¹ Henanezao nirehake mazava soa ty Fagnahy fa amity andro agne afara agne hiala amity finoa ty ndaty ilane naho miambena soa ty amireo fagnahy mpamitake vaho reo fampianara reo devoly ² amity fihatsarambelatsihy ty mpanvande. Fa voamarike amity vy may ty feo ty fieretrereta iereo. ³ Ho rara iereo ty manambaly vaho ty mandrae reo sakafo ze finoron'Agnahare ho zarae miarake amity fisaora eo amireo ze mino vaho ze mahay ty mare. ⁴ Fa ty zaka iaby ze finoron'Agnahare le soa. Tsisy ho liere ty zaka nireasentika tamim-pisaora. ⁵ Fa nihamasigne tamity tsaran'Agnahare vaho ty vavake zay. ⁶ Laha atobonareo eo agnoloa reo rahalahy reo zaka reo, le ho mpanompo soa Jesosy Kirisity nareo. Fa tineza tamireo tsara ty finoa vaho tamity fampianara soa ze norihenareo nareo. ⁷ Fa lavo ty talily tantarae ty vave antetre. Fa kea, tariho hagnomea hasy an'Agnahare ty vatanareo. ⁸ Fa ty vata hofagne le kele avao ro azo ampiasa aze, nefa fampiasa amity zaka iaby ty toera arake an'Agnahare. Mitana ty fampagnategna amity fiaigna henanezao toy vaho ty fiaignan-koavy. ⁹ Ty talily toy le soam-pahatokisa vaho mete ty hafenoa ty fagnenkea. ¹⁰ Fa laha zao le hitolo vaho hiasa mafe tika. Fa matoky ao amin'Agnahare velo tika, te mpamonje ty ndaty iaby, lako reo ze mino. ¹¹ Ambarao vaho ampianaro reo zaka reo. ¹² Ao tsy hisy ndaty hanao tsinontsino ty hatanoranareo. Fa kea, ao ho ohatre hoahy reo ze mino, amity rehake, entam-bata, hatea, finoa, naho fahaliova. ¹³ Mandram-pahaviko, tohizo ty famakia, ty fagnanara, vaho ty fampianara. ¹⁴ Ko atao tsinontsino ty fagnomeam-pahasoava ze aminao ao, ty namea anao tamity alala ty famisavisa, niarake tamity fametrahan-tagna reo olobey. ¹⁵ Ambeno rey zaka rey. Metea ho ao amiereo, mba hiharehare amity ndaty iaby ty fandrosoa. ¹⁶ Ambeno soa ty vatanao vaho ty fampianara. Tohizo rey zaka rey. Fa laha manao hoe zay, le ho vonjenao ty vatanao vaho reo midranjy anao.