¹ Ko masiake ty lahy antetre. Fa kea, anaro hoe ty rae re. Anaro hoe ty rahalahy reo lahilahy kele. ² Anaro manahake ty rene reo vave antetre, naho reo ampela kele hoe ty anabave ao amity haliova iaby. ³ Magnaja reo mpivem-bata, reo vatene mpivem-bata. ⁴ Fa laha managnanake ndra zafekele ty mpivem-bata raike, le engao iereo aloha hianatre haneho fagnaja ao amity tokantragnone. Ao iereo hamale babea reo rae aman-drenene, satria tean'Agnahare zay. ⁵ Fa ty vatane mpivem-bata le nenga ho arere. Manao ty fitokiane amin'Agnahare re. Mitoboha zisikagne amireo fangataha vaho vavake andro aman'ale. ⁶ Ndra zay aza, ty ampela ze velo hoahy amity zaka-teane le mate, ndra le mboe velo aza re. ⁷ Talilio ze zaka zay mba tsy hanagna iereo tsiny. ⁸ Fa laha misy ndaty tsy magnomea hoahy reo longone marine, fa lako hoahy reo ao amity fokone, le nilietre ty finoa re naho raty lavitre naho ty tsy mpino. ⁹ Ao hosorate ho mpivembata ty ampela ze tsy latsake ty enem-polo tao, ampela raike te valy ty lahilahy raike. ¹⁰ Tokone ho hay naho reo asa soa re, ndra nikarakara reo kolo, ndra avao kea nampandroso reo mpivahiny, ndra nanasa ty tombo reo mpino, ndra nagnamaiva ty ore, ndra naolo-bata tamity asa soa iaby. ¹¹ Fa hoahy reo mpivem-bata mboe kele kea, le ko magnenke ty hanoratre iereo ao agnate lisita. Fa laha fa milavo-lefo amity paie ty nofo handietre Kirisity iereo, le te-hanambaly. ¹² Amizay iereo le hahazo fagnameloha satria nivalike ty fanolora-batane voalohane. ¹³ Ka le lasa zaka malay kea iereo. Mandehandeha mitete tragno. Tsy hoe lasa malay avao avao iereo, fa lasa mpifosa vaho mpimpay aly avao kea. Mirehake zaka ze tsy tokone ho rehafe iereo. ¹⁴ Laha zao le teako hanambaly reo ampela mboe kele, hiterake, hikarakara tokatragno, mba tsy hahafahane magnomea lala ty fahavalo hita anay ho nanao raty. ¹⁵ Fa ty ilane le fa niotake kea hagnorike Satana. ¹⁶ Laha misy ampela mino mana mpivem-bata, ao re hagnampe iereo, mba tsy hagnavesatre ty fiangona, mba hahafahane magnampe reo vatane mpivem-bata mare. ¹⁷ Ao reo olobey ze mandily soa mba ho raese ho soan-kasy roe ambone, lako fa reo ze miasa miarake amity rehake vaho amity fampianara. ¹⁸ Fa hoe ty Soratre Masy hoe:"Tsy tokone hagnisy fehene ty vava ty agnombe riha laha mba misy voa re." naho kea:"Ty mpiasa le soa amity karamane." ¹⁹ Ko mandrae fitana mandietre ty olobey raike laha tsy misy vavolombelo roe ndra telo. ²⁰ Ahitio eo agnoloa iaby reo mpanota mba hatahotre ty ambine hafa. ²¹ Mandily anao mafe raho eo agnoloan'Agnahare vaho eo agnoloa Kirisity Jesosy naho reo anjele voafily, mba hitananao reo lily reo tsy misy fitsaratsara naho mba tsy hanovanao ndra ino ino amity fanoa. ²² Ko meke mametra-tagna aminia ndra aminia. Ko miarake ao amity hadisoa ty ndaty hafa. Tokone hita ty vatanao halio riha. ²³ Tokone tsy hinon-drano sase riha. Fa kea, tokone handrae divay kele riha hoahy ty vavony vaho reo aretenao matete-mpiseho. ²⁴ Ty hadisoa reo ndaty ilane le hay miharehare, naho iereo le mandeha aloha reo ao amity fitsara. Fa ty hadisoa ilane magnorike bakafara atoy. ²⁵ Hoe zay avao kea, misy asa soa hay miharehare, feie reo ilane aza le tsy azo ahaja.