¹ Andro raike, ty Jonatana ana Saoly nanao tamity ajalahy mpinday ty fialiane hoe:" Andao, hindeha tika hitsake egne amity tobe miaramila ty Filistina egne andafe." Nefa tsy nirehafene ty raene. ² Nitoboke teo amity magnodidy Gibea amity hetaen'ampongambein-dagnitse ze tao Migrona ty Saoly. Teo ho eo amity lahilahy enenjato teo ro niarake tamine, ³ agnate zay Ahia, ana Ahitoba (rahalahy Ikaboda) ana i Finehasa ana Ely, ty mpisoro Yaveh tao Silo, niankanjo efoda. Tsy hay ty vahoake hoe lasa ty Jonatana. ⁴ Teo amity lafy kirai-kiraike amity fitana ze nirie Jonatana hindehana mba hindehana agne amireo miaramila ty Filistina, le nisy haram-bato teo amity ilane naho haram-bato hafa teo amity ilane. Ty haram-bato raike natao ty hoe Bozeza naho ty haram-bato raike natao ty hoe Sene. ⁵ Ty haram-bato raike nitsanga teo avaratre nagnoloa Mikmasy, naho ty hafa tantimo eo agnoloa Geba. ⁶ Hoe Jonatana tamity ajalahy mpinday ty fialiane:" Andao, hindeha tika hitsake egne amity miaramila reo nama tsy voa-savatse reo. Asa Yaveh mba hiasa ho antika, fa tsy misy na ino ino mahasaka Yaveh amity famonjea amity maro na amity ndaty tsy ampe." ⁷ Namale ty mpinday ty fialiane hoe:" Anovo ty zaka iaby ze amponao ao. Mindeha, ingo, miarake aminao raho, mba hagnenke reo baikonao iaby." ⁸ Le hoe ty Jonatana hoe:" Hitsake ho egne amireo lahilahy tika, naho hiboake eo amiereo. ⁹ Laha mirehake amintika iereo ty hoe:" Mandignasa egne mandram-piavianay egne aminareo'__le hijano eo amity toerantika tika ka tsy hitsake egne amiereo. ¹⁰ Kanefa laha mamale iereo ty hoe:' Mindeha aminay atoy', le hitsake tika; satria le fa natolo Yaveh ho eo antagnatika iereo. Zay ro ho famantara ho antika." ¹¹ Ka sambe niboake teo amity tobe miaramila ty Filistina iereo. Hoe reo Filistina:" Ingo, miboake bakao amireo lavake ty nagnaja iereo ty vatagnireo Hebreo." ¹² Le nikaike i Jonatana vaho ty mpinday ty fialia reo lahilahy ty miaramila, ka nanao ty hoe:" Mindehana aminay atoy, le hanoroanay raraha nareo." Hoe ty Jonatana tamity mpinday ty fialiane:" Magnoriha ahy baka afara, satria le fa natolo Yaveh eo antagna Ysraely iereo." ¹³ Nanganike tamity tagnane vaho ty tombone ty Jonatana, naho nagnorike tafara ty mpinday ty fialiane. Vinono teo agnoloa Jonatana reo Filistina, naho ty mpinday ty fialiane namono ty ilane tafarane ao. ¹⁴ Ze fanafiha voalohane ze natao Jonatana vaho ty mpinday ty fialiane zay, le namono tokone ho lahilahy roapolo tao amity faritre ty antsasa-hektara. ¹⁵ Nisy savorovoro bey tao antobe, tagne ambaibo, vaho teo amireo vahoake. Na le ty miaramila vaho reo mpanafike aza le natahotre. Nihovitse ty tane, naho nisy tahotre foloay. ¹⁶ Naho reo mpitily Saoly tagne Gibea Benjamina nanente; nizara ty vahoake ty miaramila Filistina, naho nimbetia mberoa iereo. ¹⁷ Le hoe Saoly tamity vahoake ze niarake tamine:" Isaho naho henteo ze tsy eto ty baka amintika." Laha nagnisake