¹ Le niavy tamiko ty safa i Yaveh, nanao tihoe: ² "Ty ana gnondaty, talilio amity vahoanao zao; volgno amiareo tihoe: 'Lahafa minday meso handietse ty tane iaby raho, le hangaleke ndaty raike amy iareo ty ndaty ze tane zay ka hanao aze ho mpitily ho ahy iareo. ³ Magnete ty meso fa tamy eo amity tane reke, vaho mitioeke ty anjomarane mba hampitandre ty vahoake! ⁴ Laha mahare ty feo ty anjomara ty ndaty nefa ty mitandre, vaho laha avy ka mamono iareo ty meso, le ho an-doha ty kiraidraikeo avao ty lione. ⁵ Laha misy ndaty mijy ty feo ty anjomara ka tsy miambe, le ho eo amity lione; fa laha miambe re, le hahavonje ty aine. ⁶ Na izay aza, laha hisa ty mpitily fa tamy ty meso, nefa laha tsy mitioke t anjomara re, vaho ty vokane le tsy nampiambena ty ndaty, vaho laha avy ty meso ka mangalake ty fiay gnondaty, le mate ty hadisoane avao ze ndaty zay, fa hagnotaneako amy iaze mpitily ty lione.' ⁷ Vaho iriha, ty ana gnondaty! Fa nanoeko mpily ho ahy ty foko Israely riha; hijy reo vola baka amity fitavako riha ka hampitandre iareo amity agnarako. ⁸ Laha misafa amity raty fagnahy raho tihoe: 'Ty raty fagnahy, ho mate vatane riha!' kanefa laha tsy mitalily izay na mampiambe ty raty fagnahy ty amity fanaone riha, le ho mate ty hadisoane reke ze raty fagnahy, kanefa ho takeko amity tagnanao ty lione! ⁹ Kanefa riha, laha mampiambe ty raty fagnahy ty amity fanaone, mba hialane amy zay, vaho laha tsy miala amity fanaone reke, le ho mate ty hadisoane reke, fa iriha hahavonje ty fianao. ¹⁰ Vaho iriha, ty ana gnondaty, volagno amity foko Israely tihoe: 'Ezao ro volagnenareo: "Ty helognay naho ty hadisoanay le aminay eo, vaho simba ireo zahay! Hanao akore va rie ty hahavelo anay?'''' ¹¹ Volagno amy iareotihoe: 'Laha mboe velo kea raho-izay ro fitalilia ty Tompo Yaveh-le tsy magneke ty fahafateza ty raty fagnahy raho, fa laha miveoke amity fanaone ty raty fagnahy, le ho velo reke! Mifona! amity fomba ratinareo! Fa nanao akore ro tokone ho mate nareo, ty foko Israely?' ¹² Kea amizao riha, ty ana gnondaty, volagno amity vahoanao tihoe: 'Ty fahitia ty ndaty marene le tsy haganvotse aze laha mandiso reke! Ty faharatia ty raty fagnahy tsy hamono aze laha mifogne amity hadisoane reke! Fa tsy afake hiay naho ty fahitiany ty ndaty marene laha mandiso reke. ¹³ Laha mivola amity marene raho tihoe: '''Ho velo vatane reke!''' vaho laha mitoky amity fahitiane reke ka le manao ty tsy rarene, le tsy hahatiaro ze fahatiane raho. Ho mate ty haratia nanoene reke. ¹⁴ Kea laha mivola amity raty fagnahy raho tihoe: '' Ho mate vatane riha", nefa laha mifona hiala amy reo hadisoane naho manao ze marene naho mahity reke- ¹⁵ laha mampipoly ty antoke ty findramam- bola ze nangatahine tamam- paharatia reke, vaho laha mampipoly ze nangalarine reke, vaho laha mandeha amy reo lily ze minday fiagna ka tsy mandiso sasy-le ho velo vatane reke. Tsy ho mate reke. ¹⁶ Tsy misy ho tiahive reo hadisoa ze nanoene. Fa