¹ Hoe ty Yaveh tamy Samoela ty hoe:" zisike ombia riha ro handala i Saoly, satria ka niliereko tsy ho mpanjaka magnera ty Israely re? Feno diloilo ty trifanao naho mindehana. Hiraheko ho agne amy Jese bakagne Betlehema riha, fa le fa nifily mpanjaka ho ahy amireo anadahine raho." ² Hoe ty Samoela ty hoe:" Akore ro fomba hindehanako? Laha maharey zay Saoly, le ho vonoene raho." Hoe ty Yaveh hoe:" Mindaisa agnombevave kele miarake aminao naho rehafo ty hoe:' Avy hanao soro ho ahy Yaveh raho.' ³ Kaiho ho amity soro Jese, le hatoroko anao ze hataonao. Hagnosotre ty raike ze hataliliko anao ho ahy riha." ⁴ Nanao arake ze nirehafe Yaveh ty Samoela naho nindeha tagne Betlehema. Natahotre reo olobey teo amity tana laha fa niavy hifankahisake amine iereo naho nanao ty hoe:" Avy mba hilongo vao riha?" ⁵ Hoe iereo ty hoe:" Hilongo; avy hanao soro ho ahy Yaveh raho. Miomana nareo hanoka ty vatanareo naho miaraha amiko ho agne amity fanova soro." Le nanoka Jese vaho reo anadahine re naho nagnafatre iereo ho agne amity fanova soro. ⁶ Laha fa niavy iereo, le nanente Eliaba re naho nirehake tamity vatane hoe nitsanga nagnoloa aze vatane ty voahoso Yaveh. Feie hoe ty Yaveh tamy Samoela ty hoe:" Ko manente ty toerane ambalike, na ty halavane; satria le fa nilietre aze raho. ⁷ Fa Yaveh le tsy manente manahake ty hente ty ndaty; ty ndaty manente ty toera ambalike, fa Yaveh kea manente ty ao agnarofo." ⁸ Bakeo le nikaike i Abinadaba ty Jese naho nampandrio aze teo agnoloa Samoela. Le hoe ty Samoela hoe:" Tsy nifily io raike eo avao kea Yaveh." ⁹ Bakeo le nampandrio Sama Jese, feie hoe ty Samoela hoe:" Tsy nifily io avao kea ty Yaveh." ¹⁰ Nampandriogne Jese teo agnoloa Samoela ty fito tamireo anadahine. Le hoe Samoela tamy Jese hoe:" Tsy nifily ania ia tamireo Yaveh." ¹¹ Naho hoe Samoela tamy Jese hoe:" Eto iaby vao reo anagnao lahy iaby?" Namale re hoe:" Mboe misy ty anako faralahy sisa, fa miarake agnondry re." Hoe ty Samoela tamy Jese ty hoe:" Mindehana naho alao re; satria tsy hitoboke tika mandram-piaviane eto." ¹² Nindeha Jese naho ninday aze nilitre. Naho i ajalahy io le mena volo vaho baribary maso naho soa toera ambalike. Hoe Yaveh ty hoe:" Mitsangana, hosoro re; fa io ro ie." ¹³ Naho le rinae Samoela ty trifa misy ty diloilo naho hinosone teo agnivo reo rahalahine re. Niavy tamy Davida ty fagnahy Yaveh tamize andro zay. Bakeo le nitsanga ty Samoela naho nindeha tagne Rama. ¹⁴ Naho nienga Saoly ty fagnahy Yaveh, ka nisy fagnahy raty bakamy Yaveh nampitahotre aze. ¹⁵ Hoe reo mpanompo Saoly tamine hoe:" Ingo, misy fagnahy raty bakamin'Agnahare magnoronta anao. ¹⁶ Ao are ty tomponay handily reo mpanomponao ze eo agnoloanao mba hipay lahilahy raike ze feno fahaia amity fititiha lokanga. Naho laha fa aminao eo ty fagnahy raty bakamin'Agnahare, le hititike zay re naho ho soa riha." ¹⁷ Hoe Saoly tamireo mpanompone hoe:" Ipaio lahilahy ze afake mititike soa raho naho ento amiko atoy re." ¹⁸ Le namale ty raike tamireo ajalahy, naho nanao ty hoe:" Le fa nahisake ty anadahy Jese Betlehemita raho, ze tena mahay mititike, mafe, lahilahy bey herem-po, lahilahin'Aly, mahay mitsara, lahilahy soa tarehe; naho miomba aze ty Yaveh." ¹⁹ Ka le nandefa mpinday talily tagne amy Jese ty Saoly, naho nanao ty hoe:" Alefaso amiko ty Davida anadahinao, ty miarake agnondry." ²⁰ Nangalake borike raike nitao mofo, divay siny raike, vaho anak'ose ty Jese, naho nandefa iereo niarake tamy Davida anadahine ho agne amy Saoly. ²¹ Bakeo le niavy teo amy Saoly ty Davida naho nanomboke ty fanompoane. Tea Saoly loatre re, ka lasa mpinday ty fialiane. ²² Nagnirake Jese ty Saoly nanao ty hoe:" Ao ty Davida hitsanga eto agnoloako, satria nahisake hatea teo amasoko re." ²³ Isake ty teo amy Saoly ty fagnahy raty bakamin'Agnahare, le nangalake ty lokanga ty Davida naho nititike zay. Ka velombelo vaho fale ty Saoly, naho niala teo amine ty fagnahy raty.