¹ Mosesy nindeha naho nanao reo rehake reo tamy Israely iaby. ² Hoe re tamiereo:" Roapolo amby zato tao raho amizao; tsy afake mindeha miakatre vaho militse sase raho; hoe ty Yaveh tamiko hoe:' Tsy hitsake agne Jordana riha.' ³ Yaveh Zagnaharenao, le hindeha magnoloa anao; hamoteke reo firene eo agnoloanao re, ka hoazonao reigne. Josoa, hindeha eo agnoloanao re, arake ze nirehafe Yaveh. ⁴ Yaveh le hanao amiereo manahake ze nataona tamy Sihona vaho Oga, mpanjaka reo Amorita, vaho amireo tane iereo, ze sinimbane. ⁵ Yaveh le hagnomea faharesea iereo laha fa mialy nareo, ka hanao iaby ze nandiliako anareo amiereo nareo. ⁶ Mimafea naho mahereza soa, ko matahotre, naho ko lasa-matahotre iereo; satria Yaveh Zagnaharenao, Re ze mindeha miarake aminao; tsy hagnary anao na kea hahafoe anao re." ⁷ Nikaike Josoa ty Mosesy naho nirehake tamine teo amaso Israely iaby hoe:" Mimafea naho mahereza soa, satria hindeha hiarake amireo vahoake reo agne amity tane ze nampagnategna Yaveh tamity razagniereo fa homeane iereo riha; hahavy iereo handova zay riha. ⁸ Yaveh, Re ro hindeha eo agnoloanao; hiarake aminao Re; tsy hagnary anao na hahafoe anao Re; ko matahotre, ko kivy." ⁹ Nanoratre ze lily zay ty Mosesy naho nagnomea zay reo mpisoro, reo anagn'i Levy, ze ninday ty tomabile ty fagnenkea Yaveh; nagnomea dika mitovy amizay reo olobey Israely iaby avao kea re. ¹⁰ Nandily iereo Mosesy naho nanao ty hoe:" Isake ty fara ty fito tao, amity andro voamare amity famoagna reo tsosa, zisike ty fifalea ty fialofa, ¹¹ laha fa avy hiboake eo agnoloa Yaveh Zagnaharenao eo amity toera ze filiene ho fitoboha ty masy ty Israely iaby, le hamaky io lala ao magnoloa Israely iaby eo antsofy iereo riha. ¹² Avorio ty ndaty, ty lahilahy, ty ampela, ty kolo, naho ty vahininao ze ao amity vavahady ty tana nao, mba ho afake haharey vaho hianatre iereo, naho mba ho afake hagnomea hasy Yaveh Zagnaharenareo vaho hiambe ty rehake iaby amio lily io iereo. ¹³ Anovo zay mba ho afake haharey vaho hianatre hagnomea hasy Yaveh Zagnaharenareo, ty ana iereo, ze tsy mahay, laha mboe mitoboke ao amity tane ze hisanareo ho agne Jordana ho fanagna nareo nareo. ¹⁴ Hoe ty Yaveh tamy Mosesy hoe:" Ingo, hoavy ty andro ze tsy maintsy hifatezanao; kaiho Josoa naho manolora-bata ao amity tragno figaogna, mba hahafahako magnomea baiko aze." Le nindeha Mosesy vaho Josoa naho nanolotre ty vatagniereo tao amity tragno figaogna. ¹⁵ Niseho tao amity tragno tamity ambe raho Yaveh; ty amben-draho nitsanga teo amity varavara ty tragno. ¹⁶ Hoe ty Yaveh tamy Mosesy:" Ingo, hiarake hiroro amireo razanao riha; io vahoake eo le hitsanga ka hanao manahake ty mpitsangatsanga magnorike zagnahare hafa ze eo amiereo ao amity tane ze hindena iereo. Hahafoe ahy iereo naho handrava ty fagnenkeako ze nataoko tamiereo. ¹⁷ Naho, amio andro o, le hirehetre amiereo ty heloko naho hienga iereo raho. Hagnaja ty vatako amiereo raho ka ho rava iereo. Arete maro vaho koronta ro ho hisa iereo mba hirehake hoe izao iereo amio andro o ty hoe:' Tsy avy eto agnivontika vao reo arete reo satria tsy eto agnivontika ty Zagnaharentika?' ¹⁸ Hagnaja ty vatako amiereo vatane raho amio andro o noho ty raty iaby ze natao iereo, satria nitolike tagne amireo zagnaharen-kafa iereo. ¹⁹ Amizao naho le sorato ho ahy ty vatanareo ty antsa toy naho ampianaro ty vahoake Israely zay. Anovo ao ambava iereo zay, ka mete ho fijoroa vavolombelo ho ahy amireo vahoake Israely zay antsa zay. ²⁰ Satria laha fa hinday iereo agne amity tane ze nampagnategnako homea reo razambeiereo raho, tane ze todran-dronono vaho tantele, naho laha fa bake nihina ka voky vaho afa-po iereo, le hitolike agne amireo zagnahare hafa vaho hanompo iereo naho hanao tsinontsino ahy vaho handrava ty fagnenkeako. ²¹ Laha fa avy eo agnivo ty vahoake eo ty raty vaho ty koronta maro, le ho vavolombelo eo agnoloa iereo i antsa ao(satria tsy ho haligno eo ambava reo foko iereo zay). Satria haiko ty tetekasa ze forogne iereo amizao, na le nienteko tagne amity tane ze nampagnategnako iereo aza iereo." ²² Laha zao le nanoratre io antsa ao tamio andro io avao ty Mosesy naho nampianatre zay reo vahoake Israely. ²³ Nagnomea lily i Josoa anadahign'i Nona Yaveh nanao ty hoe:" Mimafea naho mahereza soa; satria riha ro hinday ty vahoake Israely ao amity tane ze namapagnategnako iereo, naho hiarake aminao raho." ²⁴ Zao ro niseho laha fa nahavita nanoratre reo reha ty lily tao agnate boke Mosesy, ²⁵ fa handily reo Levita ze minday ty tomabile ty fagnenkea Yaveh re, manao ty hoe: ²⁶ "Raeso ty boke ty lily toy naho anovo eo agnila ty tomabile fagnenkea Yaveh Zagnaharenareo, mba ho eo manahake ty vavolombelo mandietse anao zay. ²⁷ Satria haiko ty vandegnireo vaho ty hamafe loha reo; ingo, laha mboe velo miarake aminareo raho androany, le mpanvade mandietse Yaveh nareo; vaho maike fa laha mate raho? ²⁸ Avorio amiko eto reo olobey ty fokonareo iaby, vaho reo manan-kasy, mba hahafahako mirehake reo rehake reo eo antsofy iereo vaho mikaike ty lagnitse vaho ty tane ho vavolombelo mandietse iereo. ²⁹ Satria haiko fa afara ty hifatezako nareo le hamitake ty vatanareo vatane ka hiala amity lala ze nandiliako anareo; hoavy aminareo ty arete amity andro magnarake zay. Hiseho zay satria hanao ze raty eo amaso Yaveh nareo, ze hahavy aze ho meloke amireo asa ty tagnanareo." ³⁰ Le nirehafe Mosesy teo antsofy reo vahoake Israely iaby ty togno ze antsa zay zisike fitamperane.