¹ Le nangalake ty tavoara misy diloilo Samoela, nagnily zay teo ambone loha Saoly, naho nagnoroke aze. Hoe re ty hoe:" Feie vao Yaveh tsy le fa nagnosotre anao ho mpandily ty lovane? ² Laha fa hiala ahy riha androany, le hahisake lahilahy roe agnila ty kibory Rahely, ao amity faritane Benjamina ao Zelza. Hirehake aminao iereo hoe:' Reo borike ze pinainao le fa hisake. Amizao ty razambeinao le nijano tsy hisalasala ty amireo borike naho le misalasala ty momba anao, manao ty hoe:" Ino ro tokone hataoko mikasike ty anadahiko?"' ³ Le hindeha lavidavitre kea bakagne riha, naho hoavy eo amity hetae terenbita Tabara. Hifanoje amity lahilahy telo mindeha ho agne amin'Agnahare agne Betela riha, ty raike minday anak'ose telo, ty hafa minday mofo telo, naho ty hafa minday sinin-divay holitre. ⁴ Hanalama anao iereo naho hagnomea mofo ro anao, ze halaenao bakeo antagna iereo. ⁵ Afara zay, le hihere ho eo amity tazoan'Agnahare riha, ty misy ty miaramila ty Filistina. Laha fa avy ao amity tana riha, le hifanoje amity paminane hizotro bakagne amity toera agnabo miarake amity lokanga, amponga tampake, sody, naho valiha eo agnoloa iereo; haminane iereo. ⁶ Ty fagnahy Yaveh hipoke eo aminao, naho haminane miarake amiereo riha, ka hiova ho lahilahy hafa. ⁷ Naho laha fa avy aminao reo famantara reo, le anovo iaby ze hisa ty tagnanao fa tokone hatao, satria ty Zagnahare momba anao. ⁸ Mizotroa eo alohako ho agne Gilgala. Le hizotro agne aminao raho hanolotre reo fagnatetre oroa naho hanao soro fagnate-pilongoa. Mandignasa fito andro madram-pindehanako ho eo aminao naho hanoroako aminao ze tokone hataonao." ⁹ Laha fa nitoli-dambosy hienga Samoela ty Saoly, le namean'Agnahare aze ty arofo vaovao. Le niavy reo famantara iaby reo tamize andro zay. ¹⁰ Laha fa avy tegne amity tazoa iereo, le nisy mpaminane nifanoje tamine, naho ty fagnahin'Agnahare nizotro teo amine ka naminane niarake tamiereo re. ¹¹ Laha fa nahisake aze niarake tamireo mpaminane ty ndaty iaby ze nahay aze taloha, le nifampirehake ty ndaty ty hoe:" Ino ro hahazo ty anadahy Kisy? Te mba agnate ty raike amireo mpaminane kea vao ty Saoly? ¹² Nisy lahilahy nitoboke teo amio toera ao namale hoe:" Le ia ro rae iereo?" Laha zao, le lasa firehake ty hoe:" Agnate reo mpaminane avao kea vao ty Saoly?" ¹³ Laha fa nahavita ty faminania re le nimbaeo amity fitoera agnabo. ¹⁴ Le hoe ty dadatoa Saoly tamine vaho ty mpanompone hoe:" Taia ro niombanareo?" Namale re hoe:" Nipay reo borike. Laha fa hisanay fa tsy nimete hisake reo, le nimbaeo amy Samoela zahay." ¹⁵ Hoe ty dadatoa Saoly hoe:" Mba rehafo amiko rie ze nirefafe Samoela taminareo." ¹⁶ Namale ty rahalahin-draene Saoly hoe:" Nirehake taminay mazava soa re fa le fa hisake reo borike." Fa tsy nirehake tamine ty momba ty rehake fanjaka, ze le fa nirehafe Samoela re. ¹⁷ Le kinay Samoela hiarake teo agnoloa Yaveh tao Mizpa reo vahoake. ¹⁸ Hoe re tamireo ndaty Israely hoe:" Zao ro zaka nirehafe Yaveh, Zagnahare Israely:' Nagnakatre ty Israely hiala bakao Egypta Raho naho nagnavotre anareo teo amity tagna reo Egyptiana, naho tamity tagna reo fanjaka iaby ze nampijale anareo.' ¹⁹ Fa amizao nilietre ty Zagnaharenareo, ze nagnavotre anareo tamireo loza vaho fijaleanareo iaby nareo; naho nirehake tamine nareo hoe:' Mametraha mpanjaka eo aminay.' Amizao atoloro eo agnoloa Yaveh arake reo fokonareo vaho reo vondronareo ty vatanareo." ²⁰ Le niharine Samoela reo foko Israely iaby, naho ty foko Benjamina ro voafily. ²¹ Bakeo le nientene niharine ty vondro iereo ty foko Benjamina; naho ty foko Matrita ro voafily, naho Saoly anadahy Kisy le voafily. Fa laga fa nindeha nipay aze iereo, le tsy nimete hisake re. ²² Naho ty ndaty le te-hametram-pagnotanea beibey kea tamin'Agnahare ty hoe:" Mboe misy lahilahy hafa hoavy vao?" Yaveh namale hoe:" Nagnaja ty vatane eo amireo enta re." ²³ Le nilay iereo naho nangalake Saoly bakao. Laha fa nitsanga teo amireo ndaty re, le lava mihoatre ty ndaty iaby bakeo antsorone naho ambone re. ²⁴ Le hoe Samoela tamireo ndaty hoe:" Hisanareo vao ty lahilahy ze le fa voafily Yaveh? Tsy misy ndaty manahake aze eo amity vahoake iaby!" Ty ndaty iaby nikaike ty hoe:" Ho ela velo ty mpanjaka!" ²⁵ Le nirehake tamity vahoake reo fomba vaho reo fotsipeke ty fanjaka ty Samoela, nanoratre reo tao agnate boke, naho nametrake zay teo agnoloa Yaveh. Bakeo le nalefa Samoela ty vahoake iaby, ho agne amity tragnone iaby. ²⁶ Noly tagne antragnone tao Gibea avao kea ty Saoly, naho niarake tamireo lahilahy mafe ilane, ze kinasan'Agnahare ty arofone. ²⁷ Fa ty ilane tamireo ndaty tsy misy dikane nanao hoe:" Ino ro hahafaha lahilahy io magnavotre anay?" Nagnaraty Saoly reo ndaty reo naho tsy mba ninday fagnomea ho aze. Fa nitsy kea ty Saoly.