¹ Hafa zay le nagnamboatre alitara varahy re, roapolo metatre ty halavane, naho roapolo metatre ty borine. Folo metatre ty haabone. ² Nataone vy avao kea ty magnodidy ty taven-drano, folo metatre ty sognine. Lime metatre ty haabone, naho telopolo metatre ty magnodidy ty taven-drano . ³ Ty ambane ty sogny ty taven-drano magnodidy le nisy agnombelahy, folo isake ty metatre, naharo ho raike miarake amity taven-drano laha fa vita ty taven-drano. ⁴ Natoboke teo ambone ty agnombe roe amby folo ty taven-drano, ty telo mitolike magnavaratre, ty telo mitolike makan-drefa, ty telo mitolike magnantimo, naho ty telo mitolike manignana. Natoboke teo ambone reo ty taven-drano, naho nifagnila ty zoro efatriereo. ⁵ Mateve manahake ty vodivoan-tagna ty taven-drano, naho ty sognine le voatefe manahake ty sogny kapoake, manahake ty vogne ty lilia. ⁶ Mahalany rano telo arivo bata ty taven-drano. Nagnamboatre koveta folo bey ho fanasa raraha avao kea re; nasiane lime teo ankavana, naho lime teo ankavia; zaka-ampiasae amity fandefea ty fagnatetre oroa ro sinasa teo amireo. Ty taven-drano kea, mba hisasa reo mpisoro. ⁷ Nagnamboatre reo fitobohan-jiro volamena folo ze natao arake reo roro-lala ho ahy ty sare re; natobone tao antempoly reo, lime teo amity ankavana, naho lime teo amity ankavia. ⁸ Nagnamboatre latabatre folo re ka natobone tao antempoly reo, lime teo amity ankavana, naho lime teo amity ankavia. Nagnamboatre koveta volamena zato re. ⁹ Fagnampe zay le nagnamboatre kianja ty mpisoro vaho kianja bey, naho varavara ty kianja re; pinetane varahy reo varavara reo. ¹⁰ Natobone teo amity ilane ankavana ty tragno, tagne antignana, mitolike magnantimo ty taven-drano. ¹¹ Nagnamboatre velagne, lapele fandraofa, naho finga fagniligna ty Hirama. Ka le vita Hirama ty asa re nataone ho ahy Solomona Mpanjaka tao antragnon'Agnahare: ¹² le reo ambe roe, kapitaly fohe zay teo ambone ty ambe roe, naho fitoboha ty hengone makarakara roe mba hanakona reo kapitaly fohe roe zay teo ambone reo ambe. ¹³ Le fa nagnamboatre ampongambeidagnitse efa-jato ho ahy reo hengone makarakara re: ampongambeidagnitse roe isake ty fitoboha ty makarakara iaby mba hanakona ty kapitaly fohe roe ze teo amireo ambe. ¹⁴ Nagnamboatre tsangana vaho koveta natao teo ambone ty tsangana avao kea re; ¹⁵ taven-drano raike vaho agnombe roe amby folo eo ambanene, ¹⁶ reo velagne, lapele fandraofa, fitrebeke, naho zaka hafa iaby avao kea. Natao Hirama ty andrarangy tamity varahy voalio, ho ahy Solomona Mpanjaka, ho ahy ty tragno Yaveh reo. ¹⁷ Nagnia ty mpanjaka teo amity gebo ty Jordana reo, teo amity tanemanga agnivo Sokota vaho Zaretana. ¹⁸ Le hoe zay, ro nagnamboara Solomona reo fanake iaby maro bey reo; tsy afake nihaie vatane ty lanja ty varahy. ¹⁹ Nagnamboatre ty fanake iaby ze tao antragnon'Agnahare ty Solomona, ty alitara volamena avao kea, naho reo latabatre ze nametraha ty mofo ty fiatrefa; ²⁰ ty fitoeran-jiro amity jiro reo, ze voatoka horoa eo agnoloa ty efetre agnatene__reo le vita tamity volamena malio; ²¹ naho reo folera, reo jiro, naho ty lelan-jiro, le volamena, volamena malio. ²² Ty fanam-pahan-jiro, ty koveta, ty sotro, naho liten-ketae magnitre faoro avao kea le vita tamity volamena malio iaby. Ty amity filira mbaeo antragno, reo varavara agnatene mbaeo amity toera masy vatane naho ty varavara ty tragno, zay, ahy ty tempoly, le vita tamity volamena.