¹ Le nikaike ty Israely iaby ty Mosesy ka nanao tamiereo hoe:" Ry Israely, dranjigno, reo lalana vaho lily ze ho rehafeko ao antsofinareo androany, mba hahafahanareo hianatre vaho hiambe zay. ² Yaveh Zagnaharentika nanao fifagnenkea tamintika tao Horeba. ³ Tsy nanao ze fifagnenkea zay tamireo razambein-tika Yaveh, fa tamintika, le tika iaby velo eto androany. ⁴ Nirehake mivanta taminareo teo amity vohitse bakao agnivo ty afo Yaveh ⁵ (Nitsanga teo agnivonareo vaho Yaveh raho tamize andro zay, mba hagnombara aminareo ty rehane; fa natahotre nareo noho ty afo, ka tsy niakatre tao ambohitse nareo). Le hoe Yaveh ty hoe: ⁶ 'Zaho ro Yaveh Zagnaharenareo, ty ninday anareo hiala tao amity tane Egypta, hiakatre ty tragno fagnandevoza. ⁷ Tsy hana zagnahare hafa eo agnoloako nareo. ⁸ Tsy hanao saren-jaka voasokitre ho anareo nareo na toeran-jaka ze egne amity lagnitse ambone, na ze etoy amity tane etoy ambane, na ze agnate rano etoy ambane. ⁹ Ko mihohoke amireo riha na manompo iereo, fa Izaho, Yaveh Zagnaharenao, le Zagnahare saro-tene. Mamale ty haratia reo razambey raho amity fagnaliloako reo kolo malineke, zisikamity foko fahatelo vaho fahaefatre ze malay ahy, ¹⁰ naho hanoro tsy fivaliham-pagnenkea kea amireo ndaty agnarivone, amireo ze tea ahy vaho miambe reo liliko. ¹¹ Tsy ho ampiasaenao amity tsisy antone ty agnara Yaveh Zagnaharenao, fa Yaveh le handray aze ho meloke amity fampiasa fahatane ty agnarane. ¹² Ambeno ty andro sabata mba hagnamasina aze, arake ze nandilia Yaveh Zagnaharenao anao. ¹³ fa ene andro ro hiasanao vaho hanaovanao ty rarahanao iaby; ¹⁴ fa ty andro fahafito kea le Sabata ho ahy Yaveh Zagnaharenao. Amizay le tsy hiasa riha__na riha, na ty anadahinao, na ty anak'ampelanao, na ty mpanompo lahinao, na ty mpanompo vavenao, na ty agnombenao, na ty borikenao, na ty biby hare, na ty vahiny ze agnate ty vavahadinao. Natao zay mba hitsahara ty mpanomponao lahy vaho ty mpanomponao vave manahake anao. ¹⁵ Le ho tsiaroenao fa mpanompo tagne amity tane Egypta riha, naho Yaveh Zagnaharenao ro nagnakatre anao tagne tamity alala ty tagna mahere vaho famotora ty sandry. Laha zao ro nandilia Yaveh Zagnaharenao anao mba hiambe ty andro Sabata. ¹⁶ Magnaja ty raenao vaho ty renenao, arake ze nandilia Yaveh Zagnaharenao hataonao, le ho ela velo agne amity tane ze namea Yaveh Zagnaharenao ho anao riha, ka le hahasambatre anao anie zay. ¹⁷ Ko mamono ndaty. ¹⁸ ko mitsangatsanga. ¹⁹ Ko mangalatre. ²⁰ ko manao vavolombelo diso amity mpiara-belo aminao. ²¹ ko magniry ty valy ty mpirai-belo aminareo, ko magniry ty tragno ty mpiara-belo aminareo, ty baibone, na ty mpanompo lahine, na ty mpanompo vavene, ty agnombene, na ty borikene, na iaby ze ahy ty mpiara-belo aminareo.' ²² Reo rehake reo ro nambara Yaveh tamity feo abo tamity fiangonanareo iaby tegne amity vohitse bakao agnivo ty afo, ty raho, naho ty iem-pito; le tsy nagnisy rehake fagnampene sase re. Sinorane tamity vato pisake roe zay ka natolone ahy. ²³ Le niseho zao, laha fa naharey ty feo bakao agnivo ty ieke nareo, laha mboe nirehetre ty vohitse, le niharine ahy nareo__reo olobey nareo iaby vaho reo mpitarike ty fokonareo. ²⁴ Hoe nareo hoe:" Ingo, Yaveh Zagnaharentika le fa nanoro tamintika ty hasine vaho ty habeine, naho le fa reintika ty feone bakeo agnivo ty afo; hisantika androany fa laha fa mirehake amity ndaty Yaveh, le afake ty ho velo iereo. ²⁵ Fa nagnino tikau ro tokone ho mate? Satria handrava antika ze afo bey zay; fa laha tsy midranjy ty feo Yaveh Zagnaharentika sase tika, le ho mate. ²⁶ Fa ia ankoatre antika ro eo amity nofo iaby ze le fa naharey ty feo ty Zagnahare velo nirehake bakeo agnivo ty afo ka velo, manahake ze le fa nataontika? ²⁷ Laha ty aminareo, le tokone hindeha vaho hidranjy iaby ze ambara Yaveh Zagnaharentika nareo, hegnere aminay iaby ze safa Yaveh Zagnaharentika aminareo; hidranjy vaho hagnenke zay zahay.' ²⁸ Rey Yaveh ty rehanareo laha nirehake tamiko nareo. Hoe Re tamiko hoe:' Le fa reiko ty reha reo vahoake reo, le ze nirehafene taminao. Soa ze nambara iereo. ²⁹ Hehe, laha mba misy arofo vatane iereo, le hagnaja ahy vaho hiambe zisikagne ty liliko iaby, le hahasoa iereo vaho reo fokone zisikezay zay! ³⁰ Ndao atlilio amiereo hoe:" Miheregna agne antragnonareo." ³¹ Fa laha ty aminao,mitsangana eto agnoloako, le hotalilieko aminao ty lily iaby, ty lalana, vaho reo fotsipeke ze hampianarenao iereo, mba hiambena iereo zay agne amity tane ze hameako iereo ho fanagna.' ³² Hambenanao, laha zao, ze nandilia Yaveh Zagnaharenao anao; mba tsy hivio ho amity ankavane na ho amity ankavia riha. ³³ Hindeha amity lala iaby ze nandilia Yaveh Zagnaharenao anao riha, mba ho velo riha, ka hahasoa anao zay, naho mba hahalava ty andro ivelognanao agne amity tane ze ho fanagnanao.