¹ Nisy lahilahy bakagne Benjamina, lahilahy ambone raike. Ty agnarane le Kisy anadahy Abiela anadahy Zerora anadahy Bekorata anadahy Afia, ty anadahy Benjamita raike. ² Nanagnanake lahy natao hoe Saoly re, ajalahy soa tarehe raike. Tsy mboe nisy ndaty soa tarehe noho re teo amity ndaty Israely. Manomboke eo amireo sorone ro ho miakatre le lava noho ty ndaty iaby re. ³ Naho reo ampondra Kisy, rae Saoly, le robake. Ka nirehake tamy Saoly anane ty Kisy nanao hoe:" Mangala raike amireo manompo hiarake aminao, mitsangana naho mindehana mipay reo ampondra." ⁴ Ka le namakivaky ty tane tazoa Efraima ty Saoly naho nindeha tamity tane ty Salisa, fa tsy hisa iereo zay. Naho namakivaky ty tane Salima iereo, nefa tsy tagne iereo. Bakeo le namakivaky ty tane reo Benjamita iereo, fa tsy nahisake reo. ⁵ Lafa fa niavy teo amity tane Zofa iereo, le nirehake tamity mpanompone ze niarake tamine ty Saoly hoe:" Andao, hindeha tika hihere, fa mete tsy hagnahy ty amireo ampondra sase ty raeko fa hanomboke hisalasala ty momba antika." ⁶ Fa hoe ty mpanompo tamine hoe:" Dranjigno, misy lahilahin'Agnahare amity tana toy. Re le lahilahy nameam-boninahitre; iaby ze rehafene le lefe vatane iaby. Andao tika ho agne; mate ho afake hirehake amintika ze lala tokone hombantika amity liantika re." ⁷ Le hoe Saoly tamity mpanompone hoe:" Fa laha mindeha tika, ino ro afake ententika ho ahy ty lahilahy? Ty mofo agnate kitapontika le fa lany, naho tsy misy fagnomea mba ho entetika ho ahy ty lahilahin'Agnahare. Ino ro hanagnantika?" ⁸ Ty mpanompo namale Saoly ka nanao ty hoe:" Ingo, zaho mana ampahaefatre ty sekele volafoty ze hameako ty lahilahin'Agnahare, mba hirehafa amintika ze lala tokone hombantika." ⁹ (Taloha tagne Israely, laha fa misy lahilahy mindeha mipay ty fahaia ty sitrapon'Agnahare, le mirehake re hoe:" Andao, hindeha tika ho agne amity mpahisake." Fa mpahisake ro fikaiha taloha ty atao ty hoe mpaminane amizao.) ¹⁰ Bakeo le nirehake tamity mpanompone Saoly hoe:" Soa ty rehanao. Andao, hindeha tika." Le lasa iereo nimbaeo amity tana ze nisy ty lahilahin'Agnahare. ¹¹ Naho laha fa niakatre ty tazoatao antana iereo, le nahisake reo ajampela niakatre hitaon-drano; le hoe Saoly vaho ty mpanompone tamiereo hoe:"Eto vao iaze mpahisake ey?" ¹² Namale iereo, ka nanao hoe:" ingo, ao aloha kelenareo ao avao re. Malaky, fa ho avy eo antana re androany, satria hanao soro eo amity toera agnabo ty vahoake androany. ¹³ Laha vatane vaho militre ty tana nareo le hahisake aze, aloha ty hiakarane amity toera agnabo hihinanane. Tsy hihina ty vahoake mandram-piavine, satria re ro hitso-drano ty soro; afarazay le hihina reo ze hinafatre. Ka miarake zao, fa hahisake aze amizay nareo." ¹⁴ Le niakatre ho agne amity tana iereo. Naho laha vaho nilitre ty tana iereo, le nahisake Samoela niseho tamine, mba hindeha hiakatre agne amity toera agnabo. ¹⁵ Naho ty andro taloha ty nahavia Saoly, le nagnombara tamy Samoela Yaveh hoe: 16"Hamaray amizao lera zao le handefa lahilahy raike bakamity tane Benjamina aminao Raho, naho hagnosotre aze ho roandria eo amity Israely vahoakeko riha. Hamonje ty vahoakeko amity tagna reo Filistina re. Fa le fa nanente ty vahoakeko tamity fiferenay raho satria nipay vonje iereo le niavy tamiko atoy." ¹⁷ Laha fa hisa Samoela ty Saoly, le nirehake tamine Yaveh hoe:" Inty ty lahilahy nambarako anao! Re ty ndaty ze handily ty vahoakeko." ¹⁸ Bakeo ty Saoly le namonje Samoela teo amity vavahady naho nanao ty hoe:" Mba ambarao ahy hoe aia ro misy ty tragno ty mpahisake?" ¹⁹ Namale Saoly ty Samoela nanao ty hoe:" Zaho ty mpahisake. Miakara ho amity toera agnabo alohako, fa androany le hiara-mihina amiko riha. Engako hindeha riha amity maray, naho hambarako anao iaby ze ao andohanao. ²⁰ Laha ty amireo ampondranao ze robake telo andro zay, le ko matahotre ty amizay, le ko matahotre ty amizay, fa le fa hisake zay. Naho natoboke taminia reo tomabile Israely iaby? Tsy ho aminao vaho ho amity fokon-draenao iaby vao?" ²¹ Namale Saoly ka nanao hoe:" Fa tsy Benjamita vao raho, bakamity foko kele Israely? Tsy ty fokoko vao ro farane vatane amireo foko iaby ao amity foko Benjamina? Ka nagnino ro ze fomba zay ro nirahafanao tamiko?" ²² Naho rinae Samoela ty Saoly vaho ty mpanompone, ka nientene tagne agnefetragno, naho natobone teo amity fitoeram-boalohane ho ahy ze hinafatre iereo, ze tokone ho ndaty telopolo teo ho eo. ²³ Hoe Samoela tamity mpahandro hoe:" Ento ty anjara ze nameako anao, ze rinehako taminao hoe, Atokano toy."' ²⁴ Ka nalae ty mpahandro ty fe vaho ze teo amine naho natoboneteo agnoloa Saoly. Naho hoe Samoela ty hoe:" Ingo ze voatoka le fa natoboke teo agnoloanao. Hano io, satria voatoka ho anao mandram-pihavia ty andro voatendre, tamity andro nirehafako hoe, Le fa nagnafatre ty ndaty raho."' Le niara-nihina tamy Samoela ty Saoly tamio andro o. ²⁵ Laha fa tafizotro tagne amity toera agnabo ho amity tana iereo, le nirehake tamy Saoly teo ambone tragno ty Samoela. ²⁶ Naho vaho magneno-akoho, le nikaiky Saoly teo ambone tragno ty Samoela ka nanao ty hoe:" Miaregna, mba hahafahako mandefa anao agne amity lalanao." Le nifoha ty Saoly, naho sambe nindeha niakatre ho egne andala re vaho Samoela. ²⁷ Naho laha fa nindeha magnodidy ty tana iereo, le hoe Samoela tamy Saoly:" Ambarao ty mpanompo mba hindeha alohantika"__le nindeha taloha re__"fa tsy maintsy mijano eto andro kele riha, mba hirehafako aminao ty hafan'Agnahare."