iereo, le i Jonatana vaho ty mpinday ty fialiane ro tsy teo. ¹⁸ Hoe ty Saoly tamy Ahia:" Andeso atoy ty tomabilen'Agnahare," fa tagne amity vahoake Israely zay tamize andro zay. ¹⁹ Laha mboe nirehake tamity mpisoro ty Saoly, le nitohy vaho nitombo ty korakorake tao antobe ty Filistina. Le hoe Saoly tamity mpisoro:" Ahemoro ty tagnanao." ²⁰ Nivory naho nindeha tagne agnaly ty Saoly vaho ty vahoake iaby ze niarake tamine. Ty meso ty Filistina kirai-kiraike le nagnisy ty mpiara-belo tamine, naho nisy savorovoro bey vatane. ²¹ Naho reo Hebreo ze niarake tamireo Filistina taloha reo, vaho ze nindeha niarake tamireo tagne antobe aza le mba niharo tamireo Israelita ze niarake tamy Saoly vaho Jonatana. ²² Laha fa rey ty ndaty Israely iaby ty nihaja tagne amireo tazoa agnila Efraima fa nilay reo Filistina, le hinia iereo zisikagne agnaly reo. ²³ Ka tamize andro zay le nagnavotre ty Israely Yaveh, naho nihoatre zisikagne Betavena ty aly. ²⁴ Ore ty ndaty Israely tamize andro zay satria nametrake ty vahoake tao ambane fifanta naho nanao ty hoe:" Voaozo ty ndaty ze mihina sakafo mandram-pahariva naho zaho le hamale fate eo amireo fahavaloko." Le tsy nisy ndaty bakao amity toko nanendre sakafo. ²⁵ Naho nilitre tao agnala ty vahoake iaby naho nisy tantele teo amity tane. ²⁶ Laha fa nilitre tao agnala ty vahoake, le nily tanteley, nefa tsy nisy ndaty nanao ty tagnane tambavane ao satria natahotre ty fifanta ty vahoake. ²⁷ Nefa tsy rey Jonatana fa namehe ty vahoake tamity fifanta ty raene. Le namere ty loha ty tehene ze tegne antagnane re naho nitsoboke zay tao amity tohon-tantele. Nagnafake ty tagnane teo ambavane re, ka nazava ty masone. ²⁸ Naho ty raike tamity vahoake, namale ty hoe:" Vinesa ty raenao tamity fifanta mafe vatane ty vahoake, tamity nirehafane hoe:' Voaozo ty ndaty ze mihina sakafo amity andro toy,' na le maleme ty hakere aza ty vahoake." ²⁹ Le hoe Jonatana:" Nagnoronta ty tane ty raeko. Henteo fa lasa nazava ty masoko satria nagnandra kele tamity tantele toy raho. ³⁰ Maike fa laha nihina ampalalafa tamize voaseresere tamireo fahavalo iereo ze hisane androany ty ndaty? Satria tsy foloay teo amireo Filistina ty vono henanezao." ³¹ Tamio andro o le nanafike reo Filistina nanomboke tao Mikmasy zisikagne Aialona iereo. Rerake vatane ty vahoake. ³² Nilailay mafe tamireo voaseresere ty vahoake ka nangalake agnondry, agnombe vaho anak'agnombe, naho namono reo teo amity tane. ³³ Le hoe iereo tamy Saoly:" Ingo, nanonta tamy Yaveh tamity fifanta niarake tamity lio ty vahoake." Hoe ty Saoly:" Nanao ty tsy mete nareo. Henanezao, mangala vato foloay eto ho ahike." ³⁴ Hoe ty Saoly:" Miakara bakeo amity vahoake, naho ambarao iereo ty hoe:' Ao ty ndaty kirai-kiraike hinday ty agnombene vaho ty agnondrine, vono eto reo, naho hano. Ko manonta amy Yaveh amity fihinana miarake amity lio."' Ka ty kirai-kiraike tamity vahoake le ninday ty agnombene niarake