¹ Toa ty rehake ze nandilia Yaveh i Mosesy ho rehafe amity vahoake Israely tagne amity tane Moaba, tegne ty nagnampea ty fagnenkea ze nataone tamy iereo tao Horeba. ² kinay Mosesy ty vahoake Israely iaby ka hoe re tamy iereo:" Le fa hisanareo iaby ze natao Yaveh tamy Farao teo agnoloa ty masonao tagne amity tane Egypta, le tamireo mpanompone iaby, vaho tamity tanene iaby__ ³ reo fijalea bey ze hisa ty masonao, reo famantara, naho reo fahagagam-bey. ⁴ Fa hatramizao le tsy nagnomea arofo hahay, maso hahisaha, sofy hitsanogna ho anareo ty Yaveh. ⁵ Efapolo tao ro nindaisako anareo tagne agnefetre, tsy niala taminareo ty akanjonareo, naho tsy niala teo antombonao ty kapanao. ⁶ Tsy nihina mofo nareo, tsy nino divay na zaka-finome mahamamo hafa, mba hahaianareo fa zaho ro Yaveh Zagnaharenareo. ⁷ Lah avy tamity toera toy nareo, le niakatre mba hialy amintika, ty Sihona, mpanjaka i Hesbona, vaho Oga, mpanjaka i Basana, le lavontika iereo. ⁸ Nalaentika reo tanene naho nomeantika ho lovagnireo Robenita, vaho Gadita, naho ho ahy ty antsasa ty foko i Manase zay. ⁹ Laha zao ambeno reo reha ty fagnenkea toy naho anovo zay, mba ho hoambine amy zaka iaby hataonareo anie nareo. ¹⁰ Mitsanga nareo androany, nareo iaby, eo agnoloa Yaveh Zagnaharenareo; reo beignareo, reo fokonareo, reo olobeignareo, naho reo manan-kasy__reo lahilahy Israely iaby, ¹¹ reo kolo malinegnareo, reo valignareo, naho ty vahiny ze aminao ao amity tobenao, na ze mandily ty hetaenao zisike amize mantsaka ty ranonao. ¹² Avy eto riha mba hilitre amity fagnenkea Yaveh Zagnaharenao vaho amity fifanta ze hatao Yaveh Zagnaharenao aminao agne, ¹³ ka hahavy anao ho vahoakene re, naho re ho Zagnaharenao, arake ze nirehafene taminao, tamy Abrahama, tamy Isaka, naho tamy Jakoba. ¹⁴ Fa tsy aminareo avao ro hanaovako ze fagnenkea vaho fifanta zao__ ¹⁵ le iaby ze mitsanga eo agnoloa Yaveh Zagnaharentika miarake amintika eto androany__fa amireo ze tsy miarake amintika eto androany avao kea. ¹⁶ Haignareo ty fomba niaignantika tagne amity tane Egypta, naho ty fomba namaki-vakiantika reo firene nandriognanareo. ¹⁷ Le fa hisanareo reo zaka raty gnierero: le reo sampe hetae vaho reo sampe vatone, volafoty vaho volamena, ty teo amiereo. ¹⁸ Ao tsy hisy aminareo eo na lahilahy, na ampela, na longo, na foko ze miotake midiso amy Yaveh Zagnaharentika ty arofone androany, ka hindeha hanompo ty zagnahare reo firene reo. Ao tsy hisy hetae mamokatre zaka-mafaitre vaho zaka-mamono aminareo eo. ¹⁹ Ka laha reign'izay ndaty zay reo reha ty fagnozogna toy, le hitso-drano ty vatane ao agnarofone re ka hanao ty hoe:' Hiada raho, na le mindeha arake ty rengerenge ty arofoko aza.' Izay le haharava ty le naho ty maike. ²⁰ Naho tsy hagnenga aze ty Yaveh, fa le, hirehetre amize lahilahy zay ty helogn'Yaveh vaho ty fasiane, naho ho avy amine ty ozo iaby ze voasoratre agnate ty boke toy, naho ho fafa Yaveh tsy ho eo ambane lagnitse ty agnarane. ²¹ Naho hatoka Yaveh ho egne ambaly ty foko Israely iaby amity loza re, arake ty fagnozogna iaby amity fagnenkea ze voasoratre agnate ty boke ty lily toy. ²² Ty foko hoavy, le reo anake ze hisolo anareo, naho ty mbahiny ze avy amity tane lavitre, le hirehake laha fa hisagniereo ty arete-mandany amity tane toy vaho reo arete ze nampaharare Yaveh zay__ ²³ Naho laha fa hisagniereo fa avy solifara vaho sira mirehetre ty tane iaby, ndre tsy namendraha na ino ino na namoha voa, ze tsy misy zaka mitiry, manahake ty naharava i Sadoma vaho Gomoro, Adma vaho Jeboima, zay niravae Yaveh tamity havignirane vaho helone__ ²⁴ le hiara-hirehake amity firene hafa iaby iereo ty hoe:" Nagnino ro nanao zao tamity tane toy Yaveh? Ino ro ty dika zao fireheta heloke bey zao?' ²⁵ Naho hirehake reo vahoake ty hoe:" Zao ro ie satria tsy nagnorike ty fagnenkea Yaveh, Zagnahare reo razambeine iereo, ze nataone tamiereo tamity nindaisane iereo niakatre ty tane Egypta, ²⁶ naho satria iereo nindeha nanompo zagnahare hafa vaho nihohoke tamizay iereo, le reo zagnahare ze tsy haign'iereo naho tsy nomeane ho ahy iereo kea. ²⁷ Laha zao ty helon'Agnahare le narehetre tamity tane toy, ka niavy tamine eo reo ozo iaby ze voasoratre tamity boke toy. ²⁸ Naho nilanie Yaveh tamity heloke, tamity havignira, naho tamity hasosora bey, tsy ho amity tanene iereo, naho nariane tagne amity tane hafa, zisike androany." ²⁹ Reo zaka mihaja le ahy Yaveh Zagnaharentika arere avao; fa ty zaka atalily kea le natao ho antika vaho reo fokontika zisikezay, mba hiafahantika manao ty rehake iaby ty lily toy.