¹ Amizao, ry Israely, midranjigna ty lalana vaho ty lily ze hampianareko anareo, hataonareo; mba hahavelo anareo vaho hiliranareo ka hangalanareo ty tane ze hamea Yaveh, ty Zagnahare ty razanareo nareo. ² Ao nareo tsy hagnampe ty rehake ze handiliako anareo, na hagnafake amizay, mba hiambenanareo reo lala Yaveh Zagnaharenareo ze handiliako anareo. ³ Ty masonareo le fa nahisake ze natao Yaveh noho Bala-peora; satria ty ndaty iaby ze nagnorike i Bala-peora, le rinava Yaveh Zagnaharenao hiala teo aminao. ⁴ Fa nareo ze niarake tamy Yaveh Zagnaharenareo kea le mboe velo amizao, iaby aminareo. ⁵ Ingo, nagnanatre lily aman-dala anareo raho, arake ze nandilia Yaveh Zagnahareko ahy, fa tokone hanao zay eo agnivo ty tane ze hiliranareo mba ho azonareo nareo. ⁶ Ka ambeno zay ka anovo; fa zay ro hamarea vaho hazavan-tsay nareo eo amaso ty ndaty ze haharey momba reo lily iaby reo ka hanao ty hoe:' Azo antoke fa vahoake hendre vaho manan-pahaia ty firenem-bey toy.' ⁷ Fa ia ro firene bey hafa ze mana zagnahare marine aze vatane, manahake Yaveh Zagnaharentika isake ty mikaike Aze tika? ⁸ Ia ro firene bey hafa ze mana lily aman-dala mare manahake ty lalana ze atoboko eto agnoloanareo androany toy? ⁹ Fa miambena naho ambeno soa ty vatanao, mba tsy hagnalignoanao ty zaka ze hisa ty masonao, naho mba tsy hiala ty arofonao amity androm-piaignanao iaby zay. Fa kea, ampahaio amity ananao vaho ty zafenao zay. ¹⁰ Tamity andro ze nijoroanao teo agnoloa Yaveh Zagnaharenao tagne Horeba, le nirehake tamiko Yaveh hoe:' Avorio ho ahy ty vahoake, naho zaho hampaharey iereo ty rehako, mba hianara iereo hatahotre ahy amity androm-piaigna iereo iaby eto antane, ka hahaia iereo magnanatre ty anane.' ¹¹ Le niharine nareo naho nitsanga teo ampoto ty vohitse. Nirehetre afo nanakatre ty halale ty lagnitse ty vohitse, niarake tamity ieke, raho, naho iem-pito mateve. ¹² Nirehake taminareo bakao agnivo ty afo Yaveh; naharaey ty feo niarake tamity rehake nareo, feie tsy nahisake toera; naharey feo niarake tamity rehake nareo, feie tsy nahisake ty toerane; naharey feo avao nareo. ¹³ Nagnombara taminareo ty fagnenkea ze nililiene hataonareo re, le lily folo. Sinorane tamity vato pisake roe zay. ¹⁴ Nandily ahy hagnanatre anareo ty lily vaho baiko Yaveh tamize andro zay, mba hanovanareo zay agne amity tane ze hitobohanareo ka halaenareo ho hanagna. ¹⁵ Ka miambena soa__fa tsy nahisake ty toerane nareo tamize andro nisafagna Yaveh taminareo tao Horeba bakao agnivo ty afo zay__ ¹⁶ mba tsy hanimba vata-nareo ka hagnamboatre sare-sokitre mitovy toera amize mete ho hare iaby, le toeragn'ondaty lahy na vave, ¹⁷ na mitovy toera amize mete ho biby iaby eto antane, na mitovy toera amize mete ho biby managnelatre naho mitily egne amity lagnitse, ¹⁸ na mitovy toera amity zaka iaby ze milaly amity tane, na mitovy toera amity fia agne agnate rano ambane tane. ¹⁹ Ao ty masonao tsy hiandrandra lagnitse naho hanente ty masoandro, ty vola, na ty kinta__ty zaka iaby egne amity lagnitse__ka ho voatao hivavake amirey vaho hanompo rey__reo zaka namea Yaveh Zagnaharenao anjara ho ahy ty firene iaby ambane ty lagnitse. ²⁰ Fa Yaveh nangalake anareo ka ninday anareo niala bakao amity toko fandrehetam-by, le bakagne Egypta, mba ho vahoake ze lovane arere, manahake anareo amizao. ²¹ Meloke tamiko Yaveh noho ty aminareo; nifanta Re fa tsy hitsake i Jordana raho, naho tsy hilitse ao amize tane soa zay, le ty tane ze namea Yaveh Zagnaharenao ho lovavanao. ²² Fa kea, tsy maintsy ho mate eto amity tane toy raho; tsy maghazo mitsake i Jordana raho; fa nareo kea le hitsake naho hahazo ze tane soa zay. ²³ Ambeno soa ty vatanareo, mba tsy hagnaligno ty fagnenkea Yaveh Zagnaharenareo, ze nataone taminareo, ka hagnamboatre sare sokitre mitovy toera amy iaby ze nandrara Yaveh Zagnaharenao tsy hataonao. ²⁴ Fa afo mandrava Yaveh Zagnaharenareo, naho Zagnahare saro-tene. ²⁵ Laha fa managnanake aman-jafe riha, naho lafa fa nitoboke ela tao amity tane, naho laha manimba ty vatanao ka manao sare-sokitre