¹ Hoe ty Samoela tamy Saoly ty hoe:" Yaveh nagnirake ahy hagnosotre anao ho mpanjaka eo amity Israely ndatine. Henanezao le dranjigno ty safa Yaveh. Ezao ro safa Yaveh tompo ty maro:' Le fa hisako ty natao Amaleka tamity vahoake Israely tamity nandierane iereo tegne andala, laha fa niakatre bakagne Egypta iereo. ³ Henanezao mindehana ka tafiho ty Amaleka naho poteho vatane iaby ze fanagna iereo. Ko miaro iereo, fa sambe vono na lahy na vave, ty kolo vaho ty aja, ty agnombe vaho ty agnondry, naho ty rameva vaho ty borike."' ⁴ Nampikaike ty vahoake Ty Samoela naho nagnisake iereo tao amity tana Telaima: lahilahy nindeha tomboke roe-hetse, naho lahilahy Joda ray ale. ⁵ Bakeo ty Saoly le niavy tagne amity tana Amaleka naho niambe tagne ambaibo. ⁶ Le hoe Saoly tamireo Kenita:" Mindehana, midisoa, miakara bakeo amireo Amalekita, mba tsy handravako anareo miarake amiereo. Fa nanoro hasoam-pagnahy tamity Israely iaby nareo, tamy niavy bakagne Egypta iereo." Laha zao le niala teo amireo Amalekita reo Kenita. ⁷ Bakeo le nagnisy reo Amalekita ty Saoly, zisikagne Havilaha ka hatragne Sora, ty agne antignana Egypta. ⁸ Naho nataone sambo-belo ty Agaga mpanjaka Amalekita; rinavane vatane tamity lela-meso ty vahoake iaby. ⁹ Fa niaro i Agaga, amity agnondry, agnombe, agnombe-vave mifehe, naho anak'agnondry soa vatane ty Saoly vaho reo ndaty. Ty zaka iaby ze soa, le tsy sinimba iereo. Fa pinote iereo kea ty zaka iaby ze rinaty vaho tsy misy dikane. ¹⁰ Le niavy tamy Samoela ty safa Yaveh, nanao ty hoe: ¹¹ "Nanegnenako ty nagnanovako Saoly ho mpanjaka, fa niala tamity fagnoriha Ahy re naho tsy nanao ty liliko." Meloke ty Samoela; nikorake mafe tamy Yaveh re zisike ty hale iaby. ¹² Nifoha aloha ty Samoela mba hifankahisake amy Saoly ty maraindray. Natalily tamy Samoela hoe:" Niavy tagne Karmela ty Saoly naho nananga tsangam-bato ho ahy ty vatane, naho nitoli-doha ka nanohy nizotro nimbaeo Gilgala." ¹³ Le niavy tagne amy Saoly ty Samoela, naho hoe ty Saoly tamine:" Hehe voatahy Yaveh riha! Lefeko ty lily Yaveh." ¹⁴ Hoe Ty Samoela hoe:" Ino ze fitsero ty agnondry ao antsofiko zao, vaho ty fitsero ty agnombe ze reiko zao?" ¹⁵ Namale Saoly ty hoe:" Le fa niente iereo bakamireo Amalekita zay. Fa niaro reo agnondry vaho agnombe soa vatane reo ndaty, mba hanova soro ho ahy Yaveh Zagnaharenao. Le fa rinavanay vatane ty sisa tavela." ¹⁶ Le hoe Samoela tamy Saoly ty hoe:" Lignaso, le hambarako anao ze natalily Yaveh tamiko tamity hale." Le hoe ty Saoly tamine hoe:" Mirehafa!" ¹⁷ Hoe ty Samoela:" Na le kele eo amasonao avao aza riha, feie tsy natao ho loha reo foko Israely vao riha? Naho Yaveh nagnosotre anao ho mpanjaka eo amy Israely, ¹⁸ naho Yaveh nagnirake anao tamity lalanao nanao hoe:' Mindehana