¹ Nisy kere zisike ty telo tao nifanese tamity andro Davida, naho nipay ty vata Yaveh ty Davida. Ka hoe ty Yaveh hoe:" Eo aminareo o kere eo noho i Saoly vaho ty fokone mpamono ndaty, satria namono reo Gibeonita re." ² Naho reo Gibeonita le tsy bakamity vahoake Israely; fa bakamity ila reo Amorita iereo. Le fa nifanta tsy hamono iereo ty vahoake Israely, feie niezake hamono iereo tamity sitram-pone avao ty Saoly ho ahy reo vahoake Israely vaho Joda. ³ Laha zao ty Davida mpanjaka le nikaike niarake reo Gibeonita naho nanao tamiereo ty hoe:" Ino ro tokone hataoko ho anareo? Akore ro hahafahako manao fagnavota, mba hagnomezanareo tso-drano reo vahoake Yaveh, ze mandova ty hasoane vaho reo fampagnantegnane?" ⁴ Namale iereo Gibeonita ty hoe:" Tsy rehake volafoty na volamena eo aminay vaho Saoly na ty fokone zay. Manahake zay kea ro tsy hamonoanay ndaty ao Israely." Le namale ty Davida hoe:" Ino ro rehafenareo fa tokone hataoko ho anareo?" ⁵ Namale ty mpanjaka iereo ty hoe:" Ty lahilahy ze niezake hamono anay iaby, ty nanao hevetre handiera anay, mba ho poteke zahay zao naho tsy hana toera ao amireo sisin-tane Israely__ ⁶ ao hisy lahilahy fito bakamity fokone hatolotre anay, naho hamonje iereo eo agnoloa Yaveh agne Gibea Saoly, ty raike finily Yaveh zahay." Le hoe ty mpanjaka hoe:" Hameako anareo iereo." ⁷ Fa nandefetre tamy Mefiboseta anadahy Jonatana anadahy i Saoly ty mpanjaka, noho ty fifanta Yaveh teo amiereo, teo amy Davida vaho Jonatana, anadahy Saoly. ⁸ Kanefa nalae ty mpanjaka reo anake roe lahy i Rizpa anakampela Aia, anane bakamy Saoly__Armony vaho Mefiboseta ro agnara reo roe lahy; naho nalae Davida avao kea reo anake dime lahy i Mikala anakampela Saoly, ty bakamy Adriela anadahy Barzilay ty Meholatita. ⁹ Natolone teo antagna reo Gibeonita iereo. Nahanto iereo tagne ambohitse nagnoloa Yaveh iereo, naho niara-mate ie fito. Tamity androm-pararano ro namonoa iereo, zisike ty andro voalohane tamity nanomboha ty fihaza ty vare hordea. ¹⁰ Bakeo ty Rizpa, anakampela Aia, nangalake lamba fandala naho namelatre zay ho ahy ty vatane teo amity vohitse agnila reo vata-manintsy, zisikamity nanomboha ty fihaza ka zisikamity niavia ty ora teo amiereo bakagne andagnitse. Tsy nengane hagnoronta reo raza ty voro ty lagnitse ty atoandro na reo bibin'ala ty hale. ¹¹ Natalily tamy Davida ze natao Rizpa, anakampela Aia, ty valy ndevo Saoly. ¹² Laha zao le nindeha ty Davida naho nangalake ty taola Saoly vaho ty taola i Jonatana anadahine teo amireo lahilahy Jabesi-gileada, ze nagalatre reo tao ankianja ty ndaty iaby tagne Beti-sana, tagne amize nagnatogna reo Filistina iereo, laha fa baka namono i Saoly tao Gilboa iereo. ¹³ Nalae Davida hiala tao ty taola Saoly vaho ty taola Jonatana anadahine, naho namory ty taola reo lahilahy fito ze nahanto avao kea iereo. ¹⁴ Naleve iereo tagne amity tana Benjamina tagne Zela ty taola Saoly vaho Jonatana anane, tao amity kibory Kisy raene. Natao iereo iaby ze nililie ty mpanjaka. Tafara zay le vinalen'Agnahare ty vavake iereo ho ahy ty tane. ¹⁵ Bakeo reo Filistina le nindeha nialy tamy Israely ndraike. Laha zao le nizotro niarake tamity tafine ty Davida naho nialy nandietre reo Filistina. Rerake ty aly Davida. ¹⁶ Jisbibenoba, foko ty Refaita, ty ninday telonjato sekele ty lefone varahy, naho ty nana meso zaka-fialia vaovao, le nikasa hamono Davida. ¹⁷ Kanefa Abisay ana i Zeroia nagnavotre i Davida, nanafike ty Filistina, naho namono aze. Bakeo reo lahilahy Davida nifanta tamine, nanao ty hoe:" Tsy tokone hindeha hialy hiarake aminay sase riha, mba tsy hamonoanao ty jiro Israely." ¹⁸ Naho tafara io le nisy aly niarake tamireo Filistina ndraike tao Goba, laha fa vinono i Sibeka ty Hosatita i Safa, ty raike tamity foko reo Refaita. ¹⁹ Le nisy aly ndraike tamireo Filistina tao Goba, ty namonoa i Elanana anadahy Jare Betlehemita i Goliata ty Gatita, ze hoe ty voly teno ty mpagneno ty lefone. ²⁰ Naho tamity aly hafa tao Gata le nisy lahilahy foloay nana rambo-tagna ene isake ty tagnane naho rambo-tomboke ene isake ty tomboke, efatre amby roapolo ty isane. Bakamity foko Refaita avao kea re. ²¹ Laha fa nagnafake Israely re, le vinono Jonatana anadahy Simea, rahalahy Davida. ²² Reo ro foko Refaita tao Gata, naho vinono ty tagna Davida vaho ty tagna reo miaramilane re.