Laha fa miloka hizara i tane holovagnio nareo lonike hanao fanatitra ho ay Yaveh, i fanatitse eo le ho zara masign'itaneo, dime arivo sy roale metatse ty halavane, vaho raiale metatse ty sakane. Ho masy njay, ze fanatitse maregne aze [Fanamarihana: Laha tokone ho ray ale ty ao amy lahatsoratse hebreo naho ty sasane amireo andiany vaovao, le misy amireo dikan-teny taloha naho andiany vaovao maro ro manao tihoe: roale." ] ² Baka mizay eo le hisy efa-jaro zay mirefe diman-jato metatse tora-droe magnodidigne i toera masigny, miarake amity rafetse magnodidigne zay mirefe dimapolo metatse ty sakane ³ Baka amy faritsio eo ro handefanao ampahane raike dime arivo sy roale metatse ty halavane vaho raiale ty sakane, ⁴ ho toera masy zay, tena toera masy. Ho toera mazy ao amy tane i mpisorogn'ireo zay manompo Yaveh zay niharine Yaveh mba hanompo aze. Ho toera ty tragno iareo zay vaho faritse masy ho aity toera masy. ⁵ Le ho dime arivo sy roale metatse ty halavane vaho raiale ty sakane, vaho ho tana-bey ho ay Levita reo ze manompo tamy tragno ao. ⁶ Hanondro faritra ho ay tanàgnio riha, dime arivo metatse ty sakane, vaho dime arivo sy roale ty halavane, izay le harine i faritse natoka ho aity toera masy, i tana gn'izay le ho ahy ty keleia gn'Israely. ⁷ Ty tana i andriadahy le ho eo amy ty sisigne roe i faritse natoka ho aity toera masy naho ty tanàne. Ho eo ahandrefane naho antignanane zay. Ty halavane le hitovy halava amy i ampahane reo, baka handrefa mianignana. ⁸ I tane zay le ho fanagna i andriandahy agne Israely i andriadahiko reo tsy hampijale i vahoako sasa, fa hagnomey tane ho ay i keleia gn'Israely, ho aity taranagn'iareo. ⁹ Yaveh tompo ro nilaza izao: ampy zay, re andriandahy Israely! Afaho ty hereloha naho ty fifandiera, manova mahity naho marene! tsy ro ahe i vahoako! izay ro fagnambara Yaveh tompo. ¹⁰ Lonike nareo hana mizana marene, efaha marene, vaha bata marene! ¹¹ Efaha naho bata hitovy fatramba ho ampahafolo ty homera raike, ty fagnameza gn'iareo le hitovy amity homera. ¹² Ty sekele raike le ho ropolo gera; ty sekele enempolo le ho mina raike hoanareo. ¹³ Izao ro fandrambesa anjara tsy maintsy aboagnareo: ty antsasa ene ty vaha raike isa homeram-bare tritika iaby, vaho hagnomey antsasane ene ty vaha isake ty homeram-bare hordea nareo. ¹⁴ Ty lily ty raketse diloilo le antsasa ty bata raike isa ty kora(ze bata folo) na isake ty homera raike, satria ty homera raike le bata folo avao kea. ¹⁵ Agnodry na ose raike iaby amity agnodry aman'ose isake ty biby roanjato iaby bakamity faretse lona gnisraely ro hampiasa amity fanova raketse oroa na rake pilongoa hanova fagnavota ty vahoake-izay ro fitalilia ty Tompo Yaveh. ¹⁶ Ty vahoake iaby amy itaney eo le hanao ze fandrambesa anjara zao ho ahy ty roandriandahy a Israely agne. ¹⁷ Ho asa ty roandriandahy ty magnomey biby reo ho amity raketse oroa, raketse ho hane reo, vaho raketse nome amity hafalea reo naho ty fankalaza ty volam-bao, vaho amity andro sabata-ty hafalea fa vita tingy ty longo Israely iaby. Hagnomey amy raketse reo naho ty hadisoa iereo, raketse voa reo, raketse oroa reo, vaho rake pilongoa reo ho amity fagnavota ho ahy ty longo Israely. ¹⁸ Ty Tompo Yaveh le mivola izao: Amity vola voalohane, amity andro voaloha ty vola, le hangalake agnombe lahy tsy misy tsikone bakamity agnombe riha vaho hanao raketse ty hadisoa ho ahy ty fitoboha masy. ¹⁹ Ty mpisoro le hangalake ty ilane amity lio ty raketse naho ty hadiosa vaho hampitoboke izay amity tolaha dala ty tragno eo naho amity sisy zorone efatse reo ty sisy ty alitara, vaho amity tolaha dala ty tane malalake agnatene egne. ²⁰ Ho anoenao isake ty hadisoa ty natao na tamity andro fahafito ty vola; hagnavotse ty tempoly riha amignizay. ²¹ Amity vola voalohane amity andro fahefatse ambiny folo ty vola, le hisy hafalea ho anareo, hafalea fahafito. Hihina mofo tsy misy lalivay riha. ²² Amo andro, ty roandrian dahy le hagnoma agnombe lahy raike ho raketse naho ty hadisoa ty vatane naho ho ahy ty vahoake iaby amity tane. ²³ Zisike ty hafalea fahafito, ty roandria dahy le hagnoma raketse oroa ho ahy gn'Yaveh: agnombe lahy fito naho agnodry lahy tsy misy tsikone fito isan'andro zisike ty fahafito, vaho aose lahy raike isan'andro ho raketse naho ty hadisoa. ²⁴ Bakeo ty roandria dahy le hanao raketse hohane raike vaha isak'agnombe lahy vaho raike vaha isake n'agnodry lahy miarake amity diloilo hina raike isam-baha. ²⁵ Amity vola fahafito amity andro fahadime ambine folo ty vola, amity hafalea agne, le hanao raketse zisike ty fito andro roandria dahy reo: raketse naho ty hadisoa, raketse oroa, raketse ho hane, vaho raketse ty diloilo.