¹ Manokilagna sofy gny fivavahako, Ndranagnahary; ndraiky ka magnetaky vata ami-gny taraiko. ² Janjigno zaho ka valio; mana fahatampera zho agnainy gny fahariany ao ³ nohony gny feony gny fahavaloko nohony fampijaleany gny raty fagnahy; fa mampanday gn'ahy fahoria rozy ndraiky magnendriky gn'ahy ankahasiaha. ⁴ Mangitikitiky gnagnaiko ato gny foko, ndraiky milatsaky tagnamiko gny evokevom-pahafatesa. ⁵ Fa avy agnamiko gny fahavaka ndraiky gny fangitikitiha, ndraiky mandofotsy gn'ahy gny evokevoky. ⁶ Hoy gnasako hoe: " Fa, laha mba nanagn'elatsy manahaky gny pizo zaho! La nitily zaho ndraiky ho ami-gny fiegnena. ⁷ Ingo, mivezivezy lavitsy vatany zaho; mijano agn'efitsy agny. Sela ⁸ Nandomba malaky ami-gny talio-tsioky ndraiky ranon'oram-baratsy zaho." ⁹ Ravao regny, Tompo o, atraofo gny safany! Fa nahajery herisetra ndraiky fifandira tan-tana tao zaho. ¹⁰ Mandehana ataondro voho haliky agnabony gny mandany zay regny. ¹¹ Heloky ndraiky sompatsy ro agnivony zay eo. Faharatia ro agnivony zay eo; ndraiky tsy miala amigny lalambeny gny fampijalea ndraiky fitaky. ¹² Fa tsy fahavalo ro nisafa mare gn'ahy, laha tsy zay la mba afaky nagnetaky avao gny vatako taminy avao zaho; sady tsy lay nalay gnahy ro nitsanga hanohitsy gnahy, laha tsy zay la afaky nagnetaky gny vatako taminy avao zaho. ¹³ Fa iha avao, ro johary mitovy saranga agnamiko namako ndraiky sakaizako nareo. ¹⁴ Nama fiharoa mamy tsika; nandeha tan-tragnon-Dranagnahary miaraky tamign'olo iaby tska. ¹⁵ Ao ho avy amin-drozy ami-gny tsy ampaizy gny fahafatesa; ao hidrotso velo ami-gny fiagna tsy hita agny rozy, fotony faharatia ro ipetrahany, na aia na aia misy gnan-drozy. ¹⁶ Fa zaho koa, la hikaiky an-Dranagnahary zaho, ndraiky Yaveh hagnavotsy gn'ahy. ¹⁷ Mitaray ndraiky misoloho zaho ami-gny hariva, ndraiky marandray voho gny mitatao vovonana; la ahakasa gny feoko ie. ¹⁸ Handomba gn'aiko soa aman-tsara Ie ami-gny aly ze nanohitsy gn'ahy, fa maro la maro vatany gny reo mialy tagnamiko. ¹⁹ Ndranagnahary, manjaka zisiky amperany, ro hijanjy ka hampitotsy gnan-drozy. Sela tsy miova mintsy rozy, ndraiky tsy mavaka gnan-Dranagnahary. ²⁰ Nagnaja tagna hamango ze milongo tagnaminy gny namako, tsy nagnaja gny fagneke nanagnany ie. ²¹ Nadoso manahaky gny dibera gny vavany, kay hondy nalay gny fony; nalemy manahaky gny diloilo gny safany, fe hay meso natsatotsatoky regny. ²² Apetraho amin'i Yaveh gny reo enta-mavesasatsy nao, ndraiky la hanoha gnanao Ie; tsy hagnenga gny olon-to hihozonkozo mintsy Ie. ²³ Fa Iha, Ndranagnahary o, ro hagnandrotso gny raty fagnahy an-davaky gny fahapoteha agny; gny reo mangetaheta lio ndraiky gny reo olo mpamitaky la tsy hivelo mintsy na la gny antsasany gny gnany gny hafa aza, fa zaho koa hatoky gn'Anao.