¹ Mamaloza fo agnamiko, Ndranagnahary o, fa manafiky gn'ahy gny reo johary! gny reo mialy agnamiko manery mare gny fanafihany andro lava iaby. ² Magnitsiky gn'aly mandrakariva gny reo fahavaloko; fa maro gny reo mialy agnamiko ampirehareha. ³ Lafa mavaka zaho, la hapetrako agnaminao gny tokiko. ⁴ Agnamin-Dranagnahary, ro andrengeako gny safany agnamin-Dranagnahary ro fa nametrahako gny tokiko; tsy havaka zaho, ino ro azony nofotsy avao atao agnamiko? ⁵ Mandika vila gny safako mandrakariva rozy; manohitsy gn'ahy ami-gny fiaignan-draty iaby rozy. ⁶ Mikamba rozy, ka miery, ndraiky mitsongo la gn'ahy, fotony mikendry gn'aiko. ⁷ Ka enga handositsy ami-gny fanovan-draty rozy regny. Adrotso ami-gny siakao gn'olo maro reo, Ndranagnahary o. ⁸ Magnisa gny fifeziveziko Iha ndraiky manao gny ranomasoko an-tavoangy ao; sa tsy voasoratsy ami-gny bokinao ao va regny? ⁹ Ndraiky la hiamboho fahavaloko reo ami-gn'andro ze hikehako gn'Anao; haiko zay , fa hialy ho gn'ahy Ndranagnahary. ¹⁰ Amin-Dranagnahary__ro andrengeako gny safako, amin'i Yaveh__ro andrengeko gny safako, ¹¹ amin-Dranagnahary ro itokiako, la tsy havaka zaho. Ino ro azony gn'olo atao agnamiko? ¹² Agnamiko ato gny adidy hagnatanteraha gny fampagnantenako reo agnaminao, Ndranagnahary o, hagnomea fanday-pisaora ho gn'anao zaho. ¹³ Fa nandomba gny fiaignako tami-gny fahafatesa Iha; nitanjaky gny tomboko tami-gny fiantonta Iha, mba ahafaky gn'ahy mandeha agnatrehan-Dranagnahary ami-gny fahazavany gny velo agny.