¹ Laha fa antetre ty Samoela, le nataone ho mpitsara eo amity Israely reo anadahine. ² Joela ro agnara ty anadahine voalohane, naho Abia ro agnara ty anadahine faharoe. Mpitsara tao Beri-sheba iereo. ³ Tsy nindeha tamity lalane reo anadahine, fa nipay fiharea tsy mare. Nandrae vandevande iereo naho namadike ty raene. ⁴ Le niarake-nivory reo olobey Israely iaby naho niavy teo amy Samoela tao Rama. ⁵ Hoe iereo tamine:" Ingo, antetre riha, naho tsy mindeha amity lalanao reo anagnao. Manendrea mpanjaka ho anay mba hitsara anay manahake reo firene iaby." ⁶ Nefa tsy nitea Samoela zay laha nirehake iereo hoe:" Ameo mpanjaka zahay mba hitsara anay." Ka nivavake tamy Yaveh ty Samoela. ⁷ Hoe Yaveh tamy Samoela hoe:" Ekeno ty feo ty vahoake amity zaka iaby rehafe iereo aminao; fa tsy riha ro niliere iereo, fa zaho ro nilierene tsy ho mpanjaka iereo. ⁸ Amizao iereo le manao hoe ze nataone hatramity andro nindaisako iereo niakatre bakao Egypta, nahafoe Ahy, naho nanompo reo zagnaharen-kafa, naho hoe zay kea ro atao iereo aminao. ⁹ Amizao dranjigno iereo; nefa ampiambeno mafe ka ampahaio ty fomba handilia ty mpanjaka amiereo eo." ¹⁰ Ka le rineha Samoela tamity vahoake ze nangatake mpanjaka reo safa Yaveh iaby. ¹¹ Hoe re:" Zaho ro ho fatao ty mpanjaka ze hanjaka eo aminareo. Hangalake reo anadahinareo re ka hanendre iereo ho ahy ty Kalesene vaho ho lasa mpitiki-tsoavalene, naho hilailay eo agnoloa reo kalesene. ¹² Hanendre kapitene ty miaramila agnarivone, naho kapitene ty miaramila dimampolo ho aze re. Hataone miasa ty tanene ty ilane, mihaza ty vokane ty ilane, naho hanao ty zaka-fialiane vaho ty zaka ho ahy reo kalesene ty ilane. ¹³ Reo anagnareo vave avao kea le nataone mpagnaroharo zaka-magnitre, mpahandro, naho mpanao mofo. ¹⁴ Halaene ty soa vatane bakamity baibonareo, reo tanem-boalobognareo, naho reo tanen'oliva nareo, ka hameane reo mpanompone. ¹⁵ Halaene ty ampahafolo ty varenareo vaho ty bakamireo tanem-boalobonareo ka hameane reo manam-pahefane vaho reo mpanompone. ¹⁶ Halaene reo mpanomponareo lahy vaho reo mpanomponareo vave naho ty soa vatane amireo ajalahinareo vaho reo borikinareo; hataone hiasa ho aze ie iaby. ¹⁷ Halaene ty ampahafolo reo agnondry aman'osenareo, ka ho lasa ndevone nareo. ¹⁸ Ka amize andro zay le hitaray noho ty mpanjakanareo ze finilinareo ho ahy ty vatanareo nareo; feie tsy hamale anareo Yaveh amize andro zay." ¹⁹ Kanefa nilietre ty hidranjy Samoela ty vahoake; hoe iereo:" Aha! Tokone hisy mpanjaka eto aminay ²⁰ mba hitovianay amireo firene hafa iaby, naho mba hitsara ty mpanjakanay anay vaho hiakarane eo agnoloanay ka hialy ty alinay." ²¹ Lafa fa rey Samoela reo reha ty vahoake iaby le naherene teo antsofy Yaveh zay. ²² Hoe Yaveh tamy Samoela :" Enkeno ty feo iereo naho anovo lasa mpanjaka iereo ty ndaty raike." Ka hoe Samoela tamireo ndaty Israely:" Tsy maintsy mindeha agne amity tanane iaby ty lahilahy kirai-kiraike."