¹ Ezao ro tsara ty Tompo Yaveh: Ty vavahady ty tane malalake agnatene, magnoloa ty atignana, le hahily zisike ty ene gnadro amity fiasa, fa ho hane kea zay amity Sabata, naho amity andro ty voaloham-bola. ² Hilitse ty ambalikagne amity lala ty vavahady naho ty lavaranga bakambaly gnizay ty roandriandahy, vaho hitsanga magnoloa ty tolaha-dala ty vavahady agnetene laha mboe manao ty rakene oroa naho ty rakepilongoa ty mpisoro. Le hagnomey hasy an-tokolan dala ty vavahady agnatene eo re vaho hiboake, fa tsy hahily ty vavahady zisike hariva. ³ Ty vahoake ty tane avao kea le hanompo agnoloa gn'Yaveh eo amity filira amo vavahady io amity Sabata naho voaloham-bola reo. ⁴ Ty raketse oroa ze nagme ty roandriadahy ho ahy Yaveh amity andro Sabata le ananagnodry ene tsy misy takaine vaho aose lahy tsy misy takaine. ⁵ Ty raketse vare miarake amity aose lahy le ho vaha raike, vaho ty raketse miarake amy ana nagnodry reo le ze iriene home, vaho diloilo raike hina isam-bare vaha raike. ⁶ Amity andro ty voalohanbola le ao ze hagnomey agnombe tsy misy takaine bakamity andian nagnombe, ananagnodry ene, vaho aose lahy tsy misy takaine. ⁷ Ao re hanao raketse voa rae vaha isa nagnombelahy vaho raike vaha ho ahy ty agnodry lahy, vaho ze iriene ho ahy ana nagnodry reo, vaho diloilo rae hina isan nampaha bare iaby. ⁸ Lahafa militse amity lala ty vavahady naho ty lavarangane ty roandriamdahy, le ao re hiala amity lala nombane avao. ⁹ Fa laha avy agnoloa gn'Yaveh eo amity hafalea vita tingy reo ty ndaty ty tane, ndra ia ndra ia militse amity vavahady avaratse hanompo le ao hiboake amity vavahady antimo, vaho ndra ia ndra ia militse amity vavahady antimo le ao hiboake amity vavahadty avaratse. Tsy misy ndaty afake mihere amity vavahady nilirane, fa tsy maintsy miboake mahity avao re. ¹⁰ Ao ho agnivoa gniereo eo roandriandahy reo; lahafa militse ao iereo, le tsy maintsy militse re, vaho lahafamiala iereo, le tsy maintsy miala re. ¹¹ Amy hafalea reo ao, ao ho ampaha bare raike isan bato nagnombelahy naho efaha isan'agnodry lahy ty raketse vare, vaho ndre ino ndre ino iriene hamea miarake amy ana nagnodry reo, vaho diloilo raike hina isan kefaha. ¹² Lahafa magnomey raketse avy ampiane ty roandrian dahy, na raketse oroa na rakepin longoa ho ahy Yaveh,le hosokafe ho aze ty vavahady magnoloa ty antignana. Hagnomey ty raketse oroa na ty rake pilongoa manahake ty anoene amity andro Sabata re. Bakeo le tsy maintsy hiboake re, vaho afara ty hiboahane le hahily ty vavahady. ¹³ Tovo gnizay, hagnomey ana nagnodry tsy misy tsikone herentao ho raketse oroa ho ahy Yaveh isan'andro riha; hanao izay isake maraindray riha. ¹⁴ Hagnomey raketse vare miarake amy gnizay isake maraindray riha, ty ignene amity ampaha vaho ty intelo ty diloilo raike vaha hamdema ty koba ty raketse vare ho ahy Yaveh, magnorike ty lily maharetse. ¹⁵ Hikarakara ty ana nagnodry, ty raketse voa, vaho ty diloilo isake maraindray, raketse oroa maharetse iereo. ¹⁶ Ezao ro tsarae gny Tompo Yaveh: laha magnomey zaka ho ahy ty raike amy anane lahy reo ty roandriandahy, lova zay. Ho fanagna anake zay, lova zay. ¹⁷ Fa laha magnomey zaka bakamity lovane ho ahy ty raike amy mpanompone reo re, le ho ahy iaze mpanompo ze zisipiavia ty tao fahafaha, vaho bakeo le hihere amy iroandriandahy agne zay. Lovane reo le ho ahy anane lahy raike reo. ¹⁸ Tsy hangalake ty lova ty ndaty amity zara tanene avao ty roandriandahy; tsy maintsy hagnomey bakamity zara tanene ho ahy anane lahy reo re tsy hiparitaha ndatiko reo, ndaty kiraidraike bakamity zara tanene reo avao. ¹⁹ Vaho bakeo ninday ahy tamity filira tamity vavahady mbamy efetse masy reo mbeo mpisoro gno ndaty reo, nagnoloa ty avaratse vaho ingo! Nisy pilasy tahandrefa egne. ²⁰ Hoe re tamiko tihoe: "Intoy ro pilasy ze tsy maintsy hiketseha mpisoro reo ty rake pitoboha naho ty raketsenaho ty hadisoa vaho ze tsy maintsy hagnedasa gniereo ty raketse oroa. Tsy tokone hinday ty raketse ambaly ty tane malalake ao iereo, fa bakeo le ho hamasigne ty vahoake. ²¹ Bakeo le ninday ahy tamity tane malalake agne re vaho nindesene tamity zorone efetse gnize tane malalake zay raho, vaho hisako fa nisy fitsara hafa tamity zoro ty tane malalake iaby. ²² Amo zoro nefe ty tane malalakeo le nisy tane malalake kele efatse, efapolo metatse ty halavane vaho telopolo ty velarane. Metatse mitovy iaby ho ahy tane malalake efatse reo iaby. ²³ Misy pilasy natao tamity vato nagnodidy ty efetse tamy gniereo, vaho ty fatapera fiketreha le tambane ty laharam bato ao. ²⁴ Hoe iaze lahilahy tamiko tihoe: "Reo ro pilasy ze hiketseha ty mpanompo ty tempoly ty soro ty vahoake."