¹ Naho reo Filistina namory reo tafigniereo hialy. Nivory tao Soko, ty agne Joda iereo. Nitobe teo ampagnivoa Soko vaho Azeka, tao Efesa-damima iereo. ² I Saoly vaho reo lahilahy Israely le nivory naho nitobe tao amity Baibo Elaha, naho nandamy ty lahara iereo amity aly mba hignehetre amireo Filistina. ³ Nitsanga teo ambone Vohitse tegne andafe reo Filistina, naho ty Israely nitsanga teo ambone Vohitse tegne andafe naho baibo ro ampagnivoa iereo. ⁴ Lahilahy matanjake raike ro niakatre bakao amity tobe reo Filistina, lahilahy raike atao ty hoe Goliata bakagne Gata, te ene metatre naho zehe raike ty halavane. ⁵ Nanao satroke fiaro-loha varahy teo amity lohane re, naho niakanjo fiaro-tratra. Varahy dime arivo sekele ro lanja ty akanjo. ⁶ Nanao fiaro-ranjo varahy vaho lefo varahy teo ampagnivoa ty sorone re. ⁷ Bey ty taran-defone, miarake amity taly volomboloe fanoraha aze manahake ty taly eo amity volin-teno ty mpaneno. Ty loha ty lefone le vy milanja sekele enenjato. Nindeha teo alohane ty mpinday ampingane. ⁸ Nitsanga re naho nikorake mafe tamireo lahara ty Israely:" Nagnino nareo ro avy hilahatre hialy? Feie tsy Filistina vao raho, naho nareo mpanompo Saoly? Mifilia lahilahy raike aminareo naho ao re hizotro amiko etoy. ⁹ Laha mahay mialy amiko naho mahafate ahy re, le ho mpanompo nareo zahay. Fa laha maharese aze naho mahafate aze raho, le ho mpanomponay nareo naho hiasa ho anay." ¹⁰ Le hoe ndraike ty Filistina hoe:" Manao ambe amireo lahara Israely raho androany. Ameo lahilahy raike raho mba ho afake hiara-hialy zahay." ¹¹ Laha fa naharey ze nirehafe ty Filistina ty Saoly vaho ty Israely iaby le kivy iereo, naho natahotre vatane. ¹² Naho Davida le anadahy ty Efraita bakagne Betlehema ao Joda, Jese ro agnarane. Nanagnanake lahy valo re. Jese le fa lahilahy antetre tamity andro Saoly, vatane antetre vatane teo amireo lahilahy. ¹³ Ty zokene telo amireo anadahy Jese le nagnorike Saoly tagne amity aly. Ty agnara reo anadahine telo ze nimbaeo amity aly reo le i Eliaba ro voalohane, faharoe kea ty Abinadaba, naho i Sama ro fahatelo. ¹⁴ Davida ro farane zaine. Reo telo zokene vatane ro nagnorike Saoly. ¹⁵ Naho Davida le nindeha vaho nihere teo amity tafike Saoly vaho reo agnondrin-draene tao Betlehema, mba hamaha iereo. ¹⁶ Marain-tsy hariva zisike ty efa-polo andro ty lahilahy Filistina matanjake ro niavy niharineke mba hial y. ¹⁷ Le hoe Jese tamy Davida anane hoe:" Mangala raike efaha amity vare voaende toy naho ty mofo folo toa ho ahy reo rahalahinao, naho ento malaky agne amity tobe reo rahalahinao toa. ¹⁸ Ento agne amity kapitene reo arivo avao kea ty fromazy folo toa. Henteo hoe manao akore reo rahalahinao naho mindaisa porofo mihere atoy te tsy magnahy iereo. ¹⁹ Miarake amy Saoly vaho reo lahilahy Israely iaby agne amity baibo Elaha, mialy amireo Filistina reo rahalahinao." ²⁰ Nifoha aloha Davida ty maray naho namototre ty agnondry aman'ose niarahe ty mpiarak'agnondry raike. Nangalake reo raraha re naho lasa, arake ty nandilia Jese aze. Niavy teo amity tobe re laha igne nindeha niakatre teo amity baibon'aly mba hikoike aly igne ty tafike. ²¹ Bakeo le nilahatre hialy ty Israely vaho