¹ Laha fa vita ty asa iaby ze natao Solomona ho ahy ty tragno Yaveh, le nampilire Solomona reo zaka ze le fa natoka Davida, raene, ho ahy ze fagniria zay, agnate zay ty volafoty, ty volamena, naho reo fanake iaby__natobone tao amity famoria tao antragnon'Agnahare reo. ² Le namory ty Solomona, tagne Jerosalema, reo olobey Israely, reo mpitarike ty foko iaby, naho reo mpitarike ty foko ty vahoake Israely, mba hagnakatre ty tomabile fagnenkea Yaveh bakao amity tana Davida, zay i Ziona. ³ Nivory teo agnoloa ty mpanjaka tamity andro fifalea, ze tamity volam-pahafito ty ndaty Isarely iaby. ⁴ Avy ty olobey Israely iaby, ka le nagnakatre ty tomabile reo Levita. ⁵ Nakare iereo ty tomabile, ty tragno lay fivoria, naho ty fanake masy iaby ze tao antragno. Reo mpisoro ze bakamity foko Levy ro nagnakatre reo zaka reo. ⁶ Niara-avy teo agnoloa ty tomabile ty Solomona Mpanjaka vaho ty fiangona Israely iaby, nanao soro agnondry vaho agnombe ze tsy hay isahe. ⁷ Reo mpisoro le nagnakatre ty tomabile ty fagnenkea Yaveh ho ao amity fitobohane, tao amity efetre agnate ty tragno, tao amity toera msay vatane, amireo ela ty kerobima. ⁸ Satria ty kerobima le namelatre ty ela iereo eo amity fitoboha ty tomabile, ka nanako ty tomabile vaho reo bao ze hitarazoa zay reo. ⁹ Reo bao le lava vatane ke le hisake bakao amity fitoerane masy agnoloa ty efetre agnatene reo afarane, feie tsy hisake bakagne ambalike zay. Ao Zisikandroany reo. ¹⁰ Tsy nisy na ino ino tao amity tomabile laha-tsy reo vato pisake roe ze natobo Mosesy tao tagne Horeba, tamy Yaveh nanao fagnenkea tamity vahoake Israely, laha fa niakatre i Egypta iereo. ¹¹ Naho niakatre tao amity fitoboha masy reo mpisoro. Reo mpisoro niavy iaby le nanonka-bata ho ahy Yaveh, tsy nandaha-bata arake ty zatse iereo. ¹² Reo Levita ze mpiantsa avao kea, re iaby, agnate zay Asafa, Hemana, Jedotona, naho reo anadahy vaho rahalahy iereo, niakanjo rongone foty malineke naho nitendre kipantso, harpa, vaho lokanga, le nitsanga teo amity farane antignana ty alitara. Nisy mpisoro 120 nitioke trompetra niarake tamiereo. ¹³ Naho nampiara-peo reo mpitioke trompetra vaho reo mpiantsa, nanao feo toka mba ho rey ho antsa vaho fisaora Yaveh. Nagnakatre ty feone tamity trompetra vaho kipantso naho zaka-magneno hafa iereo, ka niantsa Yaveh. Niantsa iereo hoe:" Fa soa Re, satria maharetre zisikezay ty tsy fivaliham-pagnenkeane." Naho ty tragno, ty tragno Yaveh, le feno raho. ¹⁴ Tsy afake nitsanga mba hanompo reo mpisoro noho ty raho, satria nameno ty tragno ty hasy Yaveh.