¹ Vaho niavy tamiko ty safa i Yaveh, manao tihoe: ² "Ty ana gnondaty, ampagnatreho ty vohy Seira ty vatanao vaho mitokia mandiera izay. ³ Volagno amy zay tihoe: 'Ingo! Mandietse anao raho, ty Vohitse Seira, vaho hamango anao amity tagnako raho vaho hanao anao ho lao naho tahotse. ⁴ Ho anoeko rava reo tanagnareo, vaho inareo le hinjare faharava, bakeo le ho hay iareo fa iraho ro Yaveh. ⁵ Satria fahavalo tamity vahoa Israely eo zisikagne nareo, vaho satria nandefa iareo tan-tagna ty meso nareo tamity andro ty fijalea gniareo, tamity andro ty naha bevata ty sazy iareo. ⁶ Naho izay, laha mboe velo kea raho-izay ro fitalilia ty Tompo Yaveh-le hagnoma anareo ho amity fampipohan-dio raho, vaho hagnenjeke anareo ty fampipohan-dio! Satria tsy niheje nareo ty fampipohan-dio, le hagnejeke anareo ty fampipohan-dio. ⁷ Hoanoeko faharava vatane ty vohitse Seira lahafa hangalake baka amizay ze iaby mandrio eo naho mimpoly amy zay eo raho. ⁸ Le ho fenoeko amity loha gniareo ty vohy izay. Reo haboa abonareo naho reo baibo vaho reo loharanognareo iaby-reo ze mate ty meso le hitonta amy reo ao. ⁹ Ho anoeko faharava zisikagne nareo. Tsy hisy ndaty reo tanagnareo, fa ho hay nareo fa iraho ro Yaveh. ¹⁰ Iriha fa nivola tihoe: "Reo firene roe reo naho reo tane roe reo le ho ahy, ka hana iareo ho hanagna tika,"na le niarake tamy iareo aza ty Yaveh. ¹¹ Naho izay, laha mboe velo kea raho-izay ro fitalilia ty Tompo Yaveh-le hanao arake ty siakenao naho arake ty fialogna ze nanagnanao tamity falaignanao any Israely raho, vaho haneho ty vatako amy iareo raho lahafa mitsara anao. ¹² Ka ho hay nareo fa iaraho ro Yaveh. Fa nahare reo fagnaratia ze nivolagnenareo tamy reo vohy Israely raho, lahafa nivola nareo tihoe: "Fa rava iareo; fa namea anay teo mba ho arapake iareo." ¹³ Fa nanondrotre ty vata gnareo tamiko tamy ze nivolagnenareo nareo, vaho nampitombo reo safa nandieranareo ahy; vaho reko ze iaby zay. ¹⁴ Izao ro safagne i Tompo Yaveh; Ho anoeko rava nareo, laha mboe mifaly ty tane iaby. ¹⁵ Laha mboe mifaly amity lova ty ndaty Israely eo naho ty faharavane nareo, le hoanoeko aminareo kea zay. Hinjare faharava riha, vaho Vohitse Seira, vaho Edoma iaby-ze iaby zay! Le ho hay gniareo fa iraho ro Yaveh."''