reo Filistina, tafike mandietre tafike. ²² Nagnenga reo fanagnane tamity mpita reo enta re, nilay nimbaeo amity tafike, naho nifankahisake tamireo rahalahine. ²³ Laha igne nirahake tamiereo igne re, ty lahilahy mafe, ty Filistina bakagne Gata, atao ty hoe:" Goliata, le niakatre bakao amity lahara reo Filistina, ka nirehake reo rehake ze le fa nambarane taloha, le rey Davida iereo. ²⁴ Laha fa nahisake ty lahilahy reo ndaty Israely iaby, le nilay aze naho natahotre vatane iereo. ²⁵ Reo lahilahy Israely nanao ty hoe:" Hisanareo vao igne lahilahy miakatre igne? Avy mba hipay ty Israely re. Hagnomea harea bey ze mamono aze ty mpanjaka, naho hagnomea aze ty anakampelane ho valine re, naho hagnafake ty fokon-draene amity fandoavan-ketra ao Israely." ²⁶ Hoe ty Davida tamireo lahilahy ze nitsanga teo agnilane:" Ino ro hatao ho ahy ty lahilahy ze mamono ty Filistina ty vaho hagnafake ty fahafaham-baraka amy Israely? Ia ty Filistina tsy voa-savatse toy ro mipay reo tafike ty Zagnahare velo?" ²⁷ Le nahere ty ndaty ze nirehafe iereo naho nirehake tamine re ty hoe:" Le hoe zay avao ro hatao ho ahy ty lahilahy ze mamono aze." ²⁸ Naharey aze nirehake tamireo lahilahy ty Eliaba zokene voalohane. Le nirehetre tamy Davida ty helo Eliaba, ka hoe re:" Nagnino riha ro mizotro etoy?" Ia ro nagnenganao reo agnondry tsiampe agne antane efetre? Haiko ty avognavo vaho ty vande ao agnate ty arofonao; fa niavy nimbetoa riha mba hahisake ty aly." ²⁹ Hoe ty Davida:" Ino zao ro nataoko? Feie tsy fagnontanea avao vao zay?" ³⁰ Niala teo amine nimbaeo amity hafa re, naho nirehake hoe zay avao. Le namale manahake ty taloha avao ty ndaty. ³¹ Laha fa rey reo safa ze nirehafe Davida, le nagnere zay tamy Saoly reo miaramila, naho nampagnirake ho ahy Davida re. ³² Bakeo le hoe ty Davida tamy Saoly:" Ao tsy hisy lahilahy ho kamo noho Filistina ao ty arofone; ty mpanomponao le hindeha ka hialy amio Filistina ao." ³³ Hoe ty Saoly tamy Davida:" Tsy afake hindeha handietre io Filistina ao naho hialy amine riha; satria mboe kele riha, naho re le lahilahin'Aly hatriniela." ³⁴ Fa hoe Davida tamy Saoly:" Le fa zatre niarake ty agnondrin-draeko ty mpanomponao. Laha fa niavy vaho mangalake anak'agnondry amity agnondry ty liona na bera, ³⁵ le nagnia zay vaho nagnisy zay raho, naho nagnavotre zay bakao amity vavane. Laha fa nitsanga handietre ahy re, le tratreko tamity volombavane, nasiako re, naho mateko. ³⁶ Nahafate liona vaho bera ty mpanomponao. Naho Filistina tsy misavatse io le hanahake ty raike amio. satria nipay reo tafike ty Zagnahare velo re." ³⁷ Hoe Davida:" Nagnavotre ahy tamity tombo ty liona vaho ty tombo ty bere Yaveh. Hagnavotre ahy amity tagna reo Filistina ao re." Le hoe ty Saoly tamy Davida:" Mindehana, ka hiomba anao anie ty Yaveh." ³⁸ Nampiakanjoe Saoly tamity akanjo fialiane ty Davida. Natobone teo amity lohane ty satroke fiaro-loha varahy, naho nampiakanjoene akanjo fiaro-tratra re. ³⁹ Namehe ty mesone tamity akanjo fialiane ty Davida. Fa tsy afake namindra re, satria mboe tsy nahay reigne. Le hoe ty Davida tamy Saoly:" Tsy afake hiakatre hialy miarake amitone raho, satria mboe tsy nanare tamitoa." Ka nafaha Davida