¹ Le tonga de niavy tamiko ty safa i Yaveh, manao tihoe: ² "Ty ana gnondaty, mitokia mandiera reo mpiarak' agnondry Israely. Mitokia vaho volagno iareo tihoe: 'Izao ro safagne i Tompo Yaveh amy reo mpiarak' agnondry: Loza ho ahy reo mpiarake agnondry Israely ze miambe ty tegna iareo avao. Feie vao tsy tokone hiarake ty agnondry aman'ose ty mpiarak' agnondry? ³ Mihinana ty antsasa ty vondrake riha vaho misiky volo nagnondry. Mamono ty vondra ty agnondry riha. Iriha aminio tsy mba miarak' agnondry. ⁴ Tsy nagnamafe reo ze mana gnarete riha, na nagnasitra iareo ze marare. Tsy mampitohy reo ze tampake riha, vaho tsy mampipoly ze voaroake na mila ty tsobo. Fa kea, mandily amy iereo amity alala ty here naho hereloha riha. ⁵ Bakeo le niparitake tsy nisy mpiarake iareo, vaho ninjare hane ho ahy ty bibily an-baibo egne, tafara ty nampiparitaha iareo. ⁶ Niriorio tegne amity vohitse iaby naho ty haboa iaby ty agnondriko, vaho voaparitake nameno ty tane zay. Nefa tsy mboe misy ndaty mila ireo. ⁷ Naho izay,ty mpiarak'agnodry, jigno ty safa Yaveh: ⁸ Laha mboe velo kea raho-izay ro fitalilia ty Tompo Yaveh-satria minjare ndevo naho hane ho ahy ty bibily iaby an-baibo egne ty agnodriko, satria tsy nisy mpiarak'agnodry vaho tsy nisy tamy reo mpiarak'agnodriko nila ty agnodriko, fa niambe ty vatane avao reo mpiarak'agnodry fa tsy niambe ty agnodriko. ⁹ Naho izay, ty mpiarake agnondry, njanogno ty safa i Yaveh: ¹⁰ Tompo Yaveh misafa izao: Ingo! mandietse reo mpiarak'agnondry raho, vaho hitake ty agnodriko an-tagna iareo eo raho. Bakeo le ho roaheko amity fiambena ty agnondry iareo; na ty mpiarak'agnondry aza le tsy hiambe ty fiay gniareo sasy satria hangalake reo agnodriko tsy ho amity vava gniareo raho, mba tsy ho hane iareo sasy ty agnodriko. ¹¹ Fa ty Tompo Yaveh misafa izao: Ingo! Hila ty agnodriko raho vaho hikarakara iereo, ¹² manahake ty mpiarake agnodry mila ty agnodrine amity andro lahafa agnivoa ty agnodrine mipatarike eo raho, vaho hamonje iareo amity toera iaby ze nagnaparitaha iareo amity andro ty raho naho ty hieke. ¹³ Bakeo le hindeseko miboake bakeo amy reo vahoeke iareo; havoriko agne amity tane reo vaho hindeseko agne amity tane iareo. Hampitoboke iareo egne amity tane nahe-gniareo sisim-bohy Israely, amity renerano, vaho agne amity fitoboha iaby amity tane ao raho. ¹⁴ Hagnenga iareo agne amity ahetse soa raho; ty vohitse abo Israely ro ho fitoboham-bilone. Hiroro eo amy reo toera soa firaofam-bilo reo, agne amity tane feno ahetse, vaho hivory egne amity vohy Israely iareo. ¹⁵ Iraho mihintsy ro hiarake ty agnondriko, vaho iraho mihintsy ro hampandre iareo-izay ro fitalilia i Tompo Yaveh- ¹⁶ Hila ty tsobo raho vaho hagnere ze niroahe. Hamehe reo agnodry tampake raho vaho hagnasitra ty agnondry marare fa ty vondrake naho ty mafe le hoaripako. Hiarake agnondry ara-drarene raho. ¹⁷ Kea amizao riha, ty agnodriko-izao ro safagne i Tompo Yaveh-ingo, ho mpitsara eo amity agnodry naho agondry raho vaho eo amy reo agnodry lahy naho ose lahy. ¹⁸ Feie vao tsy ampe hohane ty ahetse soa, ro tsy maintsy lialianao amity tombonao ty sisa tavela amy iahetsey; vaho ho nome ty rano malio, ro tsy maintsy lotoe hizare fotake amity tombonao ty renerano? ¹⁹ Feie vao ty agnodriko tsy maintsy mihina ze nilialianao tamity tombonao, vaho mino ze nilotoenao hizare fotake tamity tombonao? ²⁰ Naho izay ty Tompo Yaveh le mivola izao amy iareo: Ingo iraho mihintsy ro hitsara amy reo agnondry vondrake eo naho reo mahia, ²¹ Satria nareo fa nanosetoseke iareo tamity tehezagnareo naho sorognareo, vaho fa nisokirenareo tamity trandrognareo maleme reo nandra-pagnaparitahagnareo iareo niboake ty tane. ²² Hamonje ty agnodriko raho vaho tsy ho ndevo sasy iereo, vaho hitsara eo amity agnondry raike naho raike hafa raho! ²³ Hametrake mpiarak' agnodry raike amy iareo eo raho, le Davida mpiasako. Hiambe iareo reke, hagnomey hane iareo, vaho ho mpiambe iareo. ²⁴ Fa iraho, Yaveh, ho Zagnahare iareo, vaho Davida mpiasako le ho roandria amy iareo eo-Iraho, Yaveh, ro fa nagnambara izay. ²⁵ Le hanao fagnankeam-pilongoa amy iareo raho vaho hagnafake reo bibily masiake baka amity tane, mba hahafaha iareo miay am-pilamina agne amity tane efetre vaho hiroro soa vatane agne amy reo ala. ²⁶ Iraho le hinday fitahia amy iareo naho amy reo toera magnodidy ty haboa-nako, satria handefa ora amity andro voatondro raho. Ho lera ty fitahia zay. ²⁷ Le hamokatse reo voane ty hetae ty baibo, vaho ty tane le hagnomey alala ty vokane. Ho voa aro ao amity tane iareo ty agnodriko; le ho hay iareo fa iraho ro Yaveh, lahafa manampake reo hily ty zioga gniareo raho, naho lahafa magnavotse iareo baka amity tagna gniereo ze nanonta iareo. ²⁸ Tsy ho ndevo ho ahy reo firene sasy iareo, vaho tsy handrapake iareo sasy reo bibily ambone ty tane. Fa hiay am-pilamina iareo, vaho tsy hisy na ia na ia hampatahotse iareo. ²⁹ Fa hagnamboatse pilasy fambolea milamy ho ahy iareo raho mba tsy ho mate ty kere sasy iareo amy taney ao, vaho reo firene tsy hinday fagnaratia amy iareo. ³⁰ Le ho hay iareo fa iraho, Yaveh Zagnahare iareo, le miarake amy iareo. Iareo ro ndatiko, ty foko Israely-izay ro fitalilia i Tompo Yaveh. ³¹ Fa inareo ro agnodriko, agnodry aman'ose ty aheko, vaho ndatiko, vaho Iraho ro Zagnaharenareo-izay ro fitalilia ty Tompo Yaveh."'