tamine tamy haleke eo naho namono zay teo. ³⁵ Nagnamboatre alitara ho ahy Yaveh ty Saoly, ty alitara voalohane namboarene ho ahy Yaveh. ³⁶ Le hoe Saoly:" Andao tika hagnia reo Filistina amity hale naho hanimba iereo zisike-maray; ndao tsy engantika hisy ho velo na le raike amiereo aza." Namale iereo ty hoe:" Anovo ty zaka iaby ze mete ho soa aminao." Nefa hoe ty mpisoro:" Ndao tika hamonje an'Agnahare eto." ³⁷ Nagnontane an'Agnahare ty Saoly hoe:" Tokone hagnia reo Filistina vao raho?" Hanolotre iereo eo antagna ty Israely vao riha? Nefa tsy namale aze ty Zagnahare tamio andro o. ³⁸ Le hoe Saoly:" Avia eto, nareo mpitarike ty vahoake iaby, haiko naho henteo ty fomba nisehoa ze hadisoa zao androany. ³⁹ Fa, laha mboe velo kea Yaveh, ze magnavotre Israely, na le ao amy Jonatana anako aza zay, le ho mate vatane re." Nefa tsy nisy tamireo ndaty teo amity vahoake iaby namale aze. ⁴⁰ Le hoe re tamy Israely iaby:" Mitsangana eo amity agnilane, naho zaho vaho Jonatana anako le ho eo amity agnilane." Hoe ty vahoake tamy Saoly:" Anovo ze mete ho soa aminao." ⁴¹ Ka le hoe Saoly tamy Yaveh, Zagnahare Israely:" Atoro ty Tomima." Jonatana vaho Saoly ro azo tamity filoka, fa tafiala tsy voafily kea ty vahoake. ⁴² Le hoe Saoly:" Manova filoka amiko vaho Jonatana anako." Le Jonatana ro voafily tamity filoka. ⁴³ Le hoe Saoly tamy Jonatana:" Ambarao ahy ze nataonao." Hoe Jonatana tamine:" Nagnandra kele tamity tantele teo amity volin-ketae ze tetoy antagnako raho. Intoy raho; ho mate raho." ⁴⁴ Hoe ty Saoly:" Hanao zay ty Zagnahare naho hanao mihoatre amiko kea, laha tsy mate riha, ry Jonatana." ⁴⁵ Le hoe ty vahoake tamy Saoly:" Tokone ho mate vao ty Jonatana, ty nahalefe ze fandresea foloay ho ahy Israely zao? Sagnatria anie zay! Laha mboe velo kea Yaveh, le tsy hisy tsilane raike amity volon-dohane hipoke amity tane, fa niasa niarake tamin'Agnahare re androany." Ka nagnavotre Jonatana ty vahoake kay ka tsy mate re. ⁴⁶ Le nijano tsy nagnia ty Filistina i Saoly, naho nindeha tagne amity toera iereo ty Filistina. ⁴⁷ Laha fa nanomboke nandily ty Israely ty Saoly, le nialy tamireo fahavalone iaby tegne amity lafine iaby re. Nialy tamy Moaba, reo Amonita, Edoma, reo mpanjaka Zoba, naho reo Filistina re. Na taia aia nitolihane, le nampindaisene saze iereo. ⁴⁸ Niasa tamin-kerem-po foloay re ka naharese reo Amalekita. Namonje ty Israely ho afake tamity tagna reo ze nanimba iereo re. ⁴⁹ Reo anadahy Saoly le Jonatana, Jisvy, naho Malkisoa. Ty agnara reo anane roe vave le i Meraba, ampela-voalohane, naho Mikala, fara-vave. ⁵⁰ Ahinoma ro agnara ty valy Saoly; anakampela Ahimaza re. Ty agnara ty kapitene ty tafine le Abnera ana i Nera, rahalahin-drae Saoly. ⁵¹ Kisy ro rae Saoly; naho Nera, rae Abnera, ro anadahy Abiela. ⁵² Nisy aly mafe teo amireo Filistina tamity andro Saoly iaby. Laha fa nahisake ndaty mahere, na ndaty mahere arofo ty Saoly, le nalaene ho aze re.