¹ Avy ty ndaty Kitiata-Jearima, nangalake ty tomabile Yaveh, naho ninday zay tao antragno Abinadaba tagne amity tazoa. Nanonka Eleazara anadahine iereo mba hiambe ty tomabile Yaveh. ² Nanomboke tamity andro ze nitoboha ty tomabile tao Kiriata Jearima, le tao maro ro lasa, roapolo tao. Ty foko Israely iaby le nalahelo Yaveh ka nagniry hihere amy Yaveh. ³ Hoe Samoela tamity foko Israely iaby hoe:" Laha mihere amy Yaveh amity arofonareo iaby nareo, le afaho eo aminareo reo zagnaharen-kafa vaho reo Astarta, atoliho amy Yaveh ty arofonareo, naho Re arere avao ro tompoe, le hamonje anareo eo antagna reo Filistina Re." ⁴ Le nagnafake reo Bala vaho ty Astarta ty vahoake Israely, naho nanompo Yaveh arere avao. ⁵ Naho hoe Samoela ty hoe:" Andeso ho agne Mizpa ty Israely iaby, le hivavake amy Yaveh ho anareo raho." ⁶ Nivory tao Mizpa iereo, naho nanovy rano ka nagnily zay teo agnoloa Yaveh. Nifaly hane iereo tamize andro zay ka nanao ty hoe:" Le fa nanonta tamy Yaveh tika." Tagne ro nandilia Samoela hevetre hitsara ty fifandiera ty vahoake Israely vaho nindaisane aze. ⁷ Naho laha fa rey reo Filistina fa nivory tao Mizpa ty vahoake Israely, le nanafike ty Israely reo mpandily ty Filistina. Laha naharey zay ty vahoake Israely, le natahotre reo Filistina iereo. ⁸ Naho hoe reo vahoake Israely tamy Samoela:" Ko mijano mikaike Yaveh Zagnaharentika ho antika, fa hagnavotre antika eo antagna reo Filistina Re." ⁹ Le nangalake anakagnondry mboe minono ty Samoela naho nagnomea zay iaby mba ho fagnatetre oroa ho ahy Yaveh. Naho nikaike mafe Yaveh ho ahy ty Israely ty Samoela, ka namale aze Yaveh. ¹⁰ Naho laha mboe nanese ty fagnatetre oroa Samoela, le namonje hanafike ty Israely reo Filistina, Fa Yaveh nampiavy ora tamity feo mafe tamize andro zay handietre reo Filistina ka nampifandroboke iereo, naho rese teo agnoloa ty Israely iereo. ¹¹ Naho ty lahilahy Israely niala bakagne Mizpa, le nagnia ty Filistina ka namono iereo madram-piaviane teo ambanegny Betikara. ¹² Bakeo le nangalake vato Samoela naho nametrake zay teo agnivo Mizpa vaho Sena. Nataone hoe Ebenezera ty agnara zay, manao hoe:" Hatramizao ro namonjea Yaveh antika." ¹³ Le rese reo Filistina ka tsy nilitre teo amity fari-tane ty Israely. Ty tagna Yaveh nandietre reo Filistina tamity andro Samoela iaby. ¹⁴ Reo tana ze nalae reo Filistina tamity Israely le tafimpoly tamy Israely, zisikagne Ekrona ka hatragne Gata; nihere tamity Israely ka ty faritane ty tane amireo Filistina. Le nisy filongoa teo amity Israely vaho ty Amorita. ¹⁵ Nitsara ty Israely zisike ty androm-piaignane iaby ty Samoela. ¹⁶ Isan-tao le nindeha niveze-veze tagne Betela, Gilgala, naho Mizpa re. Nanampan-kevetre tamity aly ho ahy Israely teo amireo toera iaby reo re. ¹⁷ Naho nihere tagne Rama ndraike re. Satria tagne ty tragnone; naho tagne avao kea ro nanampahane hevetre tamity aly ho ahy ty Israely. Nagnore alitara ho ahy Yaveh tagne avao kea re.