¹ Naho Josafata nana harea vaho hasy bey; re le nilongo tamy Ahaba tamity nanambaliane ty raike tao amity foko ty anakampelane. ² Tao maro tafara atoy, le nizotro tagne amy Ahaba tagne Samaria re. Namono agnondry aman'ose maro ho aze vaho reo nadty niarake tamine ty Ahaba. Naharese lahatre aze mba hanafike i Ramota Gileada hiarake amine ka Ahaba. ³ Hoe Ahaba, mpanjaka Israely, tamy Josafata, mpanjaka Joda hoe:" Hindeha hiarake aminao ho agne Ramota Gileada vao riha?" Namale aze Josafata hoe:" Mitovy aminao avao raho, naho ty vahoakeko le mitovy amity vahoakenao; hiarake aminareo agne amity aly zahay." ⁴ Hoe Josafata tamity mpanjaka Israely hoe:" Mba paio aloha ty safa Yaveh ho amity valen-drehanao." ⁵ Bakeo ty mpanjaka Israely namory reo mpaminane, lahilahy efa-jato, ka nirehake tamiereo hoe:" Tokone hindeha hialy agne Ramota Gileada vao tika, sa aha? Hoe iereo hoe:" Tafiho, fa Zagnahare hagnomea zay eo antagna ty mpanjaka." ⁶ Feie hoe Josafata hoe:" Tsy mboe misy mpaminane Yaveh hafa ze afake hangalantika dineke vao ty eto?" Hoe ty mpanjaka Israely tamy Josafata hoe:"Mboe misy lahilahy raike ze afake hangalantika ty heve Yaveh, le Mikaia anadahy Jimla, feie hejeko re satria tsy namisavisa soa mikasike ahy vatane re, fa raty avao." Fa hoe Josafata hoe:" Tsy tokone hirehake zay ty mpanjaka." ⁸ Bakeo nikaike manan-kasy ty mpanjaka Israely naho nanao ty hoe:" Ento malaky ty Mikaia anadahy Jimla." ⁹ Naho sambe nitoboke tamity sezan-droandria iaby Ahaba mpanjaka Israely vaho Josafata mpanjaka Joda, nisiky ty akanjo lavagn'iereo, teo amity toera malalake agnoloa ty filira ty vavahady Samaria, naho ty mpaminane iaby le namisavisa teo agnoloa iereo. ¹⁰ Zedekia anadahy Kenana le nagnamboatre trifa vy ho ahy ty vatane naho nanao ty hoe:" Zao ro safa yaveh: Amireo ro hitotoanao reo Syriana mandram-pipoteha iereo." ¹¹ Nitovy visavisa reo mpaminane iaby, nanao hoe:" Tafiho Ramota Gileada naho reseo, fa le fa namea Yaveh teo antagna ty mpanjaka zay." ¹² Ty irake ze nindeha nikaike i Mikaia nanao tamine, hoe: Ingo zao, ty reha reo mpaminane le magnombara zaka soa amity mpanjaka amity feo toka. Ao ty rehanao ho hoe ty reha ty raike amiereo naho hirehake zaka soa." ¹³ Namale Mikaia hoe:" :Laha mboe velo kea Yaveh, le ze zaka rehafen'Agnahare ro hataliliko." ¹⁴ Laha fa niavy tagne amity mpanjaka re, le hoe ty mpanjaka tamine hoe:" Ry Mikaia, tokone hindeha hialy agne Ramota Gileada vao tika, sa aha?" Namale aze Mikaia hoe:" Tafiho naho maharesea! Fa ho fahareseam-bey zay." ¹⁵ Bakeo ty mpanjaka nirehake tamine hoe:"Impire ro hampifantako anao tsy hirehake laha tsy ty mare amiko amity agnara Yaveh?" ¹⁶ Ka le hoe Mikaia hoe:" Nahisake ty Israely iaby nizara tegne amireo vohitse raho, manahake ty agnondry tsy misy mpiarake, naho hoe ty Yaveh:' Tsy mana mpiarake agnondry reo. Ao ty lahilahy iaby hihere am-pilamina agne antragnone."' ¹⁷ Laha zao le hoe ty mpanjaka Israely tamy Josafata hoe:" Tsy le fa nirehake anao vao raho fa re le tsy haminavina soa mikasike ahy, fa loza avao?" ¹⁸ Bakeo le hoe Mikaia hoe:" Laha zao nareo iaby le tokone hidranjy ty safa Yaveh: Nahisake Yaveh nitoboke teo amity sezan-droandria raho, naho ty miaramila ty lagnitre iaby nitsanga teo ankavanane vaho teo ankaviane. ¹⁹ Hoe Yaveh hoe:' Ia ro hitao i Ahaba, mpanjaka Israely, mba hahafahane hiakatre agne Ramota Gileada naho ho lavo agne?' Ty raike nirehake zao naho ty hafa nirehake zay. ²⁰ Tafarazay le nisy fagnahy nimbaeo naho nitsanga teo agnoloa Yaveh vaho nirehake hoe:' Hitao aze raho hoe Yaveh tamine hoe:' Amity fomba akore?' ²¹ Le namale ty fagnahy hoe:' Hiakatre raho naho holasa fagnahy mpavande ao ambava reo mpaminane iaby.' Namale Yaveh hoe:' Hitao aze riha, naho hasoa kea nareo. Ka amizao mindehana naho anovo zay.' ²² Ingo naho amizao, Yaveh nametrake fagnahy mpavande tao ambava reo mpaminanenao reo, naho Yaveh nandily loza ho anareo." ²³ Le niavy Zekedia anadahy Kenana, namofoke ty fify Mikaia, naho nanao ty hoe:" Taia ty lala niala ty fagnahy Yaveh tamiko mba hirehake aminao?" ²⁴ Hoe Mikaia hoe:" Ingo, ho hainao zay amize andro zay, laha fa milay hihaja agne amity efetragno agnate ty ilane riha." ²⁵ Nirehake tamity mpanompo ilane ty mpanjaka Israely hoe:"Tsepahonareo vahoake ty Mikaia naho ento ho agne Amona, ty governora ty tana re, vaho agne amy Joasy, anadahiko. ²⁶ Nareo vahoake hirehake amine hoe:' Hoe ty mpanjaka hoe: ampiliro agne am-ponja io lahilahy io naho fahano mofo vaho rano kele re, mandram-pihereko soa aman-tsara."' ²⁷ Bakeo Mikaia nirehake ty hoe:"Laha tafimpoly soa avao riha, le tsy nirehake tamity alalako Yaveh." Le mboe nampeane ty hoe:" Dranjigno zay, nareo ry vahoake iaby." ²⁸ Ka le niakatre handietre i Ramota Gileada ty Ahaba, mpanjaka Israely, vaho Josafata, mpanjaka Joda. ²⁹ Hoe ty mpanjaka Israely tamy Josafata hoe:" Hiova tarehe raho naho hindeha ho amity aly, fa agnisio ty akanjo lava ty mpanjaka." Ka le niova nanao ndaty hafa ty mpanjaka Israely, naho nindeha tagne amity aly iereo. ³⁰ Naho ty mpanjaka Syria le nandily reo kapitene reo kalesene, nanao hoe:" Ko manafike reo miaramila manan-kaja na tsy manan-kaja. Fa kea, ty mpanjaka Israely avao ro tafiho." ³¹ Naho laha fa nahisake i Josafata reo kapitene ty kalese le hoe iereo hoe:" Igne ty mpanjaka Israely." Nihere mba hanafike aze iereo, feie nikorake mafe Josafata, naho namonje aze Yaveh. Navalin'Agnahare niala tamine iereo. ³² Naho laha fa hisa reo mpifehe ty kalese fa tsy ty mpanjaka Israely re, le nihere tamity fagniagna aze iereo. ³³ Feie nisy lahilahy raike naninto ty folese naho nitifitre ty mpanjaka Israely teo agnivo ty fifankahaoza ty fiarova. Bakeo Ahaba nirehake tamity mpinday kalesene hoe:" Mitoliha naho ento miakatre ty aly raho, fa mafere vatane." ³⁴ Niharaty ty aly tamio andro o, naho ty mpanjaka Israely le nandy tao amity kalesene nanandrife tamireo Syriana zisike ty hariva. Mandram-pitsofora ty andro, le mate re.