¹ Naho nimpoly zahay ka nindeha tamity lala mbaeo Basana. Oga, ty mpanjaka i Basana, niavy vaho nanafike anay, re vaho reo vahoakene iaby, mba hialy ao Edrehy. ² Hoe ty Yaveh tamiko ty hoe:' Ko matahotre aze; satria le fa nomeako fandresea teo amine nareo naho le fa nametrake ty vahoakene vaho ty tanene iaby teo ambane fandilianareo raho. Hataonareo amine ze nataonareo tamy Sihona, mpanjaka i Amorita, ze mitoboke agne Hesbona. ³ Ka nomea Yaveh Zagnaharenay anay ty faharesea i Oga mpanjaka i Basana, naho reo vahoakene iaby le natao teo ambane fandiliane. Nivonoenay iaby iereo iaby zisike ty nilania reo vahoakene. ⁴ Nalaenay iaby reo tanane iaby tamize andro zay; tsy nisy tana ze tsy nalaenay tamiereo: tana enempolo__ty faritre Argoba iaby, ty fanjaka i Oga ao Basana. ⁵ Reo tana iaby reo le voaaro soa tamity alala ty manda abo, vavahady, naho hily mafe; lafa-tsy ty vohitse maro ze tsy misy manda. ⁶ Niravaenay vatane iereo, manahake ty nataonay tamy Sihona mpanjaka Hesbona, rinava vatane reo tana iaby__ty lahilahy vaho ty ampela naho ty kolo. ⁷ Fa ty biby hare iaby vaho ty fanagna tao amireo tana reo kea, le nalaenay mba ho fanagnanay. ⁸ Tamize andro zay ro nangalanay ty tane teo ampelatagna reo mpanjaka roe i Amorita, zay tagne andafe i Jordana, miala eo amity baibo i Arona zisikagne amity vohitse Hermona ⁹ (Vohitse Hermona ze natao ty Sidoniana hoe Siriona, naho natao reo Amorita ty hoe Senira) ¹⁰ vaho reo tana ty tane lemake iaby, Gileada iaby, naho ty Basana iaby, ty lala iaby mbaeo Saleka vaho Edrehy, reo tana ty fanjaka i Oga ao Basana." ¹¹ (Tamireo sisa velo tamy Refaita, le i Oga mpanjaka i Basana arere avao sisa ro tavela. Ingo! Ty fandreane le fandrea vy. Feie tsy tane Raba, tane amize nomea reo foko i Amona vao zay? Sive metatre ty halavane naho efatre metatre ty borine, arake ty fomba fimentara ty ndaty.) ¹² Ty tane zay nalaenay ho fanagna tamize andro zay tamy Aroera, zay teo antsisy ty bibo i Arnona, ty antsasa ty tazoa ty tana i Gileada, vaho reo tanane-le fa nomeako reo Rebonita vaho reo Gedita. ¹³ Ty Gileada sisa tavela vaho Basana iaby, ty fanjaka Oga, le nomeako ty antsasa ty foko i Manase: reo faritre Argoba iaby, vaho Basana iaby.(Ze faritane zay avao ro kaihe ty hoe tane i Refaita.) ¹⁴ Jaira, foko Manase, le nangalake ty faritre Argoba iaby zisikamy Gesorita vaho Makatita. Ty faritre iaby, eka fa ndre le i Basana aza, le kinaike tamity agnarane arere ty hoe:Havota-jaira, zisike androany.) ¹⁵ Nomeako i Makira ty Gileada. ¹⁶ Reo Robenita vaho reo Gadita le nomeako ty tane manomboke eo Gileada ka zisikagne amity baibo i Arnona__ty agnivo ty baibo ro faritane ty faritre__naho zisikagne amity renerano Jakoba, ty faritane ty foko i Amona. ¹⁷ Fari-tane ty hafa avao kea ty tane gebo ty baibon-drenerano i Jordana, manomboke eo Kireneta zisikagne amity Riake Araba(zane hoe: ty Rian-tsira) zisikagne amireo lava-bohitse Pisga antignana. ¹⁸ Nandily anareo raho tamize andro zay, nanao hoe:' Yaveh Zagnaharenareo le fa nagnomea anareo ty tane toy mba ho lova; nareo, ze voaoma ho ahy ty aly iaby, le hitam-pialia hisake eo agnoloa reo rahalahinareo, reo ndaty Israely. ¹⁹ Fa reo valinareo, reo anagnareo, vaho reo biby harenareo(Haiko fa mana biby hare maro bey nareo), le hitoboke amireo tanagnareo ze le fa nameako anareo, ²⁰ mandram-pagnomea Yaveh fitofa reo rahalahinareo, manahake ty nataone anareo, mandra-panagna iereo ty tane ze namea Yaveh Zagnaharenareo iareo agne andafe Jordana; bakeo nareo, nareo iaby, hihere ho agne amity fanagnanareo arere ze le fa nameako anareo.' ²¹ Nandily Josoa raho tamize andro zay, nanao hoe:" Reo masonao le fa nahisake iaby ze natao Yaveh tamireo mpanjaka roe reo; Yaveh le hanao hoe zay amireo fanjaka iaby ze hisanareo. ²² Tsy hatahotre iareo nareo, satria Yaveh Zagnaharenareo ro iaze raike hialy ho anareo." ²³ Nangatake tamy Yaveh raho tamize andro zay, nanao hoe: ²⁴ "O ry Tompo Yaveh, nanomboke nanoro ty habeinao vaho ty tagnanao mahere tamity mpanomponao Riha; fa aia agne andagnitse na antane eto ro misy zagnahare afake manao reo asa manahake ty fa nataonao, vaho reo asa mahere manahake zay? ²⁵ Engao raho hitsake, mangatake aminao raho, ka hahisake ty tane soa ty agne andafe Jordana, ty tazoa soa ty tana, naho Libanona avao kea." ²⁶ Fa meloke tamiko Yaveh noho riha; tsy nidranjy ahy re. Hoe Yaveh tamiko:" Ao ho ampe anao toy ko mirehake maro amiko momba ze ndaty zay: ²⁷ miarake agne ambone Pisga naho ampagnenteo agne ahandrefa, agne avaratre, agne antimo, naho agne antignana ty masonao; henteo amity masonao, satria tsy hisake agne Jordana riha. ²⁸ Fa kea, anaro ty Josoa naho ampimafeo vaho hatanjaho re, satria re ro hindeha magnoloa ty ndatine, naho re ro hahavy iereo handova ty tane ze ho hisanao." ²⁹ Laha zao le nijano tao amity baibo andafe i Beti-Peora zahay.