¹ Tamiko eo ty fita Yaveh, vaho ninday ahy hiboake tamity alala ty fagnahy Yaveh reke vaho nampitoboke ahy tagnivoa ty baibo eo; feno taola zay. ² Le nampiodikodihene tamizay eo raho. Ingo! Maro isake tamy iareo ro tegne am-baibo. Ingo! Maike vatane iareo. ³ Hoe reke tamiko tihoe: "Ty ana gnondaty, afake miagne ndarike vao ty taolagne toa?" Le hoe raho tihoe: "Ty Tompo Yaveh, Iriha raike avao ro mahafantatse.'' ⁴ Le nivola tamiko reke tihoe: "Mitokia amy reo taola reo vaho volagno amy iareo tihoe: 'Ty taola-maike. Njigno ty safa i Yaveh. ⁵ Izao ro safagne i Tompo Yaveh amy reo taola reo: Ingo! hagnenga fofon'ay aminao raho, vaho ho velo riha. ⁶ Hagnenga hozatse magnera anao raho vaho hinday nofo aminao eo. Handrakoke anao amity holitse raho vaho hagnisy fofognay agnatenao ao mba hiay riha. Le ho hainao fa iraho ro Yaveh.''' ⁷ Ka le nitoky arake ze nandilia ahy raho; laha nitoky raho; le ingo, nisy feo niavy, ze mangoviste. Le nifagnato nipiteke reo taola-taola amity taola. ⁸ Nagnete raho vaho, ingo, tamy iareo eo ze ozatse zao, vaho nitombo ty nofo ka nandrakoke iareo ty holitse. Fa tsy mboe nisy fofognay tamy iareo ao. ⁹ Le nivola tamiko Yaveh tihoe: "Mitokia amity fofognay, mitokia, ty anagnondaty, vaho mivolagna amity fofognay tihoe: 'Ty Tompo Yaveh mivola izao: Ty fofognay, miavaia bakamy ty tioke efatse, vaho tiofo reo ze voavono, mba hahafahagniareo miay." ¹⁰ Kea nitoky arake ze fa nandilia ahy raho; niavy tamy iareo ty fofognay vaho velo iareo. Bakeo le tsy nitsanga tamity tombone iareo, ze miaramila bevata. ¹¹ Le nivola tamiko Yavehtihoe: "Ty anagnodaty, foko Israely iaby reo taola reo. Ingo! Hoe iareo tihoe: 'Nihamaike taolagnay reo, vaho lasa ty fagnatenanay. Nilanie zahay.' ¹² Naho izay le mitokia vaho volagno iareo tohoe: 'Ty Tompo Yaveh mivola izao: Ingo! Hanokake reo kiborinareo raho vaho hagnakatse anareo hiakatse amy zay ao, ty vahoako. Hinday anao hihere amity tane Israely raho. ¹³ Le ho hay nareo fa iaraho ro Yaveh, lahafa manokake ty kiborignareo naho minday anareo hiboake amy iareo raho, ty vahoako. ¹⁴ Hagnenga ty fagnahiko aminareo ao raho ka ho velo nareo, vaho hampitofa anareo agne amity tanenareo raho lahafa hainareo fa iraho ro Yaveh."" ¹⁵ Le niavy tamiko ty safa i Yaveh, manao tihoe: ¹⁶ "Kea amizao riha, ty ana gnondaty, mangala tapan- ketae raike ho ahy ty vatanao vaho sorato amy zay eo tihoe: 'Ho ahy joda naho ty vahoa Israely, reo ragnene. 'Le managala tampa-ketae raike hafa vaho sorato amy zay eo tihoe: 'Ho ahy Josefa, ty tampa-ketae ndre Efraima, vaho ho ahy reo vahoa Israely iaby, reo ragnene.' ¹⁷ Indeso hiarake ho tampa-ketae raike ie roe reo, mba hinjare raike an-tagnanao eo iareo ¹⁸ Lahafa mivola aminao reo vahoanao vaho manao tihoe: 'Feie vao tsy hivola aminay ty dika reo zaka reo vao riha? ¹⁹ le volagno amy iareo tihoe: 'Ty Tompo Yaveh misafa ezao: Ingo! Mangalake ty tampa-ketae ndre Josefa ze eo an-tagna ndre Efraima naho reo foko Israely ragnene raho vaho mampifandray izay amity tampa-ketae i Joda, mba ho tampa-ketae raike avao iareo, vaho hinjare raike an-tagnako eo iareo.' ²⁰ Tanjaho an-tagnanao eo reo tampa-ketae ze nisoratenao tamaso iareo eo. ²¹ Talilio amy iareo tijoe: 'Ty Tompo Yaveh mivola izao: Ingo! Handeha hangalake reo vahoa Israely bakamy reo firene ze nomba gniareo raho. Hamory iareo bakamy reo tane magnodidy raho vaho hinday iareo agne amity tanene. ²² Hoanoeko firene raike agne amy taney iareo, amy reo vohy Israely eo, vaho mpanjaka raike ro ho mpanjaka iareo iaby, vaho tsy ho firene roe sasy iareo. Tsy hovoazara ho fanjaka roe sasy iareo. ²³ Vaho handoto ty tegna iareo amy reo aoline sasy iareo, reo zavane mampangaroharo, na raike amy reo hadisoane hafa. Fa hamonje iareo amy reo nanoene tsy am-pinoa ze nandisoane raho, vaho hagnalio iareo, ka ho vahoako iareo vaho iraho ho Zagnaharene ²⁴ Davida mpanompo ro ho mpanjaka iereo. kea mpiandry raike ty hoe iereo iaby, sady handeha arake ty fitsipiko naho hitandre ty lalàko sady hanao mare zay ireo. ²⁵ Hipetrake amity tane ze niomeiko i Jakoba mpanompoko iereo, ze nijanogna iereo razambey nareo. Hipetrake amizay zisike amy farane iereo- ireo, ireo anane, naho ireo zafekelene, naho te i Davida mpanompoko ro hobey ireo zisike amy farane. ²⁶ Hagnenga fagnekeam-pihavagna miarake amy iereo Raho. Ho fagnekea zisike amy farane miarake amy iereo zay. Hagnenga iereo Raho naho hagnamaro iereo, le hagnenga ty toerako masy agnivo iereo zisike amy farane. ²⁷ Ty toeram-pisy Ahy le hiarake amy iereo, ho Andriagnahare Raho, sady ho vahoako iereo. ²⁸ Le ho fanta iereo fa iraho ro Yaveh ze magnavake Israely, naho amy iareo zisike amy farane ty toerako masy.'''