¹ Le hoe Solomona hoe:" Natalily Yaveh fa hitoboke ao agnate iem-pito Re, ² Kanefa le fa nagnore tragno soa vatane ho anao raho, le toera hitobohanao zisikezay." ³ Le niotake ty mpanjaka naho nitso-drano ty fiangona Irsaely iaby, laha mboe teo am-pitsangana ty fiangona Israely iaby. ⁴ Hoe re hoe:" Ho antsae anie Yaveh, ty Zagnahare Israely, ze nirehake tamy Davida raeko, naho nandefe zay tamity tagnane avao, nanao hoe: ⁵ ' Hatramity andro nindaisako ty vahoakeko niakatre bakao amity tane Egypta, le tsy nifily tana teo amity foko Israely iaby mba hagnoregna tragno raho, mba hitoboha ty agnarako ao. Naho tsy mba nifily ndaty ho roandrian-dahy eo amy Israely ndatiko raho. ⁶ Kanefa, nifily i Jerosalema raho, mba hitoboha ty agnarako ao, naho nifily i Davida raho mba handily eo amy Israely ndatiko.' ⁷ Naho tao am-po Davida raeko ty hagnore tragno ahy ty agnara Yaveh, ty Zagnahare Israely. ⁸ Fa hoe Yaveh tamy Davida raeko hoe:' Fa nataonao tao am-ponao ty hagnore tragno ho ahy ty agnarako, le soa ty nagnanaova zay tao amponao. ⁹ Na zay aza, le ao tsy hagnore ty tragno riha; fa kea, ty anadahinao, ze ho terake bakamity voanao, ro hagnore ty tragno ho ahy ty agnarako.' ¹⁰ Linefe Yaveh ty rehake ze le fa nirehafene, satria nitsanga hisolo ty toera Davida raeko raho, ka mitoboke eo amity sezan-droandria Israely, arake ty nampagnantegna Yaveh. Naoreko ho ahy ty agnara Yaveh, ty Zagnahare Israely ty tragno. ¹¹ Natoboko tao ty tomabile, ze misy ty fagnenkea Yaveh, ze nataone tamity vahoake Israely." ¹² Nitsanga teo agnoloa ty alitara Yaveh ty Solomona teo amity fiatrehane ty fiangona Israely iaby, naho namelatre ty tagnane. ¹³ Fa nagnamboatre raraha varahy re, ze dime metatre ty halavane, dime metatre ty velarane, naho telo metatre ty haabone. Natobone teo agnivo ty kianja zay. Nitsanga teo ambone zay re naho nandohaleke teo agnoloa ty fiangona Israely iaby, naho bakeo namelatre ty tagnane nimbaeo amity lagnitre re. ¹⁴ Hoe re ty hoe:" Ry Yaveh, Zagnahare ty Israely, tsy misy Zagnahare manahake Anao na agne andagnitse na eto antane, te mita fagnenkea vaho hatea tsy mivalike amireo mpanomponao ze mindeha eo agnoloanao amity arofone iaby, ¹⁵ Riha ze la fa nita ze nampagnantegnaenao tamy Davida raeko mpanomponao. Eka, nirehake tamity fitavanao Riha naho natao tamity tagnanao zay, zisikamity androany. ¹⁶ Amizao are, ry Yaveh, Zagnahare Israely, anovo ze nampagnantegnaenao tamy Davida raeko mpanomponao, laha fa nirehake Riha ty hoe:' Tsy ho foa aminao ty hana hasahira hitoboke eo amity sezan-droandria Israely eo amasoko, laha ohatre ka miambe ty hindeha amity lalako ty fokonao, manahake ty nindehananao teo agnoloako.' ¹⁷ Amizao are, ry Zagnahare Israely, mivavake raho mba ho lefe ty fampagnantegna nataonao tamy Davida mpanomponao. ¹⁸ Fa tena hitoboke etoy antane miarake amity anagn'Ondaty vatane vao Zagnahare? Ingo, zao tontolo zao vaho ty lagnitre aza tsy antogno Anao__sandrake fa ty tempoly ze naoreko toy! ¹⁹ Kanefa mba dranjigno rie ty vavake ty mpanomponao vaho ty hatane toy, ry Yaveh Zagnahareko; mba dranjigno ty hatane vaho ty vavake atao ty mpanomponao eto agnoloanao. ²⁰ Enga anie ka hivoha amity tempoly toy andro amanale ty masonao, le ty toera ze nampagnantegnaenao hignisia ty agnaranao. Hidranjy ty vavake atao ty mpanomponao magnoloa ty toera toy anie Riha. ²¹ Ka dranjigno ty hatane ty mpanomponao vaho ty Israely ndatinao laha fa mivavake magnoloa ty toera toy zahay. Eka, midranjigna bakagne amity toera hitobohanao, bakagne andagnitse; naho laha fa midranjy Riha, le magnenga. ²² Laha manonta amity namane ty ndaty raike ka tsy maintsy hampanove fifanta, naho laha avy re ka manao fifanta eo agnoloa ty alitaranao ato amity tragno toy, ²³ le midranjigna bakagne andagnitse ka miasa naho tsarao reo mpanomponao, mba hamale ty raty fagnahy, mba hagnere ze nataone ho eo amity lohane avao. Ambarao ho tsy manan-tsiny ty mare, mba hamalea soa