¹ Vaho Hagay mpitoky naho Zakaria anake lahy ndre Ido mpitoky le nitoky tamity agnara ty Zagnahare Israely tamy Jiosy reo ta Joda ao naho Jerosalema ao. ² Nitsanga Zerobabela anake lahy Seatiela naho Jeosoa anake lahy Jozadaka vaho nanomboke nagnamboatse ty tragno Nagnahare ta Jerosalema ao niarake tamy mpitoky ze nagnahere iereo reo. ³ Bakeo ty Tatenay governora ty Faretane ta Andafe ty Rano, Setara Bozanay, vaho mpirae lia amine reo le niavy vaho nivola tamy gniereo tihoe: "Ia ty nandily anareo hagnamboatse tragno o naho hamita lakoro reo? ⁴ Hoe avao kea iereo tihoe: "Ia iaby ty agnara lahilahy nagnamboatse otragno? ⁵ Fa ty maso Nagnahare le tamy lohandoha Jiosy reo eo vaho tsy nanaka iereo ty rafe gniereo. Niambe taratasy hindeha amity mpajaka agne naho lily hihere amy gniereo mikasike izay iereo. ⁶ Intoy ty dika mitovy itaratasy Tatenay, governora ty Faretane ta Andafe ty Rano agne, naho Setera Bozenay vaho mpirae miasa tamine tamity Faretane ta Andefe ty Rano, ze nalefa gniereo ho ahy Dariosy mpanjaka. ⁷ Nandefa tsara iereo, nanoratse raho ho ahy Dariosy mpanjaka tihoe: "Lonike ho anao ty fiadagna iaby. ⁸ Ao ho hay ty mpajaka fa zahay le nimba Joda mbeo ho amity tragno Nagnahare bevata agne. Izay le haore amy vato bevata reo naho hetae mateve atoboke amy lakoro reo eo. Fa atao soa vatane ty asa vaho mandeha soa an-tagna gniereo eo. ⁹ Nagnotane roandria reo zahay tihoe: 'Ia ty nagnomey anareo lily hamboatse otragno o naho lakoro reo?' ¹⁰ Nagnotane ty agnara gniereo avao kea zahay hahainao ty agnara ty lahilahy kiraidraike iaby ze nitarike iereo. ¹¹ Namale iereo vaho nanao tihoe: 'Izahay le mpanompo iaze raike ze Zagnahare ty lagnitse naho ty taney, vaho izahay le magnere mananga ty tragno ze namboare tao maro taloha agne lahafa nagnore izay ty mpanjaka bevata Israely vaho nahavita izay. ¹² Ndre izay aza, lahafa nampasiake any iaze Zagnahare ty lagnitsey ty razagne, le nameane tan-tagna Nebokadnezara mpanjaka i Babylona iereo, ze nandrobake otragno vaho nangalake ty ndaty ho sesetane ta Babylona agne. ¹³ Kanefa, tamity tao voalohane naha-mpajaka Babylona ani Kyrosy, le nagnakatse lily hagnamboara ty tragno Nagnahare ndraike ty Kyrosy. ¹⁴ Nahere ndre Kyrosy mpajaka avao kea zaka volamena naho volafoty tan-tragno Nagnahare ze nindese Nebokadnezara bakao amity tempoly ta Jerosalema ao ho amity tempoly ta Babylona ao. Ireo le nahere tamy Sesbazara, ze nanoene ho governora. ¹⁵ Hoe re tamine tihoe: "Rambeso zaka reo. Mandehana vaho toboha amity tempoly a Jerosalema ao reo. Ao ty tragno Nagnahare hatsanga agne." ¹⁶ Vaho avy henaneo ty Sesbazara ka nagnisy ty fototse ty tragno Nagnahare ta Jerosalema ao; vaho namboare zay, fa tsy mboe vita vatane.' ¹⁷ Vaho laha to ty mpajaka, le ao ho hentea amity tragno fagnajaria a Babylona ao laha misy lily hagnamboara itragno Nagnahare a Jerosalema ao oy bakamy Kyrosy mpanjaka ao. Le ao ty mpajaka handefa ty hevene aminay.