¹ Le nirehake tamy Absaloma ty ahitofela hoe:" Engao raho hifily lahilahy roa arivo vaho ray ale, naho hitsanga vaho hagnia Davida raho androany hale. ² Hoavy amine eo raho laha mboe rerake vaho maleme ey re naho hanampoke aze amin-tahotre raho. Hilay ty vahoake ze miarake amine, naho ty mpanjaka avao ro ho tafiheko. ³ Ho enteko mihere aminao iaby ty ndaty iaby, manahake ty ampela akare avy eo amity valine, naho ty ndaty iaby le hilamy eo ambane fahefanao." ⁴ Ze nirehafe Ahitofela le nenkene i Absaloma vaho reo olobey Israely iaby. ⁵ Le hoe Absaloma hoe:" Kaiho avao kea ty Hosay Arkita amizao, naho ao tika haharey ze rehane." ⁶ Laha fa niavy teo amy absaloma ty Hosay, le hinaza Absaloma tamine ze nirehafe Ahitofela naho nagnontane i Hosay re hoe:" Tokone hanao ze nirehafe Ahitofela vao tika? Laha aha, ambarao anay ze torohevetre." ⁷ Le nirehake tamy Absaloma ty Hosay hoe:" Tsy soa ty torohevetre ze nomea i Ahitofela tamitoy." ⁸ Le nagnampe i Hosay hoe:" Hainao fa mpialy mahere ty raenao vaho reo lahilahine, naho masiake iereo, naho manahake ty bera robake anake agne ambaibo. Lahilahy mpialy ty raenao; tsy hiroro miarake amity tafike re androany hale. ⁹ Ingo, mete mihaja agne andavake na agne antoeran-kafa re amizao. Laha fa misy mate eo amboaloha ty fanafiha ty lahilahinao ilane, na ia ia maharey zay le hirehake hoe:' Misy famonoa eo amireo miaramila ze magnorike i Absaloma.' ¹⁰ Ka na le reo miaramila bey herem-po vatane aza, ze manahake ty arofo ty liona ty arofo iereo, le hatahotre satria hay ty Israely iaby fa lahilahy mahere ty raenao, naho reo lahilahy miarake amine le tena matanjake. ¹¹ Laha zao le manoro hevetre anao raho fa tokone havory miarake eto aminao ty Israely iaby, manonmboke agne Dana ka hatragne Beri-sheba, ty maro isake manahake ty faseke eo amoron-draiake , naho ty vatanao vatane ro hindeha hialy. ¹² Bakeo le ho avy eo amine zahay na aia aia mete hahisaha aze, naho hanaro aze manahake ty mika mitonta amity tane zahay. Tsy misy enganao ho velo na le raike amireo ndatine, na re vatane aza. ¹³ Laha miala agne amity tana raike re, le hinday taly ho agne amize tana zay ty Israely iaby ka ho tarihenay ho agne andrenerano zay, zisike ty tsy hisy na le vato kele raike aza hisake ao." ¹⁴ Le hoe ty Absaloma vaho reo lahilahy Israely hoe:" Ty toroheve Hosay Arkita le soa vatane noho ty ahy Ahitofela." Yaveh le nampisy fandiera ty torohevetre soa i Ahitofela mba hindaisa loza eo amy Absaloma. ¹⁵ Le hoe ty Hosay tamy Zadoka vaho tamy Abiatara mpisoro hoe:" Ahitofela nanoro hevetre i absaloma vaho reo olobey Israely tamity fomba manahake zay, nefa zaho mana hevetre hafa. ¹⁶ Ka amizao are, mindehana malaky naho taono agne amy Davida; rehafo re hoe:' Ko mitobe ao amireo fita Araba androany hale, fa mitsaha amity fomba iaby, laha tsy zay le ho voatele miarake amireo vahoake iaby ze miarake amine ty mpanjaka." ¹⁷ Naho Jonatana vaho Ahimaza nitoboke teo amity loharano i En-rogela. Nisy mpanompo vave natao hindeha vaho hampahay iereo ty amize tokone ho hay iereo, fa tsy natahora ho hisake ty filira iereo ao antana. Laha fa avy ty talily, le nindeha vaho nirehake i Davida Mpanjaka iereo. ¹⁸ Nefa nisy ajalahy nahisake iereo tamio nadro o ka nirehake tamy Absaloma. Le niakatre malaky ty Jonatana vaho Ahimaza naho nimbaeo antragno ty lahilahy raike tao Bahorima, ty nana lavan-drano teo antokotanene, tao ro nizotroa iereo. ¹⁹ Nangalake fanakofa ty lava-drano ty valin-dralehilahy naho nanako zay tamity vava ty lava-drano, naho nanjara vare teo amizay, ka le tsy nisy nahay fa tao amity lava-drano ty Jonatana vaho Ahimaza. ²⁰ Niavy tao amin-drapelane tao antragno reo lahilahy Absaloma naho nanao hoe:" Aia ty Ahimaza vaho Jonatana?" Hoe rampela tamiereo hoe:" Le fa nitsake ty rano iereo." Ka laha fa baka nanente ty magnodidy iereo ka tsy nahisake iereo, le nihere tagne Jerosalema. ²¹ Naho laha fa lasa iereo le niakatre bakao andavadrano Jonatana vaho Ahimaza. Nindeha nitalily tagne amy Davida Mpanjaka iereo; hoe iereo tamine hoe:' Mitsangana naho mitsaha malaky ty rano satria Ahitofela le fa nagnomea torohevetre hoe zao vaho hoe zao momba anao." ²² Le nitsanga Davida vaho ty ndaty iaby ze niarake tamine, ka nitsake agne Jordana iereo. Aloha ty andro maray le tsy nisy tsy tafita agne Jordana iereo. ²³ Laha fa hisa i Ahitofela fa tsy norihe ty torohevene, le nagnisy lasele ty borikene re naho lasa. Noly tagne antanane re, nandamy reo rarahane, naho nagnato-bata. Tamize fomba zay ro nahafate aze naho naleve tagne amity kiborin-draene re. ²⁴ Bakeo Davida le niavy tagne Mahanaima. Laha ty amy Absaloma, le nitsake i Jordana re, re vaho reo lahilahy Israely iaby niarake tamine. ²⁵ Naho Absaloma nametrake i Amasa fa tsy Joaba hifehe ty tafike. Amasa le anadahy Jitra Ismaelita, ty niroro niarake tamy Abigalia, ty anak'ampela i Nahasa naho rahavave Zeroia, rene Joaba. ²⁶ Naho Israely vaho Absaloma le nitobe tao amity tane Gileada. ²⁷ Naho laha fa tao Mahanaima ty Davida, i Soby anadahy Nahasa bakao Raba ao amireo Amonita, vaho Makira anadahy Amiela bakao Lo-debara, naho Barzilay Gileadita bakao Rogelima, ²⁸ le ninday fandrea vaho bodofoty, finga vaho velagne, vaho vare, kobam-bare hordea, lango, tsaramaso, vagnemba, ²⁹ tantale, dibera, agnondry, naho ronono mandre, mba hahafa i Davida vaho reo vahoake niarake tamine mihina. Hoe reo lahilahy reo hoe:" kere, rokake, naho maran-drano agne agnefetre ty vahoake."