naho aravao vatane reo mpanonta, reo Amalekita, naho mialia amiereo zisike-hirava iereo.' ¹⁹ Nagnino riha ro tsy nagnenke ty feo Yaveh, fa nangalake reo babo kea riha naho nanao ze raty teo amaso Yaveh?" ²⁰ Le hoe ty Saoly tamy Samoela:" Nangnenke ty feo Yaveh vatane raho, naho le fa nindeha tamity lala ze nagniraha Yaveh ahy. Le fa tsinepako ty Agaga, mpanjaka ty Amaleka, naho le fa rinavako vatane reo Amalekita. ²¹ Feie nangalake ty ilane tamireo babo__agnondry vaho agnombe, ty zaka soa vatane natoka ho ahy ty fandrava, mba hanova soro ho ahy Yaveh Zagnaharenao agne Gilgala ty ndaty." ²² Namale ty Samoela hoe:" Mete ty fagnatetre oroa vaho ty soro vatane vao ty Zagnahare, manahake ty amity fagnenkea ty feo Yaveh? Soa noho ty soro ty fagnenkea, naho ty midranjy ro soa mihoatre ty havondra ty agnondry lahy. ²³ Fa ty vande le manahake ty hadisoa ty sikily, naho ty hamafean-doha le manahake ty haratia vaho heloke. Satria le fa nilierenao ty safa Yaveh, le nilietse anao tsy ho mpanjaka avao kea re." ²⁴ Le hoe Saoly tamy Samoela hoe:" Le fa nanonta raho; satria nandika ty lily Yaveh vaho reo rehanao, satria natahotre ty ndaty raho naho nagnenke ty feo iereo. ²⁵ Amizao, mba mamotora rie ty heloko, naho miheregna miarake amiko mba hanompoako Yaveh." ²⁶ Hoe ty Samoela tamy Saoly hoe:" Tsy hihere hiarake aminao raho; satria nilietse ty safa Yaveh riha, naho le fa nilietse anao tsy ho mpanjaka eo amity Israely ty Yaveh.' ²⁷ Laha nitoli-doha hiala ty Samoela, le nitana Saoly ty moron-tombon'akanjone, ka niriatre zay. ²⁸ Hoe ty Samoela tamine:" Le fa nafaha Yaveh hiala aminao ty fanjaka Israely androany naho le fa nameane ho ahy ty namanao, zay soa naho riha. ²⁹ Naho kea, ty Tanja Israely le tsy havande na hagnova ty hevene kea; fa tsy ndaty Re, ka hiova hevetre." ³⁰ Le hoe Saoly ty hoe:" Le fa nanonta raho. Feie mba ameo hasy eo agnoloa reo olobey ty vahoakeko vaho eo agnoloa ty Israely rie raho henanezao. Miaraha mihere amiko ndraike, mba hanompoako Yaveh Zagnaharenao." ³¹ Ka nihere nagnorike Saoly ndraike ty Samoela, naho nanompo Yaveh ty Saoly. ³² Le hoe ty Samoela ty hoe:" Ento amiko atoy ty Agaga mpanjaka reo Amalekita." Le nimbaeo amine ty Agaga mifehe amity sene-vy naho nanao hoe:" Le fa lasa vatane ty farare ty fate." ³³ Namale Samoela hoe:" Arake ty nagnanova ty mesonao reo ampela ho tsy miterake, le tsy hiterake hoe zay kea ty renenao eo amireo ampela." Le tinampan-tampa Samoela teo agnoloa Yaveh tagne Gilgala ty Agaga. ³⁴ Nimbaeo Rama ty Samoela, naho Saoly niakatre tagne antragnone tagne Gibea Saoly. ³⁵ Tsy nahisake Saoly ty Samoela zisikamity andro nimatezane, fa nalahelo mafe Saoly re. Naho nanegne Yaveh ty amity nanovane Saoly ho mpanjaka teo amity Israely.