¹ Nihere soa avao tagne antragnone tagne Jerosalema ty Josafata mpanjaka Joda. ² Bakeo Jeho anadahy Hanana, ty mpahisake, niakatre hanalaka aze ka nirehake tamy Josafata Mpanjaka hoe:" Tokone hagnampe ty raty fagnahy vao riha? Tokone hotea reo ze malay Yaveh vao riha? Laha zao asa zay, le ao aminao ty heloke bakamy Yaveh. ³ Na le zay aza, le mboe misy soa hisake ao agnatenao, fa nafahanao hiala ty tane reo baon'Aseraha, naho le nanefe ty arofonao hipay an'Agnahare riha." ⁴ Nitoboke tao Jerosalema ty Josafata; naho niakatre hitete ty vahoake ndraike re zisikagne Beriseba ka hatragne amity tane tazoa Efraima ka ninday iereo nihere tagne amy Yaveh, ty Zagnahare ty razambey iereo. ⁵ Nametrake mpitsara tagne amity tane nagnera reo tana manda iaby tagne Joda re, isake ty tana. ⁶ Hoe re tamireo mpitsara hoe:" Dineho ze tokone hataonareo, satria tsy mitsara ho ahy ty ndaty nareo, fa ho ahy Yaveh; momba anareo Re amity asam-pitsara. ⁷ Ka amizao, ao ho aminareo ty tahotre Yaveh. Miambena laha fa mitsara nareo, fa tsy mba misy heloke amy Yaveh Zagnaharentika, na fifilia vatagn'ondaty na vandevande." ⁸ Ka, nanendre ty ilane tamireo Levita vaho reo mpisoro, naho ty ilane tamireo mpitarike ty tragnon-draza Israely tao Jerosalema ty Josafata, ho amity fandefea ty fitsara ho ahy Yaveh, naho ho amireo fifandiera. Nitoboke tao Jerosalema iereo. ⁹ Nagnanatre iereo re, nanao hoe:" Tokone hanompo Yaveh ampagnaja, ampatokisa, naho amity arofonareo iaby nareo. ¹⁰ Na mbia mbia avy aminareo ty fifandiera amireo rahalahinareo ze mitoboke agne amity tana iereo, na mikasike ty fampi-pohan-dio, na momba reo lily aman-dala, le ampiambeno iereo, mba tsy ho lasa meloke eo agnoloa Yaveh iereo, laha tsy zay le ho avy aminareo vaho amireo rahalahinareo ty heloke. Zay ro tokone hataonareo mba tsy ho meloke nareo. ¹¹ Ingo, Amaria mpisorombey ro eo aminareo amity raraha Yaveh iaby. Zebadia anadahy Ismaela, mpitarike ty foko Joda, ro mita ty raraha ty mpanjaka iaby. Reo levita avao kea le ho manam-pahefa hanompo anareo. Mahereza ka oriho reo toro-lala nareo reo, naho Yaveh anie hiomba reo ze soa."