¹ Nivavake ty Hana ka nanao hoe:" Ty arofoko mifale ao amy Yaveh. Ty trifako miakatre amy Yaveh. Ty sogniko mirehareha magnoloa reo fahavaloko, satria mifale amity famonjeanao raho. ² Tsy misy masy manahake Yaveh, fa tsy misy hafa i Riha; tsy misy vatolampy manahake ty Zagnaharentika. ³ Ko mirehareha loatre sase; ao tsy ho akare ty vavanao ty avognavo. Fa Yaveh ro Zagnahare ty fahaia; amity alalane ro handanja ty asa. ⁴ Ty folese reo lahilahy mahere le tampake, fa reo tafintohy kea le misikin-kere manahake ty santira. ⁵ Reo ze voky nikarama mofo; reo ze kere le nijano tamity hakere. Na ty tsy miterake aza miterake fito, fa ty ampela managnanake maro kea le mivaraneha. ⁶ Yaveh ro mahafate vaho minday ho amity havelo. Re ro mandrotso agne amity fiaignan-tsy hisake naho mananga. ⁷ Yaveh ro mampahantra ty ndaty ilane naho maha-pagnarivo ty ilane. Mampietre re, nefa mampiakatre avao kea. ⁸ Magnamafe ty mahantra hiala amity deboke Re. Mampiakatre ty ore hiala amity lavenoke mba hanao iereo miarake amity andrian-dahy ka handova ty sezam-boninahitre. Ty ambe ty tane iaby le ahy Yaveh naho teo amireo ro nametrahane zao iaby zao. ⁹ Hambenane ty tombo ty ndatine matoky, fa ty raty fagnahy kea le hampitsigne agne amity iem-pito, satria tsy misy haharese amity here. ¹⁰ Reo ze mandietre Yaveh le ho poteke; handefa ora bakagne andagnitse handietre iereo Re. Yaveh ro hitsara ty fara ty tane iaby; hagnomea here ty mpanjakane Re naho hagnakatre ty trifa ty voahosona." ¹¹ Bakeo Elkana le nimbaeo Rama, tagne antragnone. Nanompo an'Agnahare teo amity fiatreha Ely mpisoro ty kolo. ¹² Naho lahilahy raty fagnahy reo anadahy Ely. Tsy nahay Yaveh iereo. ¹³ Ty fatao ty mpisoro miarake amireo vahoake laha fa nisy lahilahy nanolotre soro, le mamonje ty mpanompone ty mpisoro ka minday fandraitse telo rantsagna egne antagnane, laha mboe mandeve ty hena. ¹⁴ Atsoboro ao agnate lasitre zay, na fahandroan-kena, na velagne, na velagne bey. Reo iaby azo ty fandraitse ao le alae ty mpisoro ho aze. Natao iereo tao Silo niarake tamireo Israelita iaby ze niavy tao zay. ¹⁵ Raty vatane aza, aloha ty nagnoroa iereo ty sabora, le tamity mpanompo ty mpisoro, naho nirehake tamity lahilahy ze nanao ty soro hoe:" Ameo hena ho entsake ty mpisoro, fa tsy hagnenke hena nahandroe bakaminao re, fa ty manta avao." ¹⁶ Laha mirehake amine ty lahilahy hoe,"Tsy maintsy oroa iereo aloha ty sabora, naho bakeo le afake mangalake maro arake ze teanao riha." Le valeane hoe:" Aha, fa ameanao zao henanezao avao zay; fa laha tsy zay, le halaeko ankere zay." ¹⁷ Bey le bey vatane ty helognireo ajalahy magnoloa Yaveh, satria natao iereo tsinontsino ty fagnatetre Yaveh. ¹⁸ Fa Samoela le nanompo Yaveh laha mboe kele niakanjo efoda rongone foty. ¹⁹ Nagnamboaran-drenene akanjo lava kele re ka nientene ho aze isan-tao zay, laha fa niakatre niarake tamity valine mba hanolotre ty fagnatetre fanao isan-tao re. ²⁰ Naho Ely nitso-drano Elkana vaho ty valine nanao ty hoe:" Hagnomea anao kolo maro amity ampela toy anie Zagnahare noho ty hatake