¹ Niantsa ho ahy Yaveh reo rehake amity antsa toy tamity andro ze nagnavota Yaveh aze teo antagna reo fahavalone iaby, vaho teo antagna Saoly ty Davida. ² Nivavake re hoe:" Yaveh ro vatolampiko, fiaro mafe ho ahy, ty raike ze namonje ahy. ³ Zagnahare ro vatolampiko. Mialoke eo amine raho. Ire ro fiaroko, ty trifa ty famonjea ahy, fiaro mafe ho ahy, vaho fialofako, ty raike ze magnavotre ahy amity rehareha. ⁴ Hikaike Yaveh, ze mate ty ho lazae raho, ka ho avotre amireo fahavaloko raho. ⁵ Fa nagnodidy ahy reo aloke ty fate, nanafotre ahy reo rano mily ty harava. ⁶ Nagnodidy ahy reo taly ty fiaigna-tsy hisake; namandrike ahy reo fandrike ty fate. ⁷ Tamity fijaleako ro nikaihako Yaveh; nikaike an'Agnahare raho; naharey ty feoko bakao antempoline Re, naho niavy teo antsofine ty kai-kaiko. ⁸ Le nita vaho nihovitre ty tane. Nihovitre vaho voahozongozo ty fioregna ty lagnitre, satria meloke ty Zagnahare. ⁹ Niakatre bakamity vavorone ty deboke, naho afo milebaleba ro niakatre bakamity vavane. Voa rehe zay ty vaen'afo. ¹⁰ Namoha ty lagnitre Re ka nizotro, naho ty iem-pito tao ambane tombone. ¹¹ Nitikitre Kerobima Re ka nitily. Hisake tegne agnela ty tioke re. ¹² Nataone ho tragno nagnodidy Aze ty ieke, namory rahon'ora mateve tegne amireo lagnitse re. ¹³ Bakamity helatre teo agnoloane ro nipoha ty vaen'afo. ¹⁴ Yaveh nampihotrokotroke bakagne andagnitse. Nikorake mafe ty agnabo vatane. ¹⁵ Nandefa folese Re ka nagnele reo fahavalone__nandefa helam-pahazava ka nizara iereo. ¹⁶ Bakeo le niseho ty fantson-drano; niboake tamity korak'aly Yaveh ty fagnambanea zao iaby zao, tamity fipoa ty fofognay ty vavorone. ¹⁷ Nizotro bakagne ambone Re; nita mafe ahy Re! Naninto ahy tamity rano magnoja Re. ¹⁸ Namonje ahy tamity fahavaloko mafe Re, tamireo ze nalay ahy, satria vatane nimafe iereo tamiko. ¹⁹ Niavy nandietre ahy iereo tamity androm-pijaleako, kanefa Yaveh ro mpikala ahy. ²⁰ Nagnajatre ahy ho agne amity toera mivelatre avao kea Re. Namonje ahy Re satria fale tamiko. ²¹ Le fa namale soa ahy tamity meta ty hamareako Yaveh; le fa nagnere ahy tamity lalane tamity meta ty falio ty tagnako Re. ²² Fa le fa ninday reo lala Yaveh raho naho tsy mba nanao ty raty tamity fiala tamity Zagnahareko. ²³ Satria reo liline mare iaby le fa teo agnoloako; laha ty amireo liline kea, le tsy nivio tamirey raho. ²⁴ Le fa tsy nanan-tsiny teo agnoloane avao kea raho, naho niambe ty vatako tsy hanonta raho. ²⁵ Laha zao le nahere Yaveh tamity lalane tamity meta ty falioko teo amasone. ²⁶ Ho ahy ty raike ze matoky, manoro ty vatanao ho matoky Riha; ho ahy ty ndaty ze tsy manan-tsiny, le manoro ty vatanao ho tsy manan-tsiny Riha. ²⁷ Amity malio le manoro ty vatanao ho malio Riha, fa mivalike amireo mpiotakotake Riha. ²⁸ Magnavotre reo ndaty ore riha, nefa reo masonao le mandietre ty mpirehareha, naho ambanenao iereo. ²⁹ Fa Riha ro faniloko, ry Yaveh. Magnazava ty faieko Yaveh. ³⁰ Fa noho Riha le afake milay mihoatre ty fita raho; noho ty Zagnahareko le afake mandika rindry raho. ³¹ Laha ty amin'Agnahare, lefe ty lalane. Malio ty safa Yaveh. Re le fiaro ho ahy reo iaby ze mialoke amine eo. ³² Fa ia ro Zagnahare laha-tsy Yaveh, naho ia ro vatolampy laha tsy ty Zagnaharentika? ³³ Zagnahare ro fialofako, naho mitarike ty ndaty tsy manan-tsiny amity lalane Re. ³⁴ Mampalaky ty tomboko manahake ty diera Re naho mametrake ahy egne amity tazoa agnabo. ³⁵ Magnanatre ty tagnako amity aly Re, vaho ty sandriko hamoretre folese varahy. ³⁶ Le fa nagnomea ahy ty fialofa ty famonjeanao Riha, naho zotonao ro nanao ahy ho foloay. ³⁷ Le fa nanao toera bey ho ahy ty tomboko teo ambaneko riha, ka tsy nipolatitre ty tomboko. ³⁸ Nagnia reo fahavaloko raho ka namoteke iereo. Tsy nihere raho mandram-pirava iereo. ³⁹ Nandrava iereo vaho namote-poteke iereo raho; ka tsy afake nitsanga iereo. Lavo tao ambane tomboko iereo. ⁴⁰ Nametrake here tao amiko hoe ty santira ho amity aly Riha; nametrake reo ze nitsanga handietre ahy teo ambaneko Riha. ⁴¹ Nagnomea ahy ty hato ty fahavaloko riha; nandrava reo ze nalay ahy raho. ⁴² Nipay vonje iereo, feie tsy nisy nagnavotre iereo; nikaike mafe Yaveh iereo, feie tsy namale iereo Re. ⁴³ Nagnisy iereo ho lasa kele hoe ty deboke amity tane raho, tinoro-toroko hoe ty fotake egne amity lala iereo. ⁴⁴ Lefa namonje ahy tamity fifandiera reo vahoakeko avao kea Riha. Le fa nitananao ho loha reo firene raho. Ty vahoake ze tsy haiko le manompo ahy. ⁴⁵ Sinere hihohoke tamiko reo vahiny. Vatane vaho naharey ty miomba ahy iereo, le nagnenke ahy. ⁴⁶ Reo vahiny le niakatre ampitahora tao amity fiaro mafe iereo. ⁴⁷ Velo Yaveh! Ho lazae anie ty vatolampiko. Hambone anie ty Zagnahare, ty vatolampy ty famonjea ahy. ⁴⁸ Zay ro Zagnahare ze mandefe valea ho ahy, ty raike ze mampiambane vahoake maro eo ambaneko. ⁴⁹ Magnafake ahy amireo fahavaloko Re. Nagnakatre ahy ho ambone reo ze nitsanga handietre ahy vatane Re. Mamonje ahy amireo lahilahy mahere asa Riha. ⁵⁰ Laha zao le hanolotre fisaora ho anao, eo amireo firene raho, ry Yaveh; hiantsa antsa ho ahy ty agnaranao raho. ⁵¹ Zagnahare magnomea fahareseam-bey ho ahy ty mpanjakane, naho manoro ty tsy fivaliham-pagnenkeane amity voahosone Re, ho ahy Davida vaho ho ahy ty fokone zisikezay."