¹ Nanompo Yaveh teo amity fiatreha Ely ty Samoela kolo. Tsy ampe reo safa Yaveh tamireo andro reo; tsy le nisy fahisaha ara-pamisavisa mateteke. ² Tamize andro zay, Ely, ze le fa nanomboke poake ty masone ka tsy mahisake soa, le niroro teo ampandreane. ³ Mboe tsy mate ty fanilon'Agnahare, naho niroro mba handre tao amity tempoly Yaveh ty Samoela, tao amize nisy ty tomabilen'Agnahare. ⁴ Yaveh nikaike Samoela, ze nanao hoe:" Intoy raho." ⁵ Nilay mbaeo amy Ely ty Samoela nanao hoe:" Intoy raho, fa nikaike ahy riha." Hoe ty Ely:" Tsy nikaike anao raho, miheregna miroro." Ka nindeha ty Samoela naho niroro. ⁶ Nikaike ndraike Yaveh ty hoe:" Ry Samoela." Le nitsanga ndraike ty Samoela nao nimbaeo amy Ely, nanao hoe:" Intoy raho, fa nikaike ahy riha." Le namale Ely hoe:" Tsy nikaike anao raho, ty anako, miheregna miroro." ⁷ Naho Samoela le mboe tsy le nahay loatre Yaveh, na nisy talily bakamy Yaveh mboe nambara tamine. ⁸ Nikaike Samoela fagnintelone ndraike Yaveh. Nitsanga ndraike Samoela naho nimbaeo amy Ely vaho nanao ty hoe:" Intoy raho, fa nikaike ahy riha." Le haigny Ely fa Yaveh ro nikaike i ajalahy io. ⁹ Le hoe Ely tamy Samoela:" Mindehana naho miheregna miroro; laha mboe mikaike anao ndraike Re, le tsy maintsy mirehake riha hoe:" Mirehafa, ry Yaveh, fa midranjy ty mpanomponao."' Ka nindeha Samoela naho niroro tamity toerane ndraike. ¹⁰ Avy Yaveh ka nitsanga; nikaike manahake ty tamireo fotoa hafa hoe:" Samoela, Samoela." Le hoe ty Samoela hoe:" Mirehafa, ry Yaveh, fa midranjy ty mpanomponao." ¹¹ Hoe Yaveh tamy Samoela:" Ingo, hanao zaka amy Israely Raho ka ty sofy ze maharey iaby le haritsike. ¹² Amize andro zay le handefe ty zaka-iaby le fa nirehafeko tamy Ely momba ty fokone, hatramity voalohane ka hatramity farane Raho. ¹³ Nirehake tamine Raho fa hitsara ty fokone ndraike avao tsy mihere ty amireo andro ze haine, satria reo anane le ninday ozo tamity vatagniereo naho tsy nanaka iereo Re. ¹⁴ Laha zao le nifanta tamity foko Ely Raho fa reo hadisoa o foko le tsy ho voa avake amity soro na fagnatetre zane." ¹⁵ Niroro zisike-maray ty Samoela; le namoha ty varavara ty tragno Yaveh re. Fa natahotre ty hirehake tamy Ely momba ty fahisaha ty Samoela. ¹⁶ Bakeo le nikaike i Samoela ty Ely ka nanao tamine hoe:" Ry Samoela, anako." Le hoe ty Samoela hoe:" Intoy raho." ¹⁷ Hoe re:" Ino ro rehake rinehane taminao? Ko ahaja ahy rie zay. Hanao zay aminao anie ty Zagnahare, naho mihoatre noho zay aza, laha magneta-draka amiko ty amireo rehake iaby ze nirehafene taminao riha." ¹⁸ Le rineha Samoela tamine ty zaka-iaby; tsy nagnaja na ino ino tamine re. Hoe ty Ely:" Re ro Yaveh. Engao Re hanao ze mete hoe soa Amine." ¹⁹ Nihabey ty Samoela, naho Yaveh le niarake tamine, naho tsy nengane hisy tamireo rehake famisavisane tsy ho lefe. ²⁰ Ty israely iaby zisikagne Dana ka hatragne Beri-sheba le nahay fa i Samoela le voatendre ho mpaminane Yaveh. ²¹ Niboake tao Silo ndraike Yaveh, satria nagnombara ty vatane tamity rehane tamy Samoela tao Silo Re.