¹ Naho Solomona ro nibaiko ty fagnoregna tragno ho amity agnara Yaveh vaho ty fagnoregna lampa ho ahy ty fanjakane. ² Nanendre lahilahy fito ale ty Solomona mba hinday reo enta, vaho lahilahy valo ale mba ho mpandily hetae tagne ambohitse, naho lahilahy 3.600 mba hagnori-maso iereo. Nandefa talily tagne amity Hirama, mpanjaka Tyro ty Solomona, nanao hoe: ³ "Manahake ze nataonao tamy Davida raeko, ty nandefasanao hetae sedera mba hagnoregnane tragno hitoboha, le manova hoe zay amiko. ⁴ Ingo, eto ampagnoregna tragno ho amity agnara Yaveh Zagnahareko raho, mba hanoka zay ho aze, mba hagnoro liten-ketae magnitre eo agnoloane, mba hametrake ty mofo ty fiatreha, naho ho ahy reo fagnatetre oroa amity maray vaho hariva, amireo Sabata vaho reo vola vaovao, naho amireo fifalea voatondro ho ahy Yaveh Zagnaharentika. Zisikezay zay, ho ahy Israely. ⁵ Ho bey vatane ty tragno ze haoreko, satria bey ty Zagnaharentika mihoatre reo zagnahare iaby. ⁶ Fa ia nefa ro mahay magnore tragno ho an'Agnahare, laha zao tontolo iaby zao hatramity lagnitre aza tsy tendreke Aze? Ia raho ro hagnore tragno ho Aze, laha-tsy ty magnoro soro eo agnoloane? ⁷ Laha zao agniraho lahilahy manan-pahaia amity asa amity volamena, volafoty, varahy, vy, vaho volomparasy, sily, naho volon'agnodry manga raho, naho lahilahy raike mahay magnamboatre reo karazan-ketae voasokitre iaby. Hiarake amireo lahilahy manam-pahaia ze miarake amiko agne Joda vaho Jerosalema re, ze natolo Davida raeko. ⁸ Andefaso sedera, Kypreso, naho hetae almoga bakagne Libanona avao kea raho, satria haiko fa reo mpanompo nao le mahay ty fomba fanampaha hetae agne Libanona. Ingo, reo mpanomponao, le hiarake amireo mpanomponao, ⁹ mba hagnoma hetae maro ho ahy, satria ty tragno ze haoreko le ho bey maho mahisake. ¹⁰ Ingo, zaho hagnomea areo mpanpmonao, le reo lahilhay ze hanampake ty hetae, vare tritike roe ale kea, vare hordea roe ale kora, divay roe ale bata, naho diloilo roe ale bata." ¹¹ Naho Hirama, mpanjaka Tyro, namale antsoratre, ze nalefane tagne amy Solomona hoe:" Satria Yaveh tea ty ndatine, le nanao anao ho mpanjaka eo amiereo Re." ¹² Fagnampe zay, Hirama nanao ty hoe:" Isaora anie Yaveh, ty Zagnahare Israely, ze nanao ty lagnitre vaho ty tane, ze nagnomea anadahy mare i Davida mpanjaka, natolotre tamim-piambena vaho hilala, ze hagnore tragno ho ahy Yaveh, naho tragno ho ahy ty fanjakane. ¹³ Naho nagnirake Lahilahy manam-pahaia raho, nanolotra tamity hilala, le Horama, ty matehaneko. ¹⁴ Anadahy ty ampela raike ty anakampela Dana re. Lahilahy bakagne Tyro ro raene. Manampahaia amity asa volamena, volafoty, varahy, vy, vato, vaho amity hetae, vaho amity volomparasy, manga, naho jaky volon'agnondry, vaho rongone foty kele re. Manampahaia amity karaza sokitre vaho karaza famisavisa avao kea re. Ao hisy toera ho aze eoamireo mpiasanao manam-pahaia, vaho miarake amireo ahy ty tompoko, le i Davida, raenao. ¹⁵ Ka amizao, ty vare vaho ty vare hordea, ty diloilo vaho ty divay, ze rineha ty tompoko, le ao ho alefane agne amireo mpanompone. ¹⁶ Handily hetae bakagne Libanona zahay, maro arake ze paienao. Halefanay mihafo amity riake ho agne Jopa agne aminao zay, naho riha ro hagnankatre zay agne Jerosalema." ¹⁷ Nagnisake reo vahiny iaby ze tao amity tane Israely ty Solomona, arake ty fomba nagnisaha Davida, raene, iereo. 153,600 ro isa iereo. ¹⁸ Nanendre fito ale tamireo re mba hinday enta, valo ale mba ho ho mpanam-pa ketae agne ambohitse, naho mpagnori-maso 3.600 mba hampiasa ty vahoake.