¹ "Amizao riha, ty ana-gnodaty, mitokia amy reo vohy Israely vaho volagno tihoe: 'Ty vohy Israely, jigno ty safa i Yaveh. ² Izao ro safagne Tompo Yaveh: Fa nivola mikasike anareo ty fahavalo tihoe: ''Hia!'' vaho "Ninjare hanagnanay reo toera abo taloha.''' ³ Naho izay mitokia vaho volagno tihoe: 'Izao ro safagne ty Tompo Yaveh: Naho ty fahapoteha gnareo naho ty fanafiha ze avy taminareo eo bakagne amity lafine iaby, le fa ninjare hanagna gniareo firenen-kafa nareo; fa ninjare foton-kevetse ty sogny vaho ty lela mpagnaratiraty nareo, vaho tantara ty ndaty. ⁴ Naho izay, ty vohy Israely, jigno ty safa i Tompo Yaveh: Izao ro safagne i Tompo Yaveh amy reo vohitse naho reo haboa abo, amy reo baibon- driake naho reo baibo, amy reo ndaty ty fahapoteha naho ty tanan-taolo ze fa ninjare ndevo naho foton-keve ty fagnaratia ho ahy reo firenen- kafa ze magnodidy gniareo- ⁵ naho izay ty Tompo Yaveh le mivola izao: Fa nivola tao amity afom-tsiako mandietse reo firen-kafa vatane raho, mandietse ani Edoma naho reo iaby ze nangalake ty taneko ho ahy ty vatane ho fanagna, mandietse ze iaby ze sambe nifale tam-piane naho nanao tsisy dikane tamity fagnahine ao iareo, arake ty nangala iareo ty taneko ze mete hitalilia iareo ty tane ty ahine ho ahy ty tegna iareo.' ⁶ Naho izay, mitokia amity tane Israely vaho volagno amy reo vohitse naho baibo tihoe: Ingo! Agnate ty siako naho ty heloko ro agnambarako izay satria ninday ty fagnaratiaratia ty firene nareo. ⁷ Naho izay, izao ro safagne i Tompo Yaveh: Iraho mihintsy ro hanondrotse ty tegnako hifanta fe reo firene ze magnodidy anareo le hinday ty fahafaham-barakane avao vatane. ⁸ Fa inareo, ty vohy Israely, hitombo sampane naho hamokatse ho ahy Israely vahoako nareo, satria hihere aminareo tsy ho ele iareo. ⁹ Fa ingo, miarake anareo raho, vaho minday anareo an-kahasitraha; ho volagne naho ho fitseza amity voa nareo. ¹⁰ Kea hampitombo vohi-gnondaty aminareo eo raho ao amity foko Israely iaby, ze iaby zay. Hisy ndaty reo tana vaho hamboare ndraike reo rava. ¹¹ Hampitombo ty ndaty naho ty bibily aminareo eo raho vaho vohitse mba hitombo naho hahavokatse iareo. Le hahavy anareo hisy ndaty manahake anareo taloha raho, vaho ho tahieko mihoatse naho reo vitanareo taloha nareo, hahaianareo fa iraho ro Yaveh. ¹² Hinday ndaty raho, Ty Israely vahoako, mba handeha aminareo eo. Ho fanagna iareo riha, ka ho lovane, vaho tsy hahavy ty ana gniareo ho mate sasy riha. ¹³ Izao ro safagne i Tompo Yaveh: Satria iareo mivola aminareo tihoe: "Mandeve ndaty riha, vaho fa mate ty ana ty firene," ¹⁴ naho izay le tsy handeve ndaty sasy nareo, vaho tsy hanao ty firenenareo handala ty havilasia iareo sasy. Izay ro fitalilia ty Tompo Yaveh. ¹⁵ Na kea hagnega anareo hijy ty fagnaratia ty firene sasy raho; tsy hinday ty hegna ty ndaty sasy nareo na hahavy ty firene ho tonta-izay ro fitalilia ty Tompo Yaveh."' ¹⁶ Vaho niavy tamiko ty safa i Yaveh, manao tihoe: ¹⁷ Ty ana gnondaty, lahafa nitoboke tamity tane ty foko Israely, le nandoto izay tamy reo fombane naho reo asane. Ty fomba iareo le manahake ty halotoa ty regila ty ampela agnoloako eo. ¹⁸ Kea nararako tamy iareo eo ty siakeko naho ty lio ze napo gniareo tamity tane naho vaho ty fandotoa iareo izay