¹ Naho lasa reo Filistina ty tomabilen'Agnahare, ka niente iereo bakagne Ebenezera ho agne Asdoda zane. ² Nalae reo Filistina ty tomabilen'Agnahare, nientene tao antragno Dagona zay, naho natobone teo agnila Dagona. ³ Laha fa nifoha maray reo vahoake Asdoda ty hamaray, le ingo, nitonta nihohoke tamity tane teo agnoloa ty tomabile Yaveh ty tarehe Dagona. Ka le nalae iereo Dagona naho nampiakarene teo amity toerane ndraike. ⁴ Fa laha fa nifoha maray iereo ty hamaray, le ingo, nitonta nihohoke tamity tane teo agnoloa ty tomabile Yaveh ty tarehe Dagona. Ty loha Dagona vaho ty tagnane roe le tampake teo amity varavara. Ty vata Dagona avao ro sisa nitoboke. ⁵ Laha zao, ro antone tsy handika reo mpisoro Dagona vaho ze ndaty militre ao antragno Dagona ty varavara Dagona ao Asdoda, na zisikezao aza. ⁶ Ty tagna Yaveh le navesatre teo amireo vahoake Asdoda. Rinavane vaho nampijalene tamity fivontoa iereo, i Asdoda vaho reo faritanene. ⁷ Laha fa tsapa ty ndaty Asdoda ze niseho, le hoe iereo:"Ao tsy hijano eto aminay ty tomabilen'Agnahare Israely, satria ty tagnane le mandietre mafe anay vaho Dagona zagnaharenay." ⁸ Ka le nampikaike iereo naho namory reo mpandily ty Filistina iaby; hoe iereo tamine:" Ino ro tokone hataonay amity tomabile ty Zagnahare Israely?" Namale iereo hoe:" Ao ho ente hiotake agne Gata ty tomabilen'Agnahare Israely." Ka niente iereo tagne ty tomabilen'Agnahare Israely. ⁹ Fa laha fa baka niente iereo niotake zay, le nandietre ty tana ty tagna Yaveh, ka nahavy korontam-bey. Nampijale reo ndaty ty tana Re, na kele na bey; ka niakatre tamiereo ty fivontoa. ¹⁰ Laha zao le nalefa iereo tagne Ekrona ty tomabilen'Agnahare. Fa vatane vaho niavy tagne Ekrona ty tomabilen'Agnahare, le nikorake mafe reo Ekronita, nanao ty hoe:" Ninday ty tomabilen'Agnahare Israely ho antika mba hamonoa antika vaho reo ndatintika iereo." ¹² Reo ndaty ze tsy mate le nampijale tamity fivontoa, naho ty faritane ty tana le niakatre nagneneke ty lagnitre.