reo. ⁴⁰ Nafahane tegne antagnane ty tehe naho ninday vato malama dime bakao amity baibon-driake re; naho natobone tao amity kitapone fiarakan-drovane reo. Tegne antagnane ty pilatse laha fa namonje ty Filistina re. ⁴¹ Niavy naho namonje Davida ty Filistina, naho talohane teo ty mpinday ty ampingane. ⁴² Laha fa nanente ty magnodidy ka nahisake Davida ty Filistina, le nanao tsinontsino aze, satria mboe kolo re, mena volo, naho soa tarehe. ⁴³ Le hoe ty Filistina tamy Davida:" Amboa vao raho, ro avy miarake amity hetae amiko eto riha?," naho nagnozo Davida tamireo zagnaharene ty Filistina. ⁴⁴ Hoe ty Filistina tamy Davida:" Mindeha amiko eto, le hameako ho ahy reo voro egne andagnitse vaho ho ahy reo bibin'ala agne ambaibo ty nofonao." ⁴⁵ Namale ty Filistina ty Davida hoe:" Avy amiko eto miarake amity meso, naho lefo riha. Fa zaho avy aminao eo amity agnara Yaveh tompo ty maro, ty zagnahare ty tafike Israely, ze pinainao. ⁴⁶ Androany le hagnomea ahy ty haharesea anao Yaveh, ka hamono anao raho naho nagnafake ty lohanao amity vatanao. Androany le hagnomea ty fate ty tafike ty Filistina ho ahy reo voro egne andagnitse vaho ho ahy reo bibin'ala antane etoy raho, mba hahaia ty tane iaby fa misy Zagnahare ao Israely, ⁴⁷ naho hahaia reo voro iaby reo fa Yaveh le tsy magnomea faharesea amity meso na lefo. Fa ahy Yaveh ty aly, ka hanolotre anareo eo antagnanay re." ⁴⁸ Laha fa nitsanga vaho namonje Davida ty Filistina, le nilay malaky nimbaeo amity tafike fahavalo Davida mba hanalaka aze. ⁴⁹ Nampilirene tao agnate ty kitapone ty tagnane, nangalake vato bakao re, nataone tamity pilatse zay, ka nahavoa ty Filistina teo amity handrine. Nilenteke tao amity handry ty Filistina ty vato, ka nitonta ty vatane teo amity tane. ⁵⁰ Rese Davida tamity pilatse vaho vato ty Filistina. Voane ty Filistina ka matene. Tsy nisy meso tegne antagna Davida. ⁵¹ Bakeo le nilay Davida ka nitsanga teo ambone ty Filistina vaho nangalake ty mesone, nagnakatre zay bakao amity tragnone, namono aze, naho nandily ty lohana tamizay. Laha fa hisa reo Filistina fa mate ty lahilahy mafe iereo, le nilay iereo. ⁵² Bakeo le nitsanga vaho nikorake reo lahilahy Israely vaho Joda, naho nagnia reo Filistina zisikagne amity baibo vaho reo vavahady Ekrona. Reo Filistina mate le niroro teo amity lala mbaeo Saraima, vaho ty lala iaby mbaeo Gata naho Ekrona. ⁵³ Nihere bakamity fagniagna reo Filistina ty ndaty Israely, naho nandrava ty tobe iereo. ⁵⁴ Nalae Davida ty loha ty Filistina naho nientene tagne Jerosalema zay, fa ty akanjo le natobone tao amity tragnone. ⁵⁵ Laha fa nahisake Davida niakatre nandietre ty Filistina Saoly, le hoe re tamy Abnera, kapitene ty tafike:" Ry Abnera, anagnia io ajalahy io?" Le hoe ty Abnera:" Laha mboe velo kea riha, ry mpanjaka, le tsy haiko" ⁵⁶ Ty mpanjaka nanao ty hoe:" Agnontaneo reo ze mete mahay, hoe anagnia io ajalahy io." ⁵⁷ Laha fa nihere bakagne amity famonoa ty Filistina ty Davida, le nangalake aze ty Abnera, naho ninday aze teo agnoloa Saoly niarake tamity loha ty Filistina tegne antagnane. ⁵⁸ Hoe ty Saoly tamine:" Anagnia riha, ry ajalahy?" Namale ty Davida hoe:" Ana i Jese Betlehemita mpanomponao raho."