¹ Bakeo Nahasy Amonita nindeha naho nitobe tagne Jabesi-Gileada. Hoe ty ndaty Jabesy iaby tamy Nahasy hoe:" Manova fagnenkea miarake aminay, le hanompo anareo zahay." ² Le namale ty Nahasy Amonita hoe:" Amize lily zao ro hanovako fifagnenkea aminareo, le ty hitsoborako ty maso ankavananareo iaby, naho zay ro fomba hindaisa fahafaham-baraka eo amy Israely iaby." ³ Naho ty olobey Jabesy namale aze hoe:" Engao arere zisike ty fito andro zahay, mba hahafahanay mandefa irake mbaeo amity fari-tane Israely iaby. Naho, laha tsy misy na raike aza hamonje anay, le hanolo-bata aminareo zahay." ⁴ Le niavy tagne Gibea, ty nitoboha Saoly reo irake, naho nirehake ze zaka-niseho tamity vahoake. Le nitagny mafe ty vahoake iaby. ⁵ Naho nagnorike reo agnombe bakao ambaibo Saoly. Hoe ty Saoly:" Ino ro mahazo reo vahoake ka mampitagny iereo?" Le rineha iereo tamy Saoly ze nirehafe ty lahilahy Jabesy. ⁶ Laha fa rey Saoly ze nirehafe iereo, le nipoke teo amine ty fagnahin'Agnahare, ka meloke vatane re. ⁷ Nangalake jokan'agnombe raike re, ka tinampantampane, naho nalefane nagnera ty Israely iaby niarake tamireo irake reo. Hoe re:" Iaby ze tsy hiakatre hagnorike Saoly vaho Samoela, le hoe rey ro hanova ty agnombene." Naho nipoke tamity vahoake ty horohoro Yaveh, ka niarake-niakatre manahake ty ndaty raike iereo. ⁸ Laha fa namory iereo tagne Bezeka re, le nisy telo-hetse ty vahoake Israely, naho ty ndaty Joda le telo ale. ⁹ Hoe iereo tamireo irake ze niavy:" Hirehake amity ndaty Jabesi-Gileada nareo ty hoe:' Hamaray, amity andro mahamay ty andro, le ho voavonje nareo." Ka nindeha reo irake naho nirehake tamity ndaty Jabesy, naho fale iereo. ¹⁰ Le hoe ty ndaty Jabesy tamy Nahasy:" Hanolo-bata aminao zahay hamaray, le afake ataonao aminay ze hisanao fa mete aminao." ¹¹ Ty hamaraigne le natobo Saoly tao agnate vondrogna telo ty vahoake. Le nimbaeo agnivo ty tobe tamity fiambena mare iereo, naho nanafike iereo ka naharese reo Amonita madram-pahamay ty andro. Reo ze mboe velo naele, mba tsy hisia ty roe hiarake-tavela. ¹² Le hoe ty vahoake tamy Samoela:" Ia ty nirehake ty hoe:' Hanjaka eto amintika vao ty Saoly?' Ento ndaty reo, mba hahafahantika mamono iereo." ¹³ Fa hoe ty Saoly:" Ao mba tsy hisy homate na raike aza amity andro toy, satria nagnavotre Israely Yaveh androany." ¹⁴ Bakeo le hoe Samoela tamity vahoake:" Andao, hindeha tika hindeha agne Gilgala naho hagnavao ty fanjaka agne ndraike." ¹⁵ Ka nindeha tagne Gilgala ty vahoake iaby naho nanao Saoly ho mpanjaka teo agnoloa Yaveh tagne Gilgala. Tagne ro nanova iereo soro fagnatem-pilongoa teo agnoloa Yaveh, naho saoly vaho reo lahilahy Israely le lako hafalea vatane.