tamity alala reo sampine. ¹⁹ Naparitako tamy reo firene reo eo iareo; naparitake nameno reo tane iareo. Nitsaraeko arake reo fombane naho reo asane iareo. ²⁰ Bakeo iareo nimbamy reo firene, vaho na taia na taia nimba iareo, le nagnaraty ty agnarako masigne iareo lahafa nivola nivola ty amy iareo ty vahoake tihoe: 'Rey vatane vao ro vahoa Yaveh? Fa fa nandietse ty tanene iareo.' ²¹ Fa nana fangoraham-po ho ahy ty agnarako masy ze fa nilotoe ty foko Israely tamity firene raho, laha nandeha tagne iareo. ²² Kea volagno amity foko Israely tihoe: 'Izao ro safagne i Tompo Yaveh: Tsy manao izay naho ty aminareo raho, vaho foko Israely, fa naho ty agnarako masy, ze fa nilotoenareo tamy reo firene iaby ze fa nombanareo. ²³ Fa hanao ty agnarako bevata ho masy raho, ze fa nilotoenareo tamy reo firene-tagnivoa reo firene, ro nagnaratianareo izay. Vaho le ho hay ty firene fa iaraho ro Yaveh-izay ro fitalilia ty Tompo Yaveh-lahafa hisagnareo fa masy raho. ²⁴ Hafahako bakeo amy reo firene nareo vaho havoriko bakagne amity tane iaby, le hindeseko agne amity tanenareo nareo. ²⁵ Bakeo ho tsipezako rano malio aminareo eo mba ho lioveko amy reo fahalotoanareo iaby nareo, vaho ho lioveko amity sampinareo iaby nareo. ²⁶ Hameako arofo naho fagnahy vaovao nareo agnatenareo ao, vaho hafahako amity nofognareo ty arofo vato. Fa hameako arofo nofo nareo. ²⁷ Hampitoboke ty fagnahiko aminareo eo raho vaho hahavy anareo hagnorike ty liliko naho hiambe ty liliko, le hoanoenareo reo. ²⁸ Vaho hitoboke ao amity tane ze nameako ty razagnareo nareo; ho vahoako nareo, vaho Iraho ho Zagnaharenareo ²⁹ Fa ho avotako baka amity fahalotoanareo iaby nareo. Hikaike ty vare naho hampitombo izay raho. Tsy ho asiako kere sasy aminareo eo. ³⁰ Hampitomboeko ty voa ty hetae naho ty voka ty baibo mba tsy hinday ty hegna ty kere amy reo firene eo sasy nareo. ³¹ Le hahatiaro ty fomba ratinareo naho ty asa ratinareo ze tsy soa nareo, vaho haneho fangorigna amity tarehenareo eo naho reo hadisoanareo naho reo asa mamparikorikonareo avao nareo. ³² Tsy manao izay naho ty aminareo raho-izay ro fitalilia ty Tompo Yaveh-ao ho hainareo zay. Naho izay ao ho megnatse naho afa-baraka naho ty fombagnareo nareo, ty foko Israely. ³³ Izao ro safagne ty Tompo Yaveh: Amity andro ze handiovako anareo amity hadisoanareo iaby, le hanoeko toboke amy reo tana ao nareo vaho hagnamboatse ndraike reo toera rava. ³⁴ Fa hasaenareo ndraiky ty tane rava mandra-piavia izay ho tsy faharava amasognareo eo iaby ze mandrio sasy. ³⁵ Le hivola iareo tihoe: "Poteke ty tane toy, feie ninjare manahake ty baibo i Edena re; reo tana poteke naho reo rava tsy misy ndaty ze nisimbae le voaaro mafe sady nitoboha te henane." ³⁶ Bakeo reo firene hafa magnodidy anao le hahay fa iraho ro Yaveh, fa Iraho ro nananga ty rava naho nampamokatse ndraike reo toera tsisy. Iraho ro Yaveh. Fa nitalilieko zay vaho ho anoeko. ³⁷ Izao ro safagne ty Tompo Yaveh: Hangatahe gnareo foko Israely ndraike raho tihoe mba hanao ze ho ahy iareo, mba hampitombo iareo manahake ty andia-gnondaty. ³⁸ Manahake ty agnondry voatoka ho ahy ty soro, manahake ty agnodry agne jerosalema amity fanasane voatingy, le ho feno andia-gnondaty reo tana rava vaho hay iareo fa iraho ro Yaveh.'''