arake ty toera ze mete ho zaka iaby, naho manao ze raty eo amaso Yaveh Zagnaharenao, mba hagnentseke ty helone__ ²⁶ le mikaike ty lagnitse vaho ty tane raho androany ho vavolombelo aminareo fa ho rava hiala eo amity tane ze hisanareo agne Jordana ho fanagnanareo vatane nareo; tsy ho lava andro ao nareo, fa ho rava iaby. ²⁷ Ho zarae Yaveh eo amity vahoake nareo, ka ho hatao tsiampe sisa eo amireo firene, ze hindaisa Yaveh anareo nareo. ²⁸ Agne nareo ro hanompo zagnahare hafa, zay asa ty tagna ondaty, vita amity hetae vaho vato, zay vaho tsy mahisake, ro tsy maharey, ro tsy mihina, na magnimbo. ²⁹ Fa bakagne nareo ro hipay Yaveh Zagnaharenareo, ka hahisake aze, laha fa mipay aze amity arofonareo iaby vaho amity fagnahinareo iaby nareo. ³⁰ Laha fa ore nareo, naho laha fa avy aminareo ze zaka iaby zay, le hihere amy Yaveh Zagnaharenareo nareo ka hidranjy ty feone agne afara agne. ³¹ Fa zagnahare mandefetre Yaveh Zagnaharenareo; tsy hienga na handrava anareo Re, na hagnaligno ty fagnenkea ty razanareo ze nifantane tamiereo. ³² Fa zao le dineho ty andro lasa, ze talohanareo: manomboke tamity andro ze namboaran'Agnahare ty Ondaty teto antane, naho nanomboke tamity ila ty lagnitse ka zisikeo amity ila ty hafa , dineho laha nisy manahake ze zaka foloay zay, naho feie vao nisy zaka manahake zay mboe rey? ³³ Feie vao le fa nisy vahoake naharey ty feon'Agnahare nirehake bakeo agnivo ty afo, manahake ty nahareizanao, ka velo? ³⁴ Na feie ty Zagnahare le fa nipay ty hindeha ka hangalake firene ho aze bakeo agnivo ty firene hafa, amity alala ty fitsapa, famantara, naho amity fahagaga, vaho aly, amity tagna mahere, vaho sandry bey, naho amity horohoro bey, manahake ty zaka iaby ze natao Yaveh teo amasonareo hoanareo tagne Egypta? ³⁵ Riha ro nanoroa reigne zaka reigne, mba hahaianao fa Yaveh ro Zagnahare, naho tsy misy hafa tsy Re. ³⁶ Bakagne andagnitse ro nampahareizane anao ty feone, mba hahafahane magnanatre anao; teto antane ro nanoroane anao ty afone bey; naharey ty feo bakeo agnivo ty afo riha. ³⁷ Satria tea reo razambeinareo Re, le nifily ty foko ze nisolo iereo, ka ninday anao niakatre i Egypta teo amity fiatrehane, tamity herene bey; ³⁸ mba handroaha ty firene bey vaho mafe noho riha hiala eo agnoloanao, ka hampilitse anao ao, mba hagnomea anao ty tane iereo ho lova, manahake ty androany. ³⁹ Ka haizo naho androany, naho anovo ao ampo zao, fa Yaveh ro Zagnahare agne andagnitse agna ambone vaho eto antane eto ambane; naho tsy misy hafa. ⁴⁰ Hiambe ty liline vaho ty lalane ze handiliako anao androany riha, mba ho soa ty aminao vaho ty foko nao afara, naho mba hahalava ty andro hivelomanao ao amity tane ze namea Yaveh anao zisikezay." ⁴¹ Bakeo le nifily tana telo bakegne amity ilane antignana Jordana ty Mosesy, ⁴² mba hahafaha ty ndaty milay agne amity raike amireo laha sendra mamono ndaty hafa tsikinahy re, kanefa mboe tsy fahavalone tagne aloha tagne. Ty lay agne amity raike amireo tana reo ro mete hahatafavoake velo aze. ⁴³ Bezera tagne antane efetre, tagne amity tane gebo, agne Robenita; Ramota tao Gileada, agne Gadita; naho Golana tagne Basana, agne Manasita zay. ⁴⁴ Zay ro lily ze napetra Mosesy teo agnoloa reo vahoake Irsaely; ⁴⁵ reo ro fagnenkeam-pilongoa , lalana naho lily hafa ze nataliline tamity vahoake Israely laha fa niakatre bakao Egypta iereo, ⁴⁶ laha fa tegne antignana i Jordana iereo, tagne amity baibo nanandrife i Beta-Peora, tagne amity tane i Sihona, mpanjaka ty Amorita, ze nitoboke tao Hesbona, ty rinese i Mosesy vaho ty vahoake Israely laha fa niakatre i Egypta iereo. ⁴⁷ Nalae iereo ho fanagna ty tanene, vaho ty tane i Oga mpanjaka i Basana__reo ro mpanjaka ty Amorita roe, ze tagne andafe i Jordana niantignana. ⁴⁸ Nanomboke bakagne Aroera, teo amoro ty baibo i Arnona, ka zisikagne amity vohitse Siona (na Vohitse Hermona) ze fari-tane zay, ⁴⁹ naho tafilitse tao amizay ty gebo ty baibon-driake Jordana iaby, mianignana mbaeo andafe i Jordana, mbaeo amity Riake Araba, ka zisikagne amity lava-bohitse Pisga.