nanao ty marene naho mahity reke, ka naho izay, le ho velo vatane reke! ¹⁷ Nefa hoe ty vahoakenao: "Tsy rarene ty findaisa ty Tompo!" kanefa ty fombagnareo ro tsy rarene! ¹⁸ Laha miala amity fahamarenane ka mandiso ty ndaty mare, le ho mate izay reke! ¹⁹ Laha miala amity faharatiane ty raty fagnahy ka manao ze mahity naho marene, le ho velo naho reo zaka reo reke! ²⁰ Nefa inareo vahoake manao tihoe: "Tsy rarene ty findaisa ty Tompo!"Hitsara ty kiraidraike aminareo arake ty lalane iaby raho, ty foko Israely!''' ²¹ Vaho tamity tao faharoe ambiny folo, tamity andro fahadime ty vola fahafolo ty fahandevozantika, ro nisy mpiala tane niavy tamiko eo baka Jerosalema ao ka nanao tihoe: "Ndevo i tana ay!" ²² Tamiko eo ty hariva aloha ty niavia iaze mpiala taney ty tagna Yaveh, vaho ty vavako le nisokatre tamity andro ze niaviane tamiko eo tamity mazavatignana. Kea le nivoha ty vavako; tsy moa sasy raho! ²³ Le niavy tamiko ty safa Yaveh, nanao tihoe: ²⁴ "Ty ana gnondaty, reo mitoboke amy reo rava ao amity tane Israely le mivola ka manao tihoe: 'Ndaty raike avao Abrahama, vaho nandova i taney reke, kanefa maro tika! Namea an-tika mba ho fanagna i taney. ²⁵ Naho izay volagno amy iareo tihoe: 'Izao ro safagne i Tompo Yaveh: Mihinan-dio nareo, vaho magnonjo ty masonareo agne amy reo mbiasa nareo, bakeo le nandrarake lio gnondaty nareo. Tokone hana ty tane vatane vao nareo? ²⁶ Fa nianky tamy reo mesonareo nareo vaho fa nanao zaka mamparikoriko; ty ajahy kiraidraike le mandoto ty valy ty mpiara-belo amine. Tokone hahazo ty vatane vao nareo? ²⁷ Izao ro ho safagnenao amy iareo: 'Izao ro safagne i Tompo Yaveh: laha velo kea raho, le ho tonta-meso marene vatane reo ndaty ao amy reo rava, vaho reo ze am-baibo agne le hameako ho ahy reo zaka-managnay ho hane, vaho reo ze ao amity fiarova mafe naho an-davam-bato agne le ho mate ty arete-mandripake. ²⁸ Le havaliko ho lao naho horohoro ty tane, vaho ho tampetse ty avognavo ty hery izay, fa ho bey reo vohy Israely, ka tsy hisy na ia na ia handrio amy reo eo.' ²⁹ Le ho hay iareo fa iraho ro Yaveh, lahafa manao ty tane ho alo naho horohoro naho ty falotoa iaby nanoe iareo raho. ³⁰ Kea amizao riha, ty ana gnondaty-ty vahoanao le mivola zaka mikasike anao agnila reo fahetse naho reo vavahady ty tragno, vaho ty kiraidraike mifampivola-ty kiraidraike amity rahalahine tihoe: 'Ndao tika handaha vaho hijano ty safa ty mpitokine ze boake amy Yaveh! ³¹ Kea le ho avy aminao eo ty vahoako, manhake ty fanoene mateteke, ka hitoboke agnilanao eo vaho hijanjy reo volanao, nefa tsy hangneke irey iareo. Reo vola marene ro am-bava gniareo eo, nefa ty fone le magnorike tombone tsy ara-drarene. ³² Fa manhake ty antsa soa hoahy iareo riha, feo soa ze nitendre soa tamity lokanga, kea le hinjanjy reo safanao iareo, nefa tsy hisy amy iareo hagneke izay. ³³ Kea lahafa miseho ze iaby zay-ingo! hiseho zay!-le ho hay iareo fa nisy mpitoky tamine eo."