¹ Niavy tamy Israely iaby ty reha Samoela. Naho niakatre hialy tamireo Filistina ty Israely. Nametrake tobe teo Ebenezera iereo, naho nametrake tobe teo Afeka kea reo Filistina. ² Nilahatre hialy tamity Israely reo Filistina. Laha fa niele ty aly, le rese ty Filistina namono teo ho eo amity efatre arivo lahy teo amity baibon'aly t Israely. ³ Laha fa nilitre tao antobe ty vahoake, le hoe reo olobey Israely hoe:" Nagnino Yaveh ro naharese antika teo agnoloa reo Filistina tandroany? Ndao ho ententika bakagne Siloha hombatoy ty tomabile ty fagnenkea Yaveh, mba hiarake amintika atoy zay, ka hiaro antika amity tagna reo fahavalontika." ⁴ Ka le nagnirake lahilahy nimbaeo Siloha ty vahoake; bakagne ro nindaisa iereo ty tomabile fagnenkea Yaveh tompo ty maro, ty mitoboke ambone ty Kerobima. Teo niarake tamity tomabile fagnenkean'Agnahare reo ana Ely roe lahy, le Hofinia vaho Finehasa. ⁵ Laha fa nilitre tao antobe ty tomabile fagnenkea Yaveh, le niarake-nagnakatre korake mafe ty vahoake Israely iaby, naho nameno ty tane. ⁶ Laha fa rey reo Filistina ty tabataba ty korake, le hoe iereo ty hoe:" Fa ino ro anto ty tabataba mafe ao antobe Hebreo zao?" Bakeo le azo iereo andineke fa niavy tao antobe ty tomabile Yaveh. ⁷ Natahotre reo Filistina; hoe iereo hoe:" Misy zagnahare niavy tao antobe." Hoe iereo ty hoe: ⁸ "Loza ho antika! Tsy mboe nisy zaka niseho hoe zao taloha! Loza ho antika! Ia ro hiaro antika amity here reo zagnahare mahere reo? Reo ro zagnahare ze nagnisy ty Egyptiana tamity loza maro isan-karazane tagne agnefetre. ⁹ Alao here, naho mba milahilahia, nareo ry Filistina, tsy ne ho lasa ndevo ty Hebreo nareo, manahake ty naha-ndevonareo iereo. Mba milahilahia, ka mialia." ¹⁰ Le nialy reo Filistina, naho rese ty Israely. Nilay tagne antragnone iaby ty lahilahy iaby, naho mafe vatane ty vono; fa miaramila mitsanga telo ale bakamity Israely ro lavo. ¹¹ Lasa ty tomabile Yaveh, naho mate ty Hofnia vaho Finehasa, ana Ely roe lahy. ¹² Nisy lahilahy Benjamina raike nilailay bakagne amity laharan'aly ka nimbaeo Siloha tamio andro o avao, niavy niarake tamity akanjone rovitre vaho debon-tane teo andohane. ¹³ Laha fa niavy re, le nitoboke teo amity sezane teo amoron-dala nijilo ty Ely satria nangorohoro ty amity tomabilen'Agnahare ty arofone. Laha fa nilitre ty tana ty lahilahy naho nirehake ty vaovao, le nikorake mafe ty tana iaby iaby. ¹⁴ Laha fa rey Ely ty korake, le hoe re ty hoe:" Ino ro dika ze koronta zao?" Niavy malaky ty lahilahy naho nitalily tamy Ely. ¹⁵ Naho valo amby sivampolo tao ty Ely; poake ty masone, naho tsy nahisake re. ¹⁶ Hoe ty lahilahy tamy Ely:" Zaho ty raike ze bakagne amity laharan'aly. Nilay ty aly raho androany." ¹⁷ Hoe Ely ty hoe:" Nagnino ty findehane, anake?" Namale ty lahilahy ninday ty vaovao ka nanao hoe:" Nilay reo Filistina ty Israely. Naho kea, nisy hareseam-bey teo amity vahoake. Naho kea, mate Hofinia vaho Finehasa, anagnao roe lahy, naho lasa ty tomabilen'Agnahare." ¹⁸ Laha fa nanogno ty tomabilen'Agnahare re, le nidoboke nivalike bakeo antsezene teo agnila ty vavahady ty Ely. Tampake ty vozone, ka mate re, satria le fa antetre vaho rerake. Nitsara ty Israely zisike ty efapolo tao re. ¹⁹ Naho ty vinanto-vavene, valy Finehasa, le nibevoka naho le fa ho terake. Laha fa naharey ty vaovao re fa lasa ty tomabilen'Agnahare naho mate ty rafozan-dahine vaho ty valine, le nandohaleke re naho terake, feie nandavo aze ty fanaintay ty haterane. ²⁰ Tokone ho tamity andro nifatezane le nirehake tamine reo ampela niatreke aze hor:" Ko matahotre, fa niterake ajalahy riha." Feie tsy namale re na nandrae ampo ze nirehafe iereo. ²¹ Kinaine hoe Ikaboda ty agnara ty kolo, fa hoe re ty hoe:" Afam-boninahitre Israely!" fa lasa ty tomabilen'Agnahare, naho noho ty rafozan-dahine vaho ty valine kea. ²² Hoe re ty hoe:" Afam-boninahitre Israely, satria lasa ty tomabilen'Agnahare."