aze noho ty hamareane. ²⁴ Laha fa rese ty fahavalo ty Israely ndatinao satria nanonta taminao, ka laha mihere aminao iereo, magnenke ty agnaranao, mivavake, naho mangatake famotora bakaminao ato amity tempoly toy__ ²⁵ le midranjigna bakagne andagnitse rie naho mamotora ty hadisoa Israely ndatinao; ento mihere agne amity tane ze nameanao iereo vaho ty razambeine iereo. ²⁶ Laha mihily ty lagnitse ka tsy misy ora satria nanonta taminao ty vahoake__laha mivavake magnoloa ty toera toy iereo, magnenke ty agnaranao, naho miala amity hadisoane laha fa baka nampijalenao__ ²⁷ le midranjigna agne andagnitse naho mamotora ty hadisoa ty mpanomponao vaho ty Israely ndatinao, laha fa magnanatre iereo ty lily soa ze tokone hombane riha. Mandatsaha ora eo amity tanenao, ze nameanao ho lova ty ndatinao. ²⁸ Laha atao hoe misy kere eo amity tane, na atao hoe misy arete-mandany, hamaiha ty vare na mate foty, valala na sompanga; na atao hoe manafike ty vavahady ty tana ao amity tane iereo ty fahavalone, na misy arete-mandany na farare__ ²⁹ naho laha atao ndraike hoe misy vavake vaho hatake natao ty ndaty raike na ty Israely vahoakenao iaby__ze sambe mahay ty arete vaho ty alahelo agne ampone iaby laha mamelatre ty tagnane ho amity tempoly toy re. ³⁰ Le midranjigna agne andagnitse, ty toera hitobohanao; mamotora, naho valeo soa ty ndaty iaby noho ty lalane iaby; Riha mahay ty arofone, satria Riha le Riha avao ro mahay ty arofo ty ndaty. ³¹ Anovo zay mba hatahora iereo anao, mba hindehana iereo amity lalanao amity andro iaby ivelogna iereo ao amity tane ze nameanao reo razambeinay. ³² Ty amireo vahiny ze tsy agnate Israely ndatinao, feie__noho ty agnaranao bey, ty tagnanao mahere, naho ty sandrinao soa__le avy vaho mivavake magnoloa ty tragno toy, ³³ le midranjigna rie agne andagnitse, ze toera hitobohanao, naho anovo iaby ze angatahe ty vahiny aminao, mba hahaia ty ndaty iaby eto antane ty agnaranao ka hatahora iereo Anao, arake ty atao Israely ndatinao arere, naho mba hahafaha iereo fa ty tragno ze naoreko toy le kaihe amity agnaranao. ³⁴ Laha atao ty hoe mindeha miakatre hialy amity fahavalo iereo ty ndatinao, na ino ino fomba nandefasanao iereo, naho laha mivavake aminao magnoloa ty tana ze voafilinao toy iereo, naho magnoloa ty tragno ze naoreko ho ahy ty agnaranao. ³⁵ Le midranjigna ty vavake, vaho ty hata iereo bakagne andagnitse, naho ameo rarene iereo. ³⁶ Laha atao hoe manonta aminao iereo__satria tsy misy ndaty tsy manonta__naho laha atao hoe meloke amiereo Riha ka manolotre iereo ho eo amity fahavalo, mba hindaisa ty fahavalo iereo vaho hangala iereo ho azo agne amity tane iereo, na lavitre na marine. ³⁷ Naho laha atao hoe tiaro iereo fa agne amity tane ze nagnanoa sese-tane aze iereo, naho laha atao hoe mibebake iereo ka mipay saotre aminao agne amity tane nahazoa iereo. Laha mirehake iereo hoe:' Nanao zaka tsy nimete zahay, naho nanonta. Raty entam-bata zahay.' ³⁸ Laha atao hoe mihere aminao amity arofone iaby vaho ty fagnahine iaby agne amity tane ty nahazoa iereo, ze nindaisane iereo ho azo, naho laha atao hoe mivavake amity tanene iereo, le ze nameanao ho ahy ty razambey iereo, vaho manandrife ty tana ze finilinao, naho manandrife ty tragno ze naoreko ho ahy ty agnaranao. ³⁹ Le dranjigno bakagne andagnitse, ty toera hitobohanao, ty vavake iereo vaho ty hata iereo famonjea, naho ameo ty rarene iereo. Mamotora ty ndatinao, ze nanonta taminao. ⁴⁰ Amizao, ry Zagnahareko, mangatake aminao raho, ao hivoha ty masonao, naho ao ty sofinao hidranjy ty vavake ze atao eto amity toera toy. ⁴¹ Amizao naho mitsangana, ry Yaveh Zagnahare, eo amity toera fitofanao, Riha vaho ty tomabile ty ozanao. Ao ty mpisoronao, ry Yaveh Zagnahare, mba hisiky famonjea, naho ao reo ndaty-masinao hifale amity hasoanao. ⁴² Ry Yaveh Zagnahare, ko magnodike ty vata ty voahosonao hiala aminao. Tiarovo reo asa ty tsy fivaliham-pagnenkeanao ho ahy Davida, mpanomponao."