¹ Laha fa niala tsy lavitse ty fara ty vohitse Davida, le niavy nanalaka aze ty Ziba mpanompo i Mefiboseta niarake tamireo ampondra roe misy lasele; iereo le ninday mofo roanjato, tsempagnam-boaloboke zato vaho fehezan'aviavy zato, naho divay raike tavoara. ² Nirehake tamy Ziba ty mpanjaka hoe:" Nagnino ro ninday reo zaka reo riha?" Namale Ziba hoe:" Ty ampondra le natao ho hitikira ty foko ty mpanjaka, ty mofo vaho ty mofo mamy misy aviavy le natao ho hane reo ndatinao, naho ty divay le natao ho nome reo ze torova tagne antane maike." ³ Hoy ty mpanjaka hoe:" Aia naho ty zafe lahy ty tomponao?" Namale ty mpanjaka ty Ziba:" Ingo, nijano tagne Jerosalema re, fa hoe re ty hoe:' Amizao le ho ahere ty foko Israely amiko ty fanjaka ty raeko." ⁴ Le nirehake tamy Ziba ty mpanjaka hoe:" Ingo, ze ahy Mefiboseta iaby le lasanao amizao." Namale Ziba ho:" Miondreke ampagnentre-bata eo agnoloanao raho, ry mpanjaka, tompoko. Ao hahisake saotre eo amasonao raho." ⁵ Laha fa namonje i Bahorima ty Davida Mpanjaka, le nisy lahilahy bakamity foko Saoly niakatre bakagne, antao ty hoe: Simey ana i Gera. Niakatre nagnozo rehake ampindehana re. ⁶ Tinorane vato ty Davida vaho reo manam-pahefa ty mpanjaka iaby, na le teo aza reo tafike vaho reo mpiambe ze teo ankavia vaho havana ty mpanjaka. ⁷ Nikaike fagnozogna ty Simey:" Mindehana agne, mindehana miakatre eto, riha aze mpanao raty, riha aze ndaty mpampipo-dio! ⁸ Vinale Yaveh taminareo iaby ty lio ty foko Saoly ze naponareo, tamity toera ze nanjakanareo. Nomea Yaveh teo antagna i Absaloma ananao ty fanjaka. Niavy amity harava riha satria ndaty ty lio." ⁹ Le hoe ty Abisay anadahy Zeroia, tamity mpanjaka hoe:" Nagnino o amboa ao ro magnozo ty mpanjaka tompoko? Engao rie raho hindeha naho hanampake ty lohane." ¹⁰ Fa nirehake ty mpanjaka hoe:" Mpino vao raho vaho riha, ry anadahy Zeroia? Magnozo ahy asa re satria nirehake tamine ty Yaveh hoe:' Ozogno ty Davida.' Ia zane ro afake hirehake amine hoe:' Nagnino riha ro magnozo ty mpanjaka?"' ¹¹ Ka hoe ty Davida tamy Abisay vaho ty mpanompone iaby hoe:" Ingo, ty anadahiko, ze naterako, le te-hifofo ty fiaiko. Ka sandrake fa ty fagniria ty Benjamina toy ty amity haravako? Engao re naho engao re hagnozo, satria nibaiko aze hanao zay ty Yaveh. ¹² Hagnente ty fijalea mahazo ahy asa ty Yaveh, naho hamale soa ahy noho ty ozo nataone tamiko amizao." ¹³ Ka nindeha tagne andala ty Davida vaho ty ndatine, naho Simey kea nagnorike iereo bakegne andafe tegne ambone ty tazoa, nagnozo vaho nagnisy deboke naho nitora-bato aze laha nindeha re. ¹⁴ Bakeo le rokake ty mpanjaka vaho ty ndaty iaby ze niarake tamine, ka nangalake haherake re laha fa nijano iereo ty haleke. ¹⁵ Naho Absaloma vaho ty ndaty Israely iaby ze niarake tamine, le niavy tao Jerosalema, naho niarake tamine ty Ahitofela. ¹⁶ Naho laha fa niavy teo amy Absaloma, ty Hosay Arkita, nama i Davida, le nirehake tamy Absaloma ty Hosay hoe:" Ho ela valo anie ty mpanjaka! Ho ela valo anie ty mpanjaka!" ¹⁷ Hoe ty Absaloma tamy Hosay hoe:" Izaho vao ro atokisanao atoronao amity namanao? Nagnino riha ro tsy nindeha niarake tamine?" ¹⁸ Hoe ty Hoasy tamy Absaloma hoe:" Aha! Fa ty raike ze finily Yaveh vaho ty vahoake toy naho ty ndaty Israely iaby kea, ro lahilahy ze hombako, naho hitoboke eo amine raho. ¹⁹ Ia avao kea, ro ndaty tokone ho tompoeko? Tsy tokone hanompo eo amity fagnatreha ty anadahine vao raho? Manahake ty nanompoako teo amity fagnatreha ty raenao, le hanompo eo amity fagnatrehanao raho." ²⁰ Le hoe ty Absaloma tamy Ahitofela hoe:" Ameo ty torohevenao zahay ty amity tokone hataony." ²¹ Namale i Absaloma ty Ahitofela hoe:" Mindehana miroro miarake amireo valy mpanompo ty raenao ze niengane hiambe ty lampa, naho ho rey Israely iaby fa nagnaimbo vata teo amity raenao riha. Bakeo le hatanjake ty tana reo iaby miarake aminao." ²² Naho namelatre tragno ho ahy Absaloma teo ambone ty lampa iereo, ka niarake-niroro tamireo valy ndevo ty raene teo amsao Israely iaby ty Absaloma. ²³ Naho ty torohevetre ze nomea Ahitofela tamize andro zay le manahake ty hoe rey ty ndaty bakamity vavan'Agnahare vatane. Zay ro hisa Davida vaho Absaloma ty torohevetre Ahitofela iaby.