ze nataone tamy Yaveh." Bakeo le nihere tagne antragnone iereo. ²¹ Nagnampe i Hana ndraike Yaveh, ka nibevoka ndraike re. Niterake telo lahy vaho roe vave re. Zisike ze andro zay, le nitombo teo agnoloa Yaveh ty Samoela kolo. ²² Naho le fa antetre vatane Ely; reine iaby iaby ze natao reo anadahine tamity Israely iaby, vaho ty niroroa iereo niarake tamity ampela ze nanompo eo amity filira ao amity tragno fivoria. ²³ Hoe re tamiereo:" Fa magnino nareo ro manao zaka hoe zao? Le fa reiko tamity ndaty iaby ty zaka-raty nataonareo. ²⁴ "Aha, ro anako; tsy talily soa ro reiko. Mahavy ty vahoake Yaveh tsy hagnorike nareo. ²⁵ "Laha misy ndaty raike manonta amity hafa raike, le hotsaraen'Agnahare re; fa laha misy lahilahy reike manonta amy Yaveh, ia ro hisolo vava aze?" Fa tsy hidranjy ty feo ty raene iereo, satria Yaveh le fa nikasa ty hahafate iereo. ²⁶ Nihabey Samoela kolo, naho nitombo hatea tamy Yaveh vaho tamity ndaty avao kea. ²⁷ Naho nisy lahilahin'Agnahare raike namonje Ely ka nanao tamine hoe:" Zao ro safa Yaveh,'Tsy le fa nanoro ty vatako taminao tamity foko reo razambeinao vao raho, laha mboe tagne Egypta tamity fagnandevoza ty foko Farao iereo? ²⁸ Finiliko tagnate reo foko Israely iaby re mba ho mpisoro, mba hiakatre egne amity alitarako, naho mba hagnoro ty liten-ketae magnitre, mba hiakanjo efoda magnoloa Ahy. Nameako ho ahy ty foko ty razambeinao reo fagnatatre iaby natao ty vahoake Israely tamity afo. ²⁹ Nagnino are, riha ro magnaraty reo soro vaho fagnateko ze tinakeko ho eo amity toera fitobohako? Nagnino ro ameanao hasy mihoatre ahy amity famondraha ty vatanareo amity soa vatane bakamity fagnatetre iaby ty Israely vahoakeko ty anagnao?' ³⁰ Fa Yaveh, Zagnahare Israely, manao ty hoe:' Nampagnantegna Raho fa ty fokonao, vaho ty foko ty razambeinao, le hindeha eo agnoloako zisikezay.' Nefa amizao kea le hoe Yaveh:' Sagnatria Amiko ty hanao zay, ty magnomea hasy ahy ro hameako hasy, fa ze manao tsinontsino ahy kea ro hataoko tsinontsino. ³¹ Ingo, hoavy ty andro ze handiliako ty herenao vaho ty here ty foko ty razambeinao, ka tsy hisy lahilahy ho tran-kahantera sase amity fokonao. ³² Hahisake fijalea egne amize toera hitobohako riha. Na le amea soa aza ty Israely, le tsy hisy lahilahy ho tran-kahantera sase amity fokonao. ³³ Ty ilane aminareo ze tsy hafahako amity alitarako, le hataoko poake ty masonareo, naho hahavy alahelo ty amity fiaignanareo raho. Reo lahilahy iaby ze terake ao amity fokonareo le ho mate. ³⁴ Zao ro famantara ho anao ze hahazo reo anagnao roe lahy amy Hofinia vaho Finehasa: Sambe ho mate amity andro raike iereo roe. ³⁵ Hananga mpisoro matoky ho ahy ty vatako ze handefe ty ao ampoko vaho ty ao amity fagnahiko Raho. Hagnore tragno azo antoke ho aze Raho; naho hindeha eo agnoloa ty mpanjaka ze voahosoko zisikezay re. ³⁶ Iaby ze sisa tavela amity fokonao le ho avy naho hihohoke eo amine, hangatake tsilam-bolafoty vaho mofo, naho hanao ty hoe:" Mba tendreo ho agnate ty raike amireo mpisoronao rie raho mba hahafahako mihina tsila-mofo raike.""'