¹ Bakeo Solomona nanomboke nananga ty tragno Yaveh tao Jerosalema tagne amity vohitse Moria, ze nisehoa Yaveh tamy Davida raene, Nagnoma ty toera ze le fa finily Davida ho amizay re, tao amity famoloa Ornana ty Jebosita. ² Nanomboke nagnamboatre tamity andro faharoe ty vola faharoe re, tamity fahefa-tao nanjakane. ³ Toa iaby ty halava ty fototre ze natao Solomona ho ahy ty tragnon'Agnahare. Nampiasa ty metatre taloha, enem-polo metatre ty lavane, naho roapolo metatre ty borine. ⁴ Roaplo metatre ty halava ty lavaranga eo agnoloa ty tragno, mifagnarake amity bory ty tragno. Roapolo metatre avao kea ty haabone, naho pinote Solomona takelam-bolamena malio ty tao agnatene. ⁵ Rinavane kypreso ty valen-driha ty efetragno bey, ze pinetane takelam-bolane soa, naho nagnanovane sokitre tamity hetae palma vaho rojo. ⁶ Rinavane tamity vato lafo-vily ty tragno; ty takelam-bolamena le volamena bakagne Parvaima. ⁷ Pinetane takelam-bolamena avao kea reo ambene, reo tokonam-baravara, rindry, naho reo varavara; nasiane sare Kerobima teo amireo rindry zay. ⁸ Nagnamboatre ty fitoboha masy vatane re. Ty halavane le mifagnarake amity bory ty tragno, roapolo metatre avao kea ty borine. Pinetane takelam-bolamena malio zay, ze talenta enen-jato. ⁹ Ty lanja reo fantiby le sekele volamena dimam-polo. Pinetane takelam-bolamena ty faritre ambone. ¹⁰ Nagnamboatre sare Kerobima roe tao amity fitoboha masy vatane re; pinetane ty mpanao asa-tagna takelam-bolamena reo. ¹¹ Roapolo metatre ty halava ty ela reo Kerobima miarake; dime metatre ty halava ty ela ty kerobima raike, mahatakatre ty rindry ty efetragno; dime metatre manahake zay avao kea ty ela ty raike hafa, manakatre ty ela ty Kerobima hafa. ¹² Lime metatre avao kea ty halava ty ela ty kerobima hafa , magnorike ty rindry ty efetragno; lime metatre avao kea ty elane hafa, mikasike ty ela ty Kerobima voalohane. ¹³ Roa-polo metatre ty fiharoa ty ela reo Kerobima reo. Nitsanga reo Kerobima, ty tarehe iereo manandrife efetragno bey. ¹⁴ Nataone tamity manga, volomparasy, vaho volon'agnondry mena naho rongone foty malineke ty lamba, naho nihaminene kerobima teo amizay. ¹⁵ Nanao ambe roe avao kea Solomona, telopolo metatre ty haabo ty kirai-kiraike, teo agnoloa ty tragno; lime metatre ty haabo reo. ¹⁶ Nanao taly ho ahy reo ambe re naho nametrake reo teo ambone reo; nanao ampongambeidagnitse zato avao kea re naho nanohy reo tamireo taly. ¹⁷ Nataone teo agnoloa ty tempoly reo ambe, raike teo ankavana, naho ty raike hafa teo an-kavia; kinaine hoe Jakina ty ambe teo ankavana, naho Boaza ty ambe ankavia.