¹ Gny Tsitoha, Ndranagnahary, Yaveh la fa nisafa ndraiky nikaiky gny tany manomboky amin-gny fipasakiny gny masoandro ka la zisiky gny hilentehany. ² Baka Ziona ao, gny lafatsy amin-gny hasoan-tarehy, ro nitarifin-Dranagnahary. ³ Ho avy gny Ndranagnaharintsika ka tsy mba hatsitsigny ; hisy bolo mandrava gnagnatrehany, ndraiky talion-tsioky bevata ro eo amin-gny magnodidy gn'azy. ⁴ Mikaiky gny lagnitsy ambony ndraiky gny tany Ie mba ahafaky gn'Azy mitsara gny fokonolony. ⁵ Avorio miaraky agnamiko atoy gny reo matoky gn'Azy, la ze fa nanao fagnekea tagnamiko tamin-gny soro." ⁶ Gny lagnitsy hagnambara gny hatony, fa Ndranagnahary tompo-bata vatany ro mpitsara. Sela ⁷ Mijanjigna, ry oloko, la hisafa Zaho Zaho ro Ndranagnahary an-Dranagnaharinao. ⁸ Tsy hagnamatsy gnanao noho gny reo saronao Zaho; magnatriky gn'Ahy nagnagny magnagny gny reo fandainao ho roa. ⁹ Tsy hangalaky anaky lahy baka an-tragnonao ao Zaho, ndra aosy lahy baka ambalanao ao. ¹⁰ Fa gnAhy biby iaby agn'ala agny, ndraiky gny biby fihary iaby agnaminy gny havoa agn'arivony egny. ¹¹ Haiko iaby gny voro tomily am-bohitsy iaby, ndraiky gn'Ahy gny reo bibidia am-baibo agny. ¹² Laha mosary Zaho, tsy mba hisafa agnaminao zay; fa gn'Ahy gny tany, ndraiky ze agnaminy ao iaby. ¹³ Sa va ihina gny nofotsiny gny aombilahy va iaho na hino gny liony gny aosy? ¹⁴ Ameo an-Dranagnahary gny sorom-pisaora, ndraiky avaho amin-gny ambony mare gny reo fankeanao. ¹⁵ Keho taho amin-gny androm-pahoria; la handomba gnanao Zaho, ndraiky hagnamea voninahitsy gn'Ahy iha. ¹⁶ Fa amin-gny raty fagnahy koa la hoy gnasan-Dranagnahary hoe: " Ino ro ho ataonao amin-gny fagnambara gny reo lalako, fa nirinambinao ho am-bavanao gny fagnemkeko, ¹⁷ fotony malay gny fagnanara iha ndraiky magnary gnany reo safako? ¹⁸ Lafa mahajery mpangalatsy iha la mikaon-doha agnaminy; mandramby anjara amin-gny mijanganjanga iha. ¹⁹ Ameanao ho gnany gny raty gny vavanao, ndraiky gny lelanao magnatoro fitaky. ²⁰ Mifitaky iha ndraiky mivola hanohitsy gny rahalahinao; iha avao ro magnandrikendriky gny anaky lahin-dreninao. ²¹ Fa nanao gny reo raha iaby reo iha, fe nitanjaky fahangina iaho, la mihevitsy moa iha fa olo mitovy amin-gny vatanao avao zaho. Fe hagnanatsy gnanao Zaho ndraiky hagnakatsy, ho amin-gny tandrifiny gny masonao, gny raha iaby vitanao. ²² Asio vetsivetsy soa zay, iha mpagnaligno an-Dranagnahary, laha tsy zay la hotorotoroiko iha, ndriaky tsy hisy ho avy hagnampy gnanao! ²³ Ze magnomea sorom-pilongoa ro mankalaza gn'Ahy, ndraiky ho gnany ze mikasa gny lalany ho agnami-gny lalan-to ro hagnatoroako gny fandomban-Dranagnahary."