Mandily ty tsy maintsy hanovagnareo izao ho ahy roandria Jiosy ze mananga ze tragno Nagnahare reo zao tihoe: Ty vola bakamity hetra ty mpanjaka baka andafe ty Rano ro hasae hagnarama lahilahy reo hampijanogna iereo ty asane. ⁹ Ndre ino ndre ino paia-anak'agnombe, agnodry lahy, na anak'agnodry ho ahy ty raketse oroa ho ahy ty Zagnahare ty Lagnitse, vare, sira, divae, na diloilo manahake ty lily mpisoro reo a Jerosalema ao-le ameo iereo isan'andro tsy tampake zaka reo. ¹⁰ Anovo zay mba hindaisa gniereo ty raketse ho ahy ty Zagnahare ty Lagnitse ka hivavake ho ahy, mpanjaka, naho anagnao reo. ¹¹ Vaho mandily raho fa ndre ia ndre ia mandika olily io, le tsy maintsy hagnafaha maso ambe raike ty amity tragnone ao vaho tsy maintsy hizare fako mivorivory naho izay ty tragnone. ¹² Vaho Zagnahare ze nahavy ty agnarane hitoboke eo lonike handroba ze mpajaka na ndaty ze manondro tagna hanova ze lily zay, na hanimba ze tragno Nagnahare zay a Jerosalema ao zay. Iraho, Dariosy, ro mandily izay. Ao hatao ampahazotoa zay!" ¹³ Vaho naho ty lily nalefa ndre dariosy mpajaka, ty Tateanay, iaze governora ty Faretse Andafe ty Rano, naho Setera Bozenay naho mpirae-miasa amine, le nanao ze iaby iaby nandilia dariosy Mpajaka. ¹⁴ Ka le nananga manahake ze natoro ndre Hagay naho Zakaria tamity fitokia roandria Jiosy reo. Natsanga gniereo manahake ty lily nagnahare Israely naho Kyrosy, Dariosy, vaho Artaksersesy, mpanjaka Persia zay. ¹⁵ Le vita ty tragno tamity andro fahatelo ty vola Adara, tamity tao fahene nanjaka Dariosy Mpanjaka. ¹⁶ Finete ty fanokana ze tragno Nagnahare zay tamity hafalea ty vahoake Israelita, mpisoro reo, Levita reo, vaho reo ze tavela tamy ndevo reo. ¹⁷ Nagnomey agnombe zato, agnodry lahy zato, vaho anak'agnodry efajato ho ahy ty fanokana ty tragno Nagnahare iereo. Aose lahy roe ambine folo avao kea ro namea ho raketse naho ty hadisoa ho ahy Israely iaby, raike isake ty foko ta Israely agne. ¹⁸ Nitingy mpisoro reo naho Levita tamity fizara gnasa ho ahy ty fanompoa a Nagnahare a Jerosalema ao avao kea iereo, manahake ty vitasoratse tamity Boki ndre Mosesy ao. ¹⁹ Vaho reo ze baka antsesetane agne le namete ty Paska tamity andro fahefatse ambiny folo ty vola voalohane. ²⁰ Mpisoro reo naho Levita iaby reo le nagnalio ty vatane vaho namono ty soro ty Paska ho ahy reo ze baka antsesetane agne iaby, nama izay iereo. ²¹ Ty vahoa Israely ze nihina tamity hena ty Paska le reo ze nihere baka an-tsesetane agne naho nanarake ty vatane tamity halotoa ty vahoake ty tane vaho nila ani Yaveh, Zagnahare Israely. ²² Nifale tamity hafalea ty fitsamboatsamboagna ty Mofo tsy misy masirasira zisike ty fito tao iereo, satria ty Yaveh le fa ninday hafalea tamy gniereo vaho nagnova ty fo ty mpajaka Asyria mba hagnantajake ty vata gniereo tamity sata ty tragnone, le iaze tragno ty Zagnahare Israely.