¹ Naho ty tomabile Yaveh le tao amity tana reo Filistina zisike ty fito vola. ² Bakeo ty vahoake Filistina nikaike reo mpisoro vaho reo Ombiasa; hoe re tamiereo ty hoe:"Ino ro tokone hataonay amity tomabile Yaveh?" Ambarao anay ty fomba hagneregnanay zay agne amity firene zay arere." ³ Hoe reo mpisoro vaho reo Ombiasa hoe:" Laha aherenao ty tomabile ty Zagnahare Israely, le ko ahere tsy miarake amity fagnomea zay; andefaso fagnatetre noho ty heloke amity fomba iaby Re. Le ho afake nareo, naho ho hainareo ty antone tsy nagnafahane ty tagnane taminareo zisikandroany." ⁴ Le hoe iereo ty hoe:" Tokone ho ino ty fagnatetre noho ty heloke ze aherenay amine?" Namale iereo hoe:" Fivontoa volamena dime vaho totozim-bolamena dime, ty dime le isake mitovy amity isa reo mpandily ty Filistina. Fa loza mitovy ro nampijale anareo vaho reo mpandilinareo. ⁵ Laha zao le tsy maintsy manao sare ty fivontoanareo nareo, naho sare ty totozinareo ze mandrava ty tane, naho magnomea hasy ty Zagnahare Israely. Asa mete hagnafake ty tagnane aminareo Re, amireo zagnaharenareo , naho amity tanenareo. ⁶ Nagnino ro tokone hagnamafe ty arofonareo nareo, manahake ty nagnamafesa reo Egyptiana vaho Farao ty arofo iereo? Zay le tamity nagnisia ty Zagnahare Israely mafe iereo; feie tsy nalefa reo Egyptiana vao ty vahoake, naho lasa iereo? ⁷ Amizao are, magnomana sarete vaovao miarake amity agnombe vave mampinono roe ze mboe tsy niasa vatane. Feheo amity sarete reo agnombe, feie ento moly reo anakagnombe, hiala amiereo. ⁸ Bakeo alao ty tomabile Yaveh naho anovo ao agnate ty sarete zay. Atoboho agnate vata eo agnila zay ty saren-jaka volamena ze aherenareo amine mba ho fagnatetre noho ty heloke. Le alefaso zay naho engao hindeha amity lalane. ⁹ Bakeo henteo; laha miakatre agne amity lala mbaeo amity tanene arere agne Beti-semesy zay, le Yaveh ro nanao ze loza bey zay. Fa laha tsy zay, le ho haintika fa tsy ty tagnane ro nampijale antika; fa kea, ho haintika fa niseho tsy kinahy tamintika zay." ¹⁰ Reo lahilahy le nanao arake ze nirehafe tamiere; nangalake agnombe vave mampinono roe iereo, namehe reo teo amity sarete, naho ninday ty anakagnombe tagne antragno. ¹¹ Natobo iereo teo amity sarete ty tomabile Yaveh, niarake tamity vata misy ty totozy volamena vaho ty sare ty fivontoa iereo. ¹² Nindeha nahity tagne amity lala mahazo agne Beti-semesy reo agnombe vave. Nindeha tamity lalam-bey raike reo, nimama tegne ampindehana, naho tsy nivio na tagne ankavana na ankavia. Nagnorike iereo tagne amity sisy Beti-semesy reo mpandily reo Filistina. ¹³ Naho nihaza ty vare iereo tegne ambaibo ty vahoake Beti-semesy. Laha fa nagnakatre ty masone iereo ka nahisakety tomabile, le nifalefale. ¹⁴ Niavy tagne amity baibo Josoa bakagne amity tana Beti-semesy ty sarete naho nijano tao. Nisy vato bey teo, ka namaky ty hetae tamity sarete iereo, naho nanolotre reo agnombe vave mba ho fagnatetre oroa Yaveh. ¹⁵ Nazotro reo Levita ty tomabile Yaveh vaho ty vata ze niarake tamizay, ze nisy reo sare volamena, naho natobone teo amity vato bey reo. Nanolotre fagnatetre oroa vaho nanao soro ho ahy Yaveh ty andro io avao reo vahoake Beti-semesy. ¹⁶ Laha fa hisa reo manadily lime reo Filistina zay, le nihere tagne Ekrona ty andro io avao iereo. ¹⁷ Toa iaby reo fivontoa volamena ze nahere reo Filistina ho fagnatetre noho ty heloke ho ahy Yaveh: raike ho ahy Asdoda, raike ho ahy Gaza, raike ho ahy Askelona, raike ho ahy Gata, naho raike ho ahy Ekrona. ¹⁸ Reo totozim-bolamena le nitovy isake tamity isa reo tana reo Filistina iaby ze ahy reo mpandily dime, le reo tana manda vaho reo ana-bohitse ty tana. Ty vato bey, teo agnila ty nametraha iereo ty tomabile Yaveh, le mitoetre ho vavolombelo raike ao amity baibo Josoa Beti-semesita zisikandroany. ¹⁹ Nagnisy ty ilane tamireo vahoake Beti-semesy Yaveh satria nanente tao agnate ty tomabile Yaveh iereo. Namono lahilahy 50.070 Re. Nandala ty vahoake, satria nagnisy mafe ty vahoake Yaveh. ²⁰ Hoe reo vahoake Beti-semesy hoe:" Ia ro afake hitsanga magnoloa Yaveh, ty Zagnahare masy toy? Ho aminia ro iakara ty tomabile bakatoy amintika?" ²¹ Nagnirake mpinday talily tagne amireo vahoake Kiriata-Jearima iereo, nanao hoe:" Niente reo Filistina nihere ty tomabile Yaveh; mizotro naho ento mihere miarake aminareo zay."