¹ Laha fa avy aminao eo zao zaka iaby zao, reo fitahia vaho reo ozo ze napetrako teo agnoloanao, naho laha fa mahatiaro iereo riha eo amireo firene hafa iaby ze nindaisa Yaveh Zagnaharenao anao, ² naho laha fa mihere amy Yaveh Zagnaharenao riha ka mienke ty feone, magnorike iaby ze handiliako anao zao__riha vaho reo anagnao__amity arofonao iaby vaho amity fiteanao vaho hana famindra-gnarofo aminao ty Yaveh Zagnaharenao; hihere re naho hamory anao amireo ndaty iaby ze naparita Yaveh Zagnaharenao. ⁴ Laha misy raike amireo ndatinao natao sesetane agne amireo toera lavitre vatane ambane ty lagnitse, agne amizay ro hamoria Yaveh Zagnaharenao anao, naho agne amizay ro hindaisane anao. ⁵ Yaveh Zagnaharenao hinday anao amity tane ze nanagna ty razambeinao, ka lasa fanagnanao ndraike zay; hanao soa anao re naho hampitombo anao mandako ty nataone tamireo razambeinao ⁶ Ho savare Yaveh Zagnaharenao ty arofonao vaho ty arofo reo fokonao, ka ho teavenao amity arofonao iaby vaho amity fagnahinao iaby ty Yaveh Zagnaharenao, mba ho velo riha. ⁷ Yaveh Zagnaharenao le hanao reo ozo iaby reo eo amireo fahavalonao vaho eo amireo malay anao, reo ze nagnia anao. ⁸ Hihere vaho hagnenke ty feo Yaveh riha, naho hanao reo liline iaby ze handiliako anao amizao. ⁹ Hahasoa anao ty Yaveh Zagnaharenao amity asa ty tagnanao iaby, amity voka ty vatanao, vaho amity voka ty biby harenao, naho amity voka ty tanenao, ho fandrosoa; fa Yaveh hofale aminao ndraike noho ty fandrosoa, manahake ty nifaleane tamireo raenao. ¹⁰ Hanao zay re laha hagnenke ty feo Yaveh Zagnaharenao riha, mba hiambe reo liline vaho reo fotsipeke ze voasoratre tao amize boke ty lily zay, laha mihere amy Yaveh Zagnaharenao riha amity arofo vaho fagnahinao iaby. ¹¹ Ta toy lily ze handiliako anao zao toy le tsy mafe loatre aminao, na lavitre loatre ty hanakaranao aze. ¹² Tsy agne andagnitse zay, ka tokone hirehake riha ty hoe:' Ia ro hiakatre agne andagnitse ho antika vaho hinday zay mizotro atoy amintika naho magnomea fahafaha antika haharey zay, mba hanaovantika zay?' ¹³ Tsy agne andafe ty riake zay, ka tokone hirehake riha ty hoe:' Ia ro hitsake ty riake ho antika vaho hinday zay amintika naho hampaharey zay antika, mba hanovantika zay?' ¹⁴ Fa le fa marineke anao ty rehake, ao amity vavanao vaho ty arofonao, mba hahafahanao manao zay. ¹⁵ Ingo, nataoko teo agnoloanao ty fiaigna vaho ty soa, naho ty fate vaho raty te amizao. ¹⁶ Laha magnenke reo lily Yaveh Zagnaharenao riha, ze handiliako anao amizao mba hotea Yaveh Zagnaharenao, hindeha amireo lalane, naho hiambe reo liline, reo fotsipene, vaho reo liline, le ho velo vaho hitombo riha, naho Yaveh Zagnaharenao hitahy anao agne amity tane ze hiliranao ho fanagnanao. ¹⁷ Fa laha mivio lala ty arofonao, naho tsy midranjy riha fa kea voatarike lavitre vaho mihohoke amireo zagnahare hafa naho manompo iereo, ¹⁸ le ataliliko anao amizao fa ho mate riha; tsy hagnalava reo andronareo nareo agne amity tane ze hisanao agne Jordana mba hilira vaho ho fanagna. ¹⁹ Mikaike ty lagnitse vaho tane raho mba ho vavolombelo mandietse anao amizao ze le fa natoboko teo agnoloanao le ty fiaigna vaho ty fate, reo fitahia vaho reo ozo; laha zao filio ty fiaigna mba ho velo, riha vaho reo fokonao. ²⁰ Anovo zay mba ho fiteava Yaveh Zagnaharenao, mba hagnenkea ty feone, naho hipiteha amine. Satria Re ro fiaignanao vaho halava ty andronao; anovo zay mba hiaignanao agne amity tane ze nifanta Yaveh tamireo razambeinao, tamy Abrahama, Isaka, vaho i Jakoba mba homea iereo."