¹ Naho tafara zay, le niavy nandietre i Josafata reo vahoake Moaba vaho Amona, naho niarake tamiereo ty Monita ilane. ² Le niavy ty ilane nirehake tamy Josafata, nanao hoe:" Maro bey reo hoavy handietre anao bakagne andafe ty Riake Mate, bakagne Edoma. Ingo, ao Hazezon-tamara iereo," ty Enjedy. ³ Lasa natahotre vaho nampipay ty vatane mba hipay Yaveh ty Josafata. Nagnombara fifalean-kane era Joda iaby re. ⁴ Niara-nivory hipay Yaveh ty Joda iaby; niavy hipay Yaveh tagne amireo tana Joda iaby iereo. ⁵ Naho Josafata nitsanga teo amity fiangona Joda vaho Jerosalema, tao antragno Yaveh, teo agnoloa ty kianja vaovao. ⁶ Hoe re ty hoe:" Ry Yaveh, ty Zagnahare reo razambeinay, tsy riha vao ro Zagnahare ty lagnitre? Tsy Riha vao ro mapndily eo amireo fanjaka ty firene iaby? Ty here vaho ty fahefa le antagnanao, Ka tsy misy afake hahatohetre anao. ⁷ Ry Zagnaharenay, tsy riha vao ro nandroake ty vahoake teto amity tane toy nagnoloa Israely ndatinao, vaho nagnomea zay zisikezao ho ahy reo foko Abrahama? ⁸ Nitoboke tao amizay vaho nagnore fitoboha masy tao ho ahy ty agnaranao iereo, nanao hoe: ⁹ 'Laha niavy teo aminay ty loza__ty meso, ty fitsara, na arete, na kere__le hitsanga eo agnoloa ty tragnone toy, vaho eo agnoloanao zahay(fa ato amity tragno toy ty agnaranao), naho hitagny anao zahay amity jalenay, ka haharey vaho hamonje anay Riha.' ¹⁰ Naho ingo, reo are ty vahoake Amona, Moaba, naho ty vohitse Seira ze tsy nenganao ho tafihe Israely laha fa niakatre bakagne amity tane Egypta iereo; fa kea, niala tamiereo ty Israely naho tsy namoteke iereo. ¹¹ Ingo, ty fomba hagnonerane antika; avy handroake antika hiala ao amity tanenao ze nameanao ho lovanay iereo. ¹² Ry Zagnahare o, tsy hitsara iereo vao Riha? Fa tsy mana here handiera ze tafike avy handietre anay zay zahay. Tsy hainay ze tokone hatao, fa ty masonay le agne aminao." Nitsanga teo agnoloa Yaveh ty Joda iaby, niarake tamireo maline iereo, reo valine, vaho reo anane. ¹⁴ Le teo agnivo ty fiangona, ro niavy tamy Jahaziela, anagn'i Zakaria, ana i Benaia, ana i Jeiela, ana i Matania, ty Levita, raike tamireo ana i Asafa ty fagnahy Yaveh. ¹⁵ Hoe Jahaziela hoe:" Dranjigno, ry Joda iaby vaho ty vahoake Jerosalema, naho ry Josafata mpanjaka. Zao ro safa Yaveh aminareo hoe:' Ko matahotre; ko kivy laha zao tafike zao, fa tsy ho anareo ty aly, fa ho an'Agnahare. ¹⁶ Tsy maintsy handietre iereo nareo maray. Ingo, hiakatre amity lala mandrio agne Ziza iereo. Hahisake iereo eo amity fara ty baibo nareo, eo aloha ty efetre Jeroela. Tsy mila mialy amize aly zay nareo. Mitsangana eo amity fitobohanareo, mijanogna, ka henteo ty famonjea Yaveh anareo, ry Joda vaho Jerosalema. Ko matahotre na ko kivy. Miakara handietre iereo hamaray, fa Yaveh hiomba anareo."' ¹⁸ Nagnohoke ty tarehene teo amity tane ty Josafata. Ty Joda iaby vaho ty vahoake Jerosalema le niondreke teo agnoloa Yaveh, niantsa aze. ¹⁹ Reo Levita, vaho reo foko ty Kehatita vaho koraita, nitsanga mba hiantsa Yaveh, ty Zagnahare Israely, tamity feo mafe. ²⁰ Vaho magneno akoho le nitsanga iereo ka niakatre nimbaeo amity efetre Tekoa. Laha niakatre igne iereo, le nitsanga Josafata naho nanao ty hoe:" Midranjigna ahy, ry Joda, vaho nareo vahoake Jerosalema! Minoa Yaveh Zagnaharenareo, le ho tohagna nareo. Matokia reo mpaminane, le hosoa nareo." ²¹ Laha fa nagnontane ty ndaty Re, le nanendre reo tokone hiantsa ho ahy Yaveh vaho handaza aze noho ty hasine masy Re, laha niakatre taloha ty tafike iereo, naho nanao ty hoe:" Misaora Yaveh, fa maharetre zisikezay ty fandeferane." ²² Laha fa nanomboke niantsa vaho nanompo iereo, le nametrake lahilahy hagnisy tampoke ty vahoake Amona, vaho Moaba, naho ty vohitse Seira, ze bake handietre Joda Yaveh. Naho le rese iereo. ²³ Le nitsanga hialy handietre ty vahoake bakao ambohitse Seira ty vahoake Amona vaho Moaba, mba hamono vatane vaho hamoteke iereo. Laha fa vita iereo ty amity vahoake ao ambohitse Seira, le hifamoteke iereo. ²⁴ Laha niavy teo amity toera fijilova ty efetre ty Joda, le nanente ty tafike iereo. Ingo, le fa mate iereo, lavo tamity tane; tsy nisy afa-belo. ²⁵ Laha avy handrava teo amiereo Josafata vaho ty vahoakene, le nahisake zaka maro bey, akanjo, vaho fiasa lafovily, ze nalaene ho ahy iereo, mihoatre noho ze azo iereo niente. Naharetre hateloa ty fandrava iereo, fa bey loatre zay te teo. ²⁶ Tamity andro fahaefatre le nivory teo amity baibo Bereka iereo. Tagne ro niantsa iereo Yaveh, ka natao hoe"Baibo Bereka" ty agnara ze toera zay zisikandroany. ²⁷ Le nihere iereo, ty ndaty iaby tao Joda vaho Jerosalema, naho tao amity fitariha iereo Ty Josafata, mba hindeha hombaeo Jerosalema ampifalea ndraike, fa Yaveh le fa nampifale iereo teo amireo fahavalone. ²⁸ Niavy tagne Jerosalema vaho tao antragno Yaveh niarake tamireo lokanga, valiha, naho trompetra iereo. ²⁹ Ty horohoron'Agnahare le teo amireo Fanjaka ty firene iaby laha naharey iereo fa Yaveh le nialy handietre reo fahavalo Israely. ³⁰ Ka le nitsy ty fanjaka Josafata, satria nagnomea fiadagna aze nagnodidy aze iaby ty Zagnaharene. ³¹ Nanjaka teo amy Joda ty Josafata: lime amby telo-polo tao re laha nanomboke nanjaka, naho nanjaka lime amby roa-polo tao tamy Jerosalema re. Ty agnaran-drenene le Azoba, anakampela Sily. ³² Nindeha tamireo lala Asa raene re; naho tsy niala tamireigne; nanao ze mare teo amaso Yaveh re. ³³ Na zay aza, tsy narova reo fitoera agnabo. Ty vahoake le tsy mboe nitarike ty arofo iereo ho amity Zagnahare ty razambey iereo. ³⁴ Naho laha ty amireo zaka hafa mikasike i Josafata, voalohane sady farane, ingo, reo le fa voasoratre ao amity tantara i Jeho ana i Hanany, ty voafiasa an-tsoratre ao amity boke reo mpanjaka Israely. ³⁵ Naho tafara zay Josafata, mpanjaka Joda le niraike tamy Ahazia, mpanjaka Israely, ze nanao zaka-raty maro. ³⁶ Niraike tamine re mba hagnamboatre sambo hindehana agne Tarsisy. Tao Ezion-gabera ro nagnamboara iereo ty sambo. ³⁷ Naho Eliezera ana i Dodavaho bakagne Maresa, le namisavisa hagnisy i Josafata; heo re ty hoe:" Satria le fa niraike tamy Ahazia riha, le rinava Yaveh reo tetek'asa nao." Rendreke ty Sambo ka tsy afake nindeha